ISAIAH 45 - DEENA BAIBÉL (BSI)

Sairasme Ruutum ke Ullíkname

¹ Ruutum bí Sairasme rojape ullento! Bí bíme among yéta kídíem ikumdope ullento; bí roja kídíke ralnamem laabín dope bím melíkto; Ruutum bí luune kídí lokke eyab kídarem bík legape sitya biyé. Sairas me bí sipe podung:

² “Nokke keralo ngo agísue gígela dííte kídarem neying sumoyé. Ngo pitol lok monam eyab kídíem dírmíkla arem lok pínam etor kídíem gattung geyé.

³ Nome amínlok gogna Ruutum Israelke Shédíbí ngo emla kéndope kaamo aralo, kénmang kolo rumnyok tunam sérang kídíem ngo nome biyé.

⁴ Ngome agér ibina Jakobke legape, ngokke ullennam Israelke legape, no ngome atí kénmape idagakom nom ngo amínlok gogla, botte-hane ruupe yidnam emte nokkíng ruulíkto.

⁵ “Ngomin Ruutum bí. Ngok kékonlo anguyang shédí kamang. No ngome kénmaduakom nokkíng ngo ralnamem ruulíkyé.

⁶ Depe ikolok doonyi saangko lokke ila uangko loope ngo petommin Ruutum bí, abídyang kamang emla daadi takame kényinyé.

⁷ Ngo angun emlang kaamuem pílenne. Ngo mirempe imone, Delokke tong-aryang emte ruune. Ruutum ngomin sike takamem ilen mone.

⁸ Deenamem pedongpe teyong among kídí no omolangka. Kédéng no ayang bilangka, nokke lok deename lang turname bukla garsa dope. Ruutum ngo min deke tabungem pílenne.”

Ruutum bí Pílen-ruulenne

⁹ “Abíd kédéng peking kísa ina, kédéng peking de pína dem akmín sulayén? Kédéng de peking pínadem, ‘No ingko koda idune?’ emla íílayén; ‘Pínabí píkénmang,’ emla kédéngde lulayén?

¹⁰ Ingkona ome-oo kídíeda ane-abuem, ‘Nolu ngolum kape sikepe olenton?’ emla lulayén?”

¹¹ Angkupena longem irung gena, Ruutum, Israelke Deena Shédíbí sipe podung: “Ngokke ome-oo legangem kape nolu íngkíyén? Demangkom, ngokke agér ipenamem lulígyén?

¹² Ngomino among sime pílenla, among so tanieme yémone. Ngokke lakbíng ralnamlok, taleng tesime aya-pesa dope ila, doonyiem, pooloem, delokke takar kídíem, gagbomla kaabomne.

¹³ Ngokke míínamem ipíng bidope, delokke ato-siro tabungem jondope, ngo Sairas me ruulentung. Bíkke bedangem ngo jonmoyé. Bí ngokke Jirusalem doolungem, lekoda mosaa biyéku, Delokke abílpe umnam, ngokke ami kídíem, asarpe gímoyéku. Séko kom bíme remang, delokke sike agér legape bí reko sumang,” maglíngke Ruutum bí sikepe polendung.

¹⁴ Ruutum bí sipe podung: “Ijipt kelang Sudan ke miremde, nokkepe iyé, delokke bodona Seba ami kídarde, ikoli gela nokke abílpe ila, nok méélamlo gímín geyé. Bulu nome kumsudola sikepe pokan suyé, ‘Arorupe Shédíbí nokkíng kadung. Bí petom Shédíe, abídyang kamang.’ ”

¹⁵ E Shédía, Israel me ipítna; arorupe no agíem ruunyok suna Shédíko.

¹⁶ Mimang pína tabungem annying mola, ayangke luyulo yéyin moyéku.

¹⁷ Idola Israel me Ruutum bí ipítyé, delokke agínpe turnamem biyé. Yénam takam legape Israel bí annying paamayé, delokke ayang aralo yéyaryé.

¹⁸ Teyong among kídar tesim pílenna bí Shédíe, tani among sim pílen-ruulenna, bí edíng aloodope pílíkto; bí atí kamadope pílenmang, idola tanie yébomdope píto. Bí agísue podung: “Ngo petommin Ruutum bí, ngok kékonlo abídyang kamang.”

¹⁹ Kaamoko among kéényung kon kolok, sékote kénmadope ngo agom pomang. Atí kote kamang kolo, Israel ami kídíem ngome mata momang. Ruutum ngo aro agom pone, ngo jonneme lengkanne.

Ruutum lang Babilonke Mimang Kídíe

²⁰ Olet kuna Babilon yétaklo, turna opín-buang ami kídía? Kebang keraso takame píídum sulangka. Séko bulu esing lok monam mimang loge bomla, ipít lamana, uyu kídíem kumsu dudí, de ami kídarde, atí kénmane.

²¹ Nolu tabunge lupo bosula, kebang ekumlo noluke kebang lupenamem lukan bilangka. Legí-sigang kídíe kape iyédí emla sékoda kerapekai porung gene? Agíke amiem ipítsuna, Ruutum ngomin porung gene. Ngomin ipítna Deena Shédíbí. Ngok kékonlo anguyang Shédí kamang.

²² Tani among duurí lokke ila, nolu takam aapí míílat sula, ipítnamem paalangka. Kapeila ngo petommin Shédíe, ngok kékonlo anguyang kamang.

²³ Ngo agí sulok pésudung, pokup-polat kupe manam agomem, ngok agí nappang sok polen sudung; ngok keralo takame lebíng-kooníla pelayé, ngokke amín lok takam nabbéle pésuyé.

²⁴ Bulu ngok legangem sipe lubosuyé, “Ruutum petom kíng deename lang ralname kadung.” Ruutum me akna tabungde, bík keralo aalat suyin yéku, delokke annying suyinyé.

²⁵ Idola Ruutum kíng, Israelke otíng-oyin tabungem, deenampe hanlíkyé, Delokke bíkkíng míngkím sulíkyé.