ISAIAH 46 - DEENA BAIBÉL (BSI)

Babilonke Uyu Kídíe

¹ Bél uyuke dumponge beggípkai, Nébo uyu bí gubangkai. Babilonke mimang kídíde, simon-sili kídíke tebegpe gebom sunam eke; gebomnam mimang kídíde, apééna kídí legape tebeg momo ineke.

² Bulu dumponge beggípla, gubla agíeme ipít sulamaneke, delokke bulu umko sula abílpe bomgong kosuneke.

³ E Jakobke otíng-oyin kídía, ngok agomem tattola, Israel kelok lenna turkína kídí; nolum olen delok kake ila, ngo nolum aiyope kaasuto.

⁴ Noluke dumpu bukla, mijing-eejo loope, ngo nolum ayayé; kapeila ngomin bí. Ngo nolum pílenne, ngo nolum gagbomyé, ngo nolum mopítyé, delokke ngo nolum ipíyé.

⁵ Séko kída nolu ngom ruupe suyén? Demangkom akampe saplík layén? Séko kída nolu ngom mííbísula, lekope ruupe suyén?

⁶ Ayokone agí munang lok uunem toolen sula, delokke sér pallalo baldínem bekkíla, bulu uun mistriem tomla, deke delok uyu kope pípala, deme gubla kumsula idung.

⁷ Deme bulu gordulo joobomla, iruusunam alop kolo dakdope pílíkla idung. Alop delo mimang de bele yimape dagyardung. Akone deme kumsu dokom, de agom poyan sulamang. Bíkke dug-adírlo mimang de bíme ipí lamang.

⁸ Mirolpe itína kídar nolu, sike sime míípang ayar sula, noluke aapí-aang delo mííyar gelangka.

⁹ Kerangke agér-anam inam kídíem míípang sulangka; Ngo petom Shédíbí emla míílangka; ngok kékonlo anguyang Shédí kamang.

¹⁰ Kerapekai angkupena longeme ngo lengkanne. Konnying-mennyingkai ila lunnying nyampokem ngo sutkanne. Ngokke míínampe ipe aido emla, ngo pésula ngokke míngkorpe, ato-siro takamem ngo píne.

¹¹ Sanggodan elok ngo amiko tomtung. Bí pemí kísa deetok bomla, ngokke mííbomnamem ipíng biyé. Ngo ingkuem míítodí, delokke polentodí, dekepe ngo ipíng moyé.

¹² Aapí tolna ami kídí, ngok agomem tatlangka. Nolu deenam ke mootengoolo duudung.

¹³ Idola ngokke deenamem, ngo anínlo laanín aadung; de yagope mooteng mang. Ngokke turmo kunam agér dem adol momayé. Turnamem ngo Jayon me biyé, ngokke angun-abé em, Israel kíng orlíkyé.