ISAIAH 59 - DEENA BAIBÉL (BSI)

Ami Kídíke Paabem Lukaaname

¹ Aropakpe nolum ipítpe Ruutum ke alage andemang, delokke noluke roguem tatbipe bíkke nyorunge ruubémang;

² Idola noluke imem-samem kídíde nolum lang noluke Shédíke pénsamem duusék bomdung. Noluke paab kídíde bíkke migmuem pokapdung, delokke bíkke nyorungem ruubé modung.

³ Kapeila noluke alag, lakkéng kídarde líínam iyyie bííbomdung. Noluke nabbélde menam agom mílíe; noluke ayode gomké-gommo mílí agom tetepe lutídung.

⁴ Sékote raadang pénsam agom luna kamang, delokke sékote aina kebangem lubina kamang. Bulu are kamana agomlo lutí bosula, menam yadnamlo potí goola, agínpe ebín-ebon pena atoem mííta tatí goola, aimangem ilen kolo ití dung.

⁵ Bulu tabí apíem pílenla gupkal gootíla, mopí tarum íamlo amtí gooyé. Buluke apí kídar dem dona kídíde siyinyé, delokke apíko kalmílo tabíko batlen dung.

⁶ Buluke esap kísa ponamde egepe agér bimaneke, delokke bulu agísude agí sumsunam egem gela sumang. Buluke agér-anam tabungde atímana mílíe, delokke buluke alag kídíde rulnam agér mílílo itídung.

⁷ Paab agérlo buluke ale menang along dung, delokke paka-nikka kolo bulu lomdung. Buluke aapí-aangde atímang mílílo míítíla, buluke gítíngde agínpe sinam-nyoknampe itídung.

⁸ Bulu aapí eetet legangem kénkímang, delokke buluke pénsam aapí bedang kamang. Buluke gíko bedang tabungde gerna mílíe, iname séko bulu delo gímín geyédí bulu edílokom aapíe eetetpe yémayé.

Ami kídíke Ponkan Suname

⁹ Sikepe ngolu ila, ngolukíng dormo ségude píímang, delokke jonna aapíde mootengoolo kadung. Ngolu angunem matadung, idola kaamode ngolum ikumdung. Ngolu angun bedanglo gípe míídungai, idola kaamo ruuruklo ngolu gílatdung.

¹⁰ Migmana ami kísape ngolu suppi kídílo memda sugola, amig kamana kísape pida-pira sugola igodung. Longe raadalo yume adeng kísa ngolu tupsu goodung. Miram kídí pénsamlo ngolu sina kísape atí ralmang.

¹¹ Ngolu takame situm kísa ugdung, delokke pekí kísa ankílok ríídung. Ngolu pénsam kebangem matalate paamang, delokke ngolum ipítnamde mootengoo lokai kadung.

¹² Kapeila Ruutum nokke kangkolo ngoluke imeme bojéko kadung. Ngoluke paab kídíe ngoluke mirupe hakii bidung. Imem-hamem kídíde agínpe ngolukíng katíla, ngoluke paabem ngolu toge sudung.

¹³ Ngoluke aapí-aang kídar si agínpe Ruutum nome rukup-yatkupla, mirolpe itíla, Shédí nome lamku danlo mepak geyéla, menam-yadnam pityang aapí mílílo míítíkai.

¹⁴ Depeila, pénsam kebangem ngolu lubo sula yimang, delokke dormo ségue ngoluke lok mooteng alongkai. Ngoluke bedu-bedang kídílok aro emnamde kaimang, delokke agér-anamlo mííyod pemanam aapí-aang ségue ngolukíng aalamangkai.

¹⁵ Aro emnam dem ingko loteng mapa yimang, delokke séko bulu atímangem mepak dudí, dekede mirolpe rolbomnam ato kope ikai. Pénsam-raadang aro agom kaimang emla, Ruutum bí agísue kaasula míídír alongkai.

Ami Kídíem Ipíkupe Ruutum ke ilenname

¹⁶ Itung-irénam kídíem igulna ami atel kote kamang, emla bí kaala míírí-míínyope míngkai. Depeila bíkke agíke alage bulume mopít langkula, bíkke deename bulum ikum boyéku.

¹⁷ Bíkke angkeng tamtepe deenamem gela, turnamem bíkke lubrope gela, atímangem edo rayan supenamem galukpe gela, delokke aidokupe ikunam agérlo erbom namem lukdor egepe pogela bí agíe isuyéku.

¹⁸ Mooteng amonglo duuna kídíemte itak sula, miru kídarke agér inam tabungem, bí marla miru kídí teyolo edo rayéku.

¹⁹ Anggodan lokke ami kídíe bíkke amínem pesoyé, delokke sanggodan lokke ami kídíe bík angun-abé em pesorían gela erkí geyé; kapeila bí puumupe tokna asi kísape eebomyé, delokke Ruutum ke Aide bulume monpakyé.

²⁰ Ruutum bí sikepe ludung, “Paablok aapí míílat sukuna Jakobke otíng kídíke legape Jayon lo Ipítnabí píídak.

²¹ “Ngokke pedan, si ngokke bulukíng ibosunam daaponge, emla Ruutum bí podung: Nolukíng yémín gena ngokke Aid bí, delokke noluke nappalo ngok agom-aang ilíknam kídíde, edílokom nolu kelok gíkumayé, delokke dekede noluke ome-oo kídílo; noluke oten-sirek loope agínpe duuyaryé.” Sikepe Ruutum bí agomem polendung.