ISAIAH 42 - DEENA BAIBÉL (BSI)

Ruutum ke Béérange

¹ Ruutum bí sipe podung: Kaatola, ngokke erbomnam, ngome agér ibina bím. Bí ngokke ashéng bomname, Ngokke ullen suname. Ngokke Aidem bíkkíng ruulíkto, bí opín-buang takamlo pénsam aapíem geboyé.

² Bí bedu-bedalo ulo gogla, demangkom érgoola, demangkom ugla kebang lugomayé.

³ Gerna piikong kokom bí dírmayé, demangkom améngope írna, lém meruem mutmit mayé. Bí agínpe duuyarpena, raadang-pénsam aapíem bomaboyé.

⁴ Bí míínam sunam emlang aapí míídugem menyok sumayé; tani among so bí agínpe duuyarpena, pénsam kebangem ilen boyé. Mooteng ami kídíe bíkke ayonem, erbomla toyayé.

⁵ Taleng tesim pílenna, bortak mona, tani among sime kamporupe píla, sokke ato-siro takamem ruuji-ruumala ruulenna, tani takam teyolo asarem ngalíkna, turkína ato-siro takamem turmona, Ruutum Shédí bí sipe podung:

⁶ Ruutum ngo nolume deenam lok tomlento; ngo noluke alagem gagbomyé. Depe idola nolu kelok iyon sula, ngo tani takam lo daapong ibosuyé; nolu kelok opín takamlo angunem bomayé.

⁷ Nolu migmana amigem darmoyéku, pateklo abílpe umnamem ipít yéku, delokke arung arangke ekumlo, kaamope duuna kídíem ilen yéku.

⁸ Ngomin Ruutume, de ngokke amíne; uyulo ngok angun-abé em bimayé, murti mimang kídílo ngome yidnam, miriem lekope itak sumo líkmayé.

⁹ Kaatola, kerangke ato-siro kídíe, apíípe iyinkai. Supak aní ségu kídíe, ilenmang adapekai, ngo angkupena aní ato-siroem noluke tatkolo porung gebidung.

Ruutum me Yidnam Mirie

¹⁰ Ruutum kíng miri aníko lubilangka; tani among takame bím yidla, miri lulangka. Siyénglo jaji yudna kídía, bím yidlangka, siyéng bogralo moopí duuna kídía, bím yidlangka.

¹¹ Yépol amonge lang delokke doolung kídíe Shédíme yidlangka, Kedar ami takama, bím yidlangka. Sela doolung lo duuna kídíe dííte teyong telok ashéng lok, érla yidge langka.

¹² Mootelo among duuna takame, Ruutum kíng angun-abé em lulígla bíme yidge langka.

¹³ Ruutum bí miram ami kísape, mimak ikolo gílenne. Bí leemoem irusula mimak igape erdung. Bí mimak togog em gogbone, delokke bí agínpe miru kídíem ikumne.

Shédíke Ami Kídíem Igul Pébi Suname

¹⁴ Shédí bí sipe podung: Deddína longeko ngo asoope ila, ami kídíem agom-aang lurík sumato. Idola supak okii kina mime kísa, ulo jérlenla agom lulen dung.

¹⁵ Ngo dííte-díítum kídíem bénla, deke delokke moonam kídíem rukyin moyé. Ngo asi korong bitkoem, yépol amongpe imola, paatang kídí takamem oojin moyé.

¹⁶ Migmana kídíke kénkímangko, bedalok ngo bulum gíboyé. Buluke kerang-keralo, kaamuem angunpe ngo ige bola, delokke kobung-korung amongem gípo dope iboyé. Sikesi ngokke iyé emla toge suname, delokke ngo dekedem iram mape iyé.

¹⁷ Idola séko bulu, murti mimangem míngkesula, bulume, “Nolu ngoluke uyue,” emla luyédí, deke ami kídíde, yagorupe annying paala, dumponge ngemgípyé.

Israelke Migmaname Delokke Ruubéname

¹⁸ Tattola ruubéna nolu, kaatola migmana nolu.

¹⁹ Séko ngokke béérang lokke kísa migmadun, demangkom ngokke lulígnam kotoki kísa ruubédun? Ngokkíng tolík suna kísa sékoda migmadun, Ruutum me agér ibina kísa sékoda migmadun?

²⁰ Nolu deddína atoem kaato, idola mome-yoyéng ineke. Noluke nyorunge ayaa dung, idola nolu tatkén mang.

²¹ Ruutum bí agíke deenam legape, agíke ayonem angun-abé mola, gai-gakongpe imokolo erdung.

²² Idola si ami kídar si, doppyola, lííla bulu arung aralo menyok nameke, demangkom patek aralo rumnyok nameke. Bulume lííla, ipítna kamang, bulume líínam atope ila, “Bulum gímo toku,” emna kote kamang.

²³ Noluke aralo sékoda sime tatyén? Demangkom yéku penam longelo, aipe tatyé kudí?

²⁴ Sékoda Jakob me líínam atokope imoton? Delokke Israel me língkengpe imoton? Ngoluke paab ila mirolpe, inam Ruutum bí imanía? Kapeila bulu bíkke bedang lok gímato, delokke bíkke ayonem igemato.

²⁵ Depeila bíkke aklíng emedem, buluke teyolo gulík moto, delokke atírumana mimagem ruulíkto. Dekede eme meyope bulum gyanggo bomto, idola bulu kénsumato. Dekede bulum gubomto, idola bulu aapí-aanglo kigemato.