ISAIAH 51 - DEENA BAIBÉL (BSI)

Jirusalemem Ashéng Agom Poname

¹ “Séko nolu Ruutum me matala, deenamem erbomdudí, nolu ngok agomem tatlangka: Noluke lenko leríng lííredem, delokke nolum gallenko líítam dem kaasu tola.

² Noluke abu Abraham melang, nolum olenna ane Sarah me kaatola, Ngokke Abraham me tomduem bí atel ito, idola ngo bím utepooroem ruulíkla, bojérudope bím ngo parmoto.

³ Ruutum bí arorupe Jayon me, aapí edíí dokupe ngiilangkula, kumrukpe inamem ayang kaapang subiyéku. Bíkke yépolpe inamem Ruutum bí, Eden baaripe imoyéku. Bíkke rukna among dem, Ruutum bí ríksépe imoyéku. Delo bí ashérula, erla miri lula, Ruutum me yidgeyéku.

⁴ E ngok opín-buang ami kídía, ngok agomem tatlangka: Ngokke lok ayone lenyé, delokke ngokke pénsam kebange, opín takamke angunpe iyé.

⁵ Ngokke deename menape píídak, ngokke turname anín kabong, delokke ngokke alage opín kídí, aralo raadang-pénsam agérem, ilen geboyé. Siyéng bogralo duuna takame, ngokke alagem mííbom tetela duuyé.

⁶ Taleng emla amongem nolu kanggo sutoka: Míkkí kísape talenge nyokyéku, ege ínna kísa amonge loorí yimayé, delokke tani kídíe tamid sinam kísa siyin yéku. Idola ngokke turnamde agínpe duuyaryé, Delokke ngokke deenamde edílokom, iramdí kamayé.

⁷ Ngokke ayonem aapílo gena kídí nolu, ngokke aina bedangem kaajing-kénjingna nolu, takame tatlangka. Tanike lupu-lulé, delokke lukang nameme pesomapeka.

⁸ Bulu tabín-dorín donam ege kísa, nyokyinyéku, idola ngokke ipítnamde agínpe kayé, delokke ngokke turnamde, siirum siirum loope kayaryé.

⁹ “E Ruutum ke alagpe ina kídía, ralnamem egepe gela darngo sutola. Kerangke gína longe kísa, konnying-mennyingke buku kídí lokke longe yénam kísa, nolu darngo sutola. Nolu bíríbít Rahab me, ol-olpe tekmík manía?

¹⁰ Nolu siyéngem ere momanía? Ipítnam kídíe dengerupe gídope, eerí rungko asi aralo bedang momanía?

¹¹ Ruutumke relen kunam takame, ashéla, miri lula, erap aloola, Jirusalemlo pííyéku. Delo bulu agínpe ashéng ayaryé, delokke edílokom kilii-ramli, duuk-simue kamayé.

¹² “Ngo petommin nolume ralnamem ruulíkne. Dekemílo neyi-neyang kísa sikupena, tanime nolu kape pesokane?

¹³ Nolum pílenna Ruutumme nolu mitpan sutonía? Bímin talengem atam dope ine, delokke amongke dakkengem pílíkne. Dekemílo kape nolu loodípe, nolum irééna kídíeme peso sotí gela, nolume mokape ina kídíeme roge getíla, yétíkan? Buluke marnam de noluke teyolo atí ilamayé.

¹⁴ Pateklo duuna kídíem menape ilen yéku, bulu deddína yénamem yéla turyéku, delokke dope-tíípe namete alum-asa yimape iyé.

¹⁵ Ngomino Ruutum noluke Shédíbí, ngo siyéngem usa mola, silung-siyéngem usa mola, silung-siparem taalen modung. Ralyayalumna Shédí ngok amíne.

¹⁶ Ngo talengem atam dope ila, amongke dakkengem píne. Ngo Jayon me, ‘Nolu ngok ami kídíe,’ emla poyilla kaabomne.”

Jirusalemke Adír Díryinname

¹⁷ E Jirusalem darngo sutola, darngo sutola, delokke gerep tola. Ruutumke marnam apongem, nome itung-iré dope binam, alangem no tííla, tíngír sula no ngekai.

¹⁸ Nokke agíke osula isaanam aralo, sékote nokke alagem gagbomla, nome gíbo lana kamang.

¹⁹ “Nokkíng sinam-nyokname, dírí-kenoe, midu-mimage, repsisula aabomkai. Sékoda nome ngiila, erdokupe agom luyilyén?

²⁰ Dumsungeme songkit ognam kísa, bedu-bedang, kéényung-kéérung takamlo, nokke ami kídíe atí ralnam kaimala, olet goola ketgongdung. Kapeila bulu Shédíke marnamem, delokke lunamem pangkai.

²¹ “Depeila itung-iréem paala, apong tíímalate tíngír suna kísa ina nolu, tatgap langka.

²² Ruutum noluke Shédíbí, miru lok ipítna bí sipe podung: ‘Ngokke aklílok nolum tíímonam bati dem, ngo laabín yéku. Nolum tíngír suna kísa imona, ngokke marnam alangem kana bati deloge nolu edílote tííyimayé.

²³ Delok ayanpe, “Ngolu nolum tujémla gídope, ngoluke keralo nolu ketlangka,” ’ emla yupyangem tujémnam kísape, nolum ipusilééna kídílo, dem ngokke marnam alang bati dem, bulume bilatyéku.”