ISAIAH 6 - DEENA BAIBÉL (BSI)

Isaiahme Tomname

¹ Ujjiah rojake sido dítak delo ngo Ruutumme kaato. Bí agíke gai-gakona kedonko roja palenglo duudo, delokke bíkke roja lukdore Kumkeng Ekum tabungdem bííyin bomdo.

² Bík teyo delo mipile alap akképe gena Seraphim kídíe daggong bomdo. Mipilde alap annyilok agí migmoem polumsula, alap annyilok agí alem polumsula, delokke alap annyilok yopgoodo.

³ Bulu, buluke aralo sipe lubo sudo: “Deena deena, deena, Maglíngke Ruutum bí deene! Tani amolo bík angun-abée bííyin bomdung.”

⁴ Buluke miri lunam adud kídí delok Kumkeng Ekum lokke eyab gaang kídar delang ekum dungkeng kídíde epín gela, Kumkeng Ekumde míkkípe bííyamdo.

⁵ Dem kaala ngo, “Uloi! Reyubrunam adírem ngo paala nyokdak! Kapeila ngo deemana nabbél genako, delokke deemana nabbél gena ami kídí aralo ngo yédung, delokke ngok amigsi Maglíngke Ruutum Rojeme kaato,” emla lusuto.

⁶ Delo deena runggu delok arem megap lok laalennam guna mekol konem alaglo bomla Seraphim akonde ngokkíng yobala,

⁷ guna mekol delok ngok nabbélem itetdola lupodo, “Kaatola mekol si nok nabbélem itetto. Nok atímangem laabínto, delokke nok paabem asampe mepak bito.”

⁸ Delo ngo Ruutum ke adudko sipe emdupe tatto, “Sékome ngo lulíg míloi? Delokke sékoi ngolu kepe gíbiyén?” Delo ngo poyansuto, “Sina ngo, ngom lulígtola!”

⁹ Bí pokai, “Gíla ami kídar tabungem sim polangka: Nolu tadda tadda lateng tatkén mayé, kaada kaada lateng kangkén mayé.

¹⁰ Ami kídarke aapí-aangem mide molangka, buluke nyorung kídíem ruubé molangka, delokke buluke amig kídíem mikmang molangka. Demamílo buluke amiglok bulu kaasupelo, buluke nyorulok bulu tadsupelo, buluke aapi-aanglok bulu kénpelo, delokke míílat sulangkula ipíkosu kupelo.”

¹¹ Delo ngo, “E Ruutum, edít longe koda dekepe iyén?” emla poto. Delo bí poyansudo, “Doolung kídíe nyokla ato kaimape idoloope, ekum kídíe bénla, kumrukpe ila ami kaimape idoloope, asi-among arík kídíe nyokma tete loope.

¹² Ruutumbí ami kídíem mooteng amonglo monpakla, asi amonge kaimado loope depe iyé.

¹³ Midum íying lokke midum atele among delo duunamko kayékom, bímte nyokmoyé. Teribin esing demangkom ok esingem beetunam kísa bí iyé.” Beetunam leríde lekoda garsang mokupenam deena amí-ayépe ikupene.