ISAIAH 56 - DEENA BAIBÉL (BSI)

Mibo Amiete Shédíke Turnamem Paayé

¹ Ruutum bí sipe podung, “Pénsam aapíem gela íngkuedí arodune, deme igelangka. Kapeila ngokke turname anínkai, delokke ngokke angun-abé em menape lengkan dakbong.

² Séko amiedí edíírupe gagbomla sikesim igedudí; séko amie Sabbath longem deemang-amo ilíkmape bomgapdudí, delokke séko amie atímana agér inamem mepak dungkudí, de amide gairune.”

³ Ruutum kelo lekolíkna mibo amiem, “Ruutum bí bík ami aralok ngome laalen yéku,” emla pomo mapeka. Delokke mumbalpe ina ami demte, “Ngo ereena esingko,” emla manmo mapeka.

⁴ Kapeila Ruutum bí sikepe podung: “Séko mumbaledí, ngok daapongem edíírupe bomgapla, ngokke aipe míínamem tetepe itíla, delokke ngokke Sabbath em nyogap bomyédí,

⁵ dekepe inadem, ome-uem pemílo gaiyape, ngokke Kumkeng Ekum lokke suppi kídílo, buluke amínem atlíkla meyé, delokke de amín kídíde nyokyimape agínpe míípa sudope duuyaryé.

⁶ Mibo ami aralo séko buludí, Ruutum kíng lekola, bím agér ibila, Ruutum me ayala bím kumsula, deemang-amo ilíkmape Sabbath longem nyogap yédí, delokke ngokke daapong inamlo edíípe gagda suyédí,

⁷ dekepe ina kídídem, ngokke deena díítelo ngo saamoyé, delokke ngome kumpom ekumlo ashéngem, ngo bulume ruulíkyé. Ngokke runggulo buluke romnam aman emlang abíd ipak inam kídíem ngo torík suyé. Kapeila ngokke ekum dem opín-buang daadike Kumkeng Ekume emyé.”

⁸ Mibo minnompe yéko lok Israelem laadum sukuna Ruutum Shédí bí sipe podung, “Ngo laadum sutokunam ami kídí kékon lote abíd amiemte laadum sulík yéku.”

Israelke Yégebona Ruutum Kídíem Lukaaname

⁹ Moonamlo yéna monkír-tangkír kídí takame, delokke aríklo yéna atímana simon-sili kídía, nolu takam píídum sula dola-tíílangka.

¹⁰ Israelem kaabomna kídíe migmadung. Bulu atí kénmang. Bulu takam kyaklamana ekii kísa iyindung. Bulu kettí goola, immang maatíla, imnam petomem mííbom neke.

¹¹ Bulu akii bottela keno notína ekii kísaneke. Bulu agí míínampe yésula, agíke paapek mílílo mata-tatí sula, atí kénmana mér kaabomna kísane.

¹² Bulu mipil-miyongpe, “Kaju, ngo apong ko matayé, ngolu takam aang píípe apong tíílape; silo kísa nyampokom ilang kupe; ilayé mílo pakyape erap lape,” emla lutí bosudung.