ISAIAH 47 - DEENA BAIBÉL (BSI)

Babilonke Nyokku Pename

¹ Ruutum bí podung: “Babilonke ome no paleng delok oila, among lokke deemullo duulangka. No longeko mimak iangkímanam, milo kénkímana kísa ituai; idola no supak kampona mumsul kope iyimang.

² Nokke kampona ege kídíem, atuk migmoem pokap sunam kídíem, ibín suge yéla ali-aamem elíng kiiparlo kétlangka. Nokke galeme sosum sula, korongem koolangka.

³ Nokke annyingem, amíl arangem, ami takame kaayinyé. Ngo edo rayé, sékote ngom lutum lamayé.

⁴ “Israelke Deena bí, ngolum ipítne, Ralyayalumna Shédí bí, bík amíne.”

⁵ Babilon me Ruutum bí ludung: “E Babilonke ome, no kaamo kolo gíla, adud kamape asoope duulangka. kapeila nome yéta takamke, ranie emyimayé.

⁶ Ngo agíke ami kídílo aklíla, ngokke amipe bulum sanpaktuai; depeila bulume nokke rumkílo, ngo ruulíkto. Idola no bulum ayang lengkan maato; mijing-ejo kídíemte no itung-iré alooto.

⁷ No legí-sigangem aipe kangkí-tatkímape, demangkom kape iyékudí, emla aipe míírung sugela imape, ‘Ngo agínpe ranipe iyaryé,’ emla míngkím suto.

⁸ “Ashéng-angam mílílo míítína no tatgap tola, no ebín-ebon kamape ashéngpe duuyaryé, emla míísudunía? No agísuem, ‘Ngo mino, ngok kékonlo, abídyang kamang, ngo edílokom meyéngpe imayé, demangkom ome-oo aréémayé,’ emla mííte sudung.

⁹ Idola dekedem longe lotel lok menang asak nyokpak moyé. No deddípe moya-montrong agérem idagakom, nok miloe sinyoyé, delokke ome-uete siyinyé.

¹⁰ “ ‘Ngome sékote kaamang,’ emla nokke atímalo no míídasuto. Idola edílo no agísuem, ‘Ngo mino, ngok kékonlo abídyang kamang,’ emla míítesula, nok kénnam emlang gyanem míngkím sutodí, delo dekede nome gímem bokai.

¹¹ Sinam-nyoknam adíre nome aabomyé, moya-montrong kídíe deme itum lamayé. Nokke kaato-kénto sumaname, menang asak nome ojét aabomyé, dekedem no ato kolo líkpé sula igé lamayé.

¹² Nokke koo amé lokkai ití bomnam, moya-montrong kídídem bomgap kítoka. Dekede nome anyongko igul langkom ilado, nok mirueme pesorían molado.

¹³ Nok legape nokke luyil-poyil paanam, tabungde nome adír modung. Takamem sanla, taleng tesime, alop aloppe kímíkla, poolo pooloem kape iyédí emla polu-poorna nokke takar miri, kídíde aala, aapena adírlok nome ipít kímoto; bulu arope ilayédí ilamadí.

¹⁴ “Aropakpe emmílo bulu nemung ereena kísane, eme bulume gukut yéku. Meyo pamki lokte bulu agíem ipí sula mayé. So séko mekom iigang mona, eme mekol kote kamang; delokke eme parla, duupeko koteng kamang.

¹⁵ Nokke siisang yénam lokkai, lupo-manmo potí bosunam takar miri kídarde, sékote nome ipít laamape, nome mepak geyéla agí-agí bedang sulok gísudungku. Dekena petomko mino nome bulu ibiladun.”