ISAIAH 37 - DEENA BAIBÉL (BSI)

Jirusalemem Ipítpenamem Porung Biname

¹ Edílo legang kídí sime Hejekiah rojabí tattodí, delo bí ankílok egem bétsula, ankí-gasorem gela Ruutum ke Kumkeng Ekumlo gíto.

² Delo bí, roja ekumem kaabomna Eliakim melang kebang atgebona Shebna, delokke miri ruutum kídíem ankí-gasorem geyin moge yéla kaalu miri Amojke oo Isaiah kíng lulígto.

³ Bulu bíme Hejekiah bí sipe podung emla lukan bito. “Siloke longe si, okii kila koo oramna mime kísa ngolu takam ke legape gomké luko sula, adír runa, delokke annying runam longe kope ikai.

⁴ Assiria rojabí agíke maglíng ruutumem melígla, Ruutum nokke Shédí me lupu-lulé along pakto. Ruutum nokke Shédí bí dekena lupu-lulé em tatla, dekepe luna bím edo rape aido. Depeila dungkína anyong legape Shédí kíng kumbi langka.”

⁵ Hejekiah rojake agomem Isaiah edílo tattodí,

⁶ bí bulum sipe poto, “Ruutum bí sipe podung, ‘Assiria rojake maglíng ruutumke ngome lupu-lulénam, noluke tatnam agom kídí legape nolu pesomapeka.

⁷ Tattola, bíkke teyolo aidko ngo ruulíkyé. Edílo bí legí-sigang eke tatyédí, delo bí agí amongpe enyéku. Delo ngo bíme yoksalok paka moyé.’ ”

Assiria Rojake Lennyinape Lurídname

⁸ Edílo Assiria roje Lakhish lok gílen langkula, Libnah doolungem mimak imín sudung emla maglíng ruutumde kéntodí, delo bí delok gílen langkula roja dem lurík sudokupe gítoku.

⁹ Sudan among lokke roja Tirhakah bí Ijipt kídíke maglíngem gíbola Assiria eme mimak imín supe saadak emnamem Sennaserib bí tatto. Edílo bí dem tattodí, delo bí Hejekiah kíng kotoki ko sim agom kídar sim ludokupe lulígto:

¹⁰ “Judah ke roja Hejekiah me sim agom sim polangka: ‘Assiriake alag aralo melík mayé,’ emla nolum yadna, noluke uyu delo nolu míída sumapeka.

¹¹ Assiria rojake mimak iabomla deddína among yétaem nyokpak monamem nolu tatdurung. Nolu deke delok ipí suyénía?

¹² Ngokke abu buku kídíe Gojan, Haran, Rejeph luune kídíem, delokke Telassarlo duuna Betheden ke ami kídíem petyinla, dekena doolung kídíem nyokyin moto. Deke delokke uyu kídíe bulum ipíttonía?

¹³ Supak ingko loda Hamath ke roje? Ingko loda Arpad kelang Sepharbaim, demangkom Hena, demangkom Ibbah kídíke roja kídíe?”

Hejekiahke Kumname

¹⁴ Kotoki delok Hejekiah bí shiti dem laala porito, delo bí deme bomla Ruutum ke Kumkeng Ekum delo aala, Ruutum ke keralo shiti dem taayala meto.

¹⁵ Depe ipala Hejekiah bí Ruutum me kumsuto:

¹⁶ “E Ralyayalumna Ruutum, Israelke Shédí. Serubim pénsamke palenglo duuna, no petommin tani among yéta takam lokke Shédíe. Nomin taleng emla among sim píne.

¹⁷ E Ruutum, nok agí nyorulok tatbi langka, delokke nok agí amiglok kaasu langka. Turna Shédí nome lupu-luléna Sennaseribke agomem tatlangka.

¹⁸ Deddína among yéta tabungem Assiria roje kuruk aloola, deddína opín-buangem nyokyin mola arope idung.

¹⁹ Buluke uyu kídí takamem emelo romnyok langka, kapeila dekede tani alag lok písunam esing-elíng mimangeke, aro shédí mang.

²⁰ Supak, Ruutum ngoluke Shédía, tani amongke yéta takame, no petommin Shédí bí emla kényindope, ngolum Assiria rojake alag lok mopít yika.”

Hejekiah Kíng Isaiahke Agom Pííname

²¹ Delo Amojke oo Isaiah bí Hejekiah kíng agomko lulígto: “Ruutum Israelke Shédíbí sikepe podung: No Assiria roja Sennaserib ke legangem ngokkíng kumkan sunam legape,

²² bíkke teyolo Ruutum ke kebang lunam agome sipe podung: “E Sennaserib, Jayonke ome kídíe nome míímang, delokke ngilkadung. Jirusalemke ome kídíe nokke duggekunamem, dumponge ngemonla kangkai.

²³ “Sékomemda no lupu-luléla deemang luketdun? Sékoke teyong loda no ugla lula, míngkím lok nok amige kaadu sukan? No Israelke Deena, ngokke mirolpe ikai.

²⁴ “Nokke kotoki teyolok no Ruutum ke teyolo lupu-lulé aloola, ‘Ngokke sanam yimanam guré-gaari lok Lebanonke kedon yalumna dííte kídíem ikumto. Ngo bodoruna sidar esing emlang siinang esingem beeletla, moonam arang loope pííto.

²⁵ “ ‘Ngo mibo amolo asi déérung konggoola, asi tínggoola, ngokke ale ledusok Ijipt lokke korong kídíemte oojin moto,’ emla botte-hane ruupe no agom lukai.”

²⁶ “Ngokke kerapekai míírung-irungla inamem no tatmanía? Supak ngo agér takam dem imodung. Nok teyolo ralnam pauarem ruulíkla, kumgong sunam líísak doolung kídíeme, no nyokmola elíng apom kope imoto.

²⁷ “Dekedelo duuna ami kídíde tolyan sulamape, pesola akén-ayén yimape igeto. Bulu arík lokke améngope garsana ííng kísa, demangkom ekum teyolo íími garna kísa, de pamkiem paala rukkaku.

²⁸ “Idola ngo nokke dungkoem, delokke gídí-aadíem, delokke kape kísa no ngok teyolo mardune, dem kéndung.

²⁹ “No ngok teyolo marnam legape, delokke nokke mííte sunamde ngokke nyorung sokai píínam legape, ngo rakélok nok nyobung delo kéélíkla, delokke nok nappa delo ngo rímo ponlíkla, ingko lokdí no aatone delo nome gílat sudokupe ngo iyé.”

³⁰ Delo Isaiah roja Hejekiah me potoku, “E Hejekiah, nok keralo sim iyod sim lengkan dung. Sinying lang lunnying agí-agíe garsa suna ali-ayém no doyé. Idola toodí tagum nana telo, no ali-aamem ilíkla, onggur anem lela, dola-tíílayéku.

³¹ Judah among lo séko buludí turla yéyéne, bulu lekoda eerípe appír-pírla teyolo ayé éngkuna esing ane kísa iyé.

³² Kapeila Jirusalem lolang Jayon Díítumlo turla yétílna amie kayé, kapeila Ralyayalumna Ruutum ke ername dekedem imoyé.

³³ “Assiria rojake legangem Ruutum bí sikepe podung: ‘Bí so doolung so aamayé, delokke yokmo atel kokom aplík mayé. Tamkung bomna maglíng kídíe doolung anínso aamayé, delokke língkum kumsa bomla imayé.

³⁴ Bí doolung so aamape, ingko bedalok bí aatodí, delok bedang delok bí enyéku. Ruutum ngo polendung.

³⁵ Ngok agísu legapelang ngom agér ibina Dabid ke legape doolung sokke tamtepe ngo dagge bila mopítyé.’ ”

³⁶ Delo Assiria kídíke notko delo Ruutum ke kotoki kone gíla, 185,000 maglíng amiko mokato. Longe kon delokke roh dem edílo ami kídíde gerep todí, delo bulu deddína simangem kaapato.

³⁷ Depe irodem Assiriake roja botte Sennaserib bí notkoem benlangkula Ninebipe enlat sutoku.

³⁸ Longeko, bíkke uyu Nisrok ke kumkeng ekumlo bíkke kumsudungem, Adrammelekh lang Sharejer emnam bíkke oo annyide bíme yoksalok paka geyéla, Ararat amongpe dugnyok geto. Bíkke ayanpe bíkke oo akon Esarhaddon bí roja bottepe iyankai.