ISAIAH 52 - DEENA BAIBÉL (BSI)

Shédíbí Jirusalemem Mopítyé

¹ E Jayon, ralnamem egepe gela, darngo sutola, darngo sutola. E deena doolung Jirusalem, nokke angun-abéna egeme geto langku. Dínbíng iyod sumana, delokke deemana amie nokkíng edílokom aayimayé.

² E Jirusalem, nokke ale demulem danbín sutola, delokke kedonna palenglo duuto kula. E Jayon ke ami kídía, noluke alínglo genam ikoli kídídem, kokbín suyin tokula.

³ Maglíngke Ruutum bí sipe podung: “Nolume are laamape koto, delokke nolume are laamape ipít yéku.

⁴ “Kapeila maglíngke Ruutum bí sipe podung: Kerayalumpe Ijipt amolo, ngok ami kídíe duutokto, delokke méélampe Assiria de, bulume iré alooto.

⁵ Supak ngo so ingkueke kaadun? Ngokke ami kídíem are-ame atí emmape abílpe bomkai, delokke séko bulu ngok ami kídíem yébodudí, bulu yitkím sula, ngome lupu-lulé dung.

⁶ Dekepeila ngok ami kídíe ngok amínem kényé; dekepeila delo longe delo Shédí ngomino pone emla bulu kényé.”

⁷ Dííte kídílo tatpona ngiitomem bomana kídíke ale kídíe, edítko kampodun? Bulu aapí eetetnam agomem lubidung, bulu tatpona dooyingem boma bila, turnam legangem pogo bila, Jayon me, “Nok Shédíbí roje,” emla luge bidung.

⁸ Tattola, nome kaabomna kídíe, lekope ashéla ulo jérla kumín sudung. Jayon lo Ruutum ke angkunamem buluke agí amige kaasukai.

⁹ Kumrukpe ina Jirusalem, ashéla ngomlen langka; kapeila Ruutum bí bíkke doolung suem, mopítsula ami kídíeme ayasuyéku.

¹⁰ Ruutum bí agíke deena alag ralnamem, opín takam kangkolo lengkansula, agí amieme ipí suyéku. Tani among kéényung loope, ngoluke Shédíke turnam binamem kaapayé.

¹¹ Gílen langkuka, menape Babilon lok, gílangkuka; séko buludí Ruutumke ekuserangem bomyé kune, bulu deenampe gílen kupe aido, delokke deemana atoem ukkí mapeka.

¹² Idola nolu lomlenla gílen kumapeka, demangkom dugyam kumapeka; kapeila Ruutum noluke Shédí bí, nolume kaabomyé, delokke noluke kerangem gíge boyé.

Agér Ibinake Ankí-adírname

¹³ Kaatola ngom agér ibina bí, utepoorue kayé. Bí angun-abé rupe yéla, kímte-remtepe ila, tabunge bím kaadu suyé.

¹⁴ Deddína amie edílo bím kaatodí, bulu bíkke tani amíl-amope kaayimape inamem kaala mamem suyinto.

¹⁵ Idola deddína opíne bím míírí-míínyope mííyé, delokke roja kídíe kaarí-kaanyope bíkkíng kangek sula agom poyimape kaatíyé. Kapeila buluke kangkí-tatkí manam legangem bulu tatyinyé, delokke kaayinyé.