ISAIAH 57 - DEENA BAIBÉL (BSI)

Mimang Kumnamem Lukaname

¹ Deena amie sidung, delokke deme sékote aapílo míngíng gemang; Sékoteng kénmadungem míngkesuna amiem laabín dungku. Kapeila deena amiem atímang lok mopítpe laasing dungku.

² Séko bulu deenampe yétodí, bulu eetet-monet kolo aadung, delokke gaipe sikolo apéé dungku.

³ Idola moya-montrong ina, abír-ayo, delokke notiipe ina kídíke ome-oo kídí nolu, kebang kerang so aalangka.

⁴ Sékome nolu lupu-lulédun? Sékome nolu ngilkala lué-lulédun? Nolu mela-yatla, mirolpe roltína kídíke ome-oomangía?

⁵ Nolu kedonna esing bottena rumkílo lang rotne rumkílo uyu kumsu goola, deemang amo agérem ití goobosula; agíke ome-uem, korong-roojik kídíke abe-are lokke lííbung-língang bupík kídílo ipak goola, mokala itígoona kídíe nolu.

⁶ Nolu kampona dabu, lííbyang kídílok korologe típala uyu ruutume, emla kumsu dungku. Nolu onggur alang, delokke ali-ayé emte bomala, delo uyu kídar delo bikan sulík dung. Sikepe inam dem ngo ashéng líkyé, emla nolu míídunía?

⁷ Nolu kedonko díítum teyolo, ipak-saamo isang goola, ipgo bosula idung.

⁸ Noluke eyab ara delo, mibo-miyingke mimangem nolu edíípe pílíktung. Nolu ngom mepak sula, agíke ege-galugem ibín sula, ketkeng bortakna delo, noluke are binam mimumem, noluke mííbosunamem ibbosula, noluke aapí-aange apíírudope idung.

⁹ Nolu namporuna tél kídíem mollík suge yéla, Molek uyume kumkolo gídung. Noluke kotoki kídíem rego mipílo lulíggoola, siko among lote melík godung.

¹⁰ Abíd uyu kídíem matagoola, nolu adung-apéé aloodung, idola nolu mema teteng. Noluke mata goonam uyu mimang kídíde ralnam bidung emla nolu míísula, ralsi-ralmola nolu apéémang.

¹¹ Ngok keralo menam agom lula, ngome mitpan sula, nolume yagorupe pesomona uyu kídíde séko buluda? Ngo deddína longem adud-ayud mape duunam legapía nolu ngome peso yimape, noluke aapílo míngge yimane?

¹² Nolu gairupe isudung emla míísudupe, idola ngo noluke agér-anam séguem lengkanyé, delokke noluke uyu kídíde, nolume atí igul lamayé.

¹³ Noluke igul legape kapgu-roguyém, noluke langkumnam uyu mimang kídíde igul layédí? Dem takam asare mutnyokyé, ngalen kunam asar eteng dekedem mutbomyé. Idola séko amie ngome míngke suyédí, bí asi amongem ruutum bomyé, delokke ngokke deena díítelo ngome kumsula yéyé.

Shédíke Igul Delokke Ipínamem Pésuname

¹⁴ Delo sikepe poyé: “Molangka, molangka bedangem molangka! Ngokke ami kídí lokke enku peko bedanglo dotum-dorum penem laabín langka.”

¹⁵ Kedín-kedon rupe yéna bí, turyarna bí, sékoke amínedí Deene, bí sipe podung, “Ngo deena, delokke kedon kolo duudung. Idola aapí dengomna, míílat sukuna kídí loteng, dengomna aidem turmo dokupe, delokke míílat sukuna aapíem turmo dokupe, duumín gedung.

¹⁶ Ngo agínpe luka yimayé, delokke maryi mayé. Depe imamílo turdope ruunam ami kídíke aide ngok keralo kénsu-paasu yimape loolet geyé.

¹⁷ Buluke yagorupe míta-hagta paab aapí-aang legape, ngo aklíto, marlílok ngo bulume itung-iréla, ngok migmoem buluke keralok rusi sugeto. Depe ilate buluke paab séguem bulu mema tetengkai.

¹⁸ “Buluke séguem ngo kaayinto. Idola ngo bulum ipíyéku. ngo bulum gíbo yéku, delokke igul langkula ngiiyéku.

¹⁹ Israel aralo kapna-ríína kídíke miksiem tídbín bila, bulum ashéla yidge moyéku. Aapí eetet kunamem rego mipilo kayin moyéku. Kilii-ramli takam lok ngo ipíyéku.

²⁰ Idola edílote apéé kamana, delokke arang lokke deemang-amoem luyulo yoblen lentína siyéng lokke sipar kídí kísape, atímana ami kídíde idung.

²¹ Atímana ami kídí legape edílokom aapí eetet emnamde kamang.” Sikepe ngok Ruutum bí podung.