ISAIAH 35 - DEENA BAIBÉL (BSI)

Ipítnam Kídíke Ashéname

¹ Yépol amonge lang ereena mooruk amonge ashéyé, kapeila, mooruk amolo appune punlenyé.

² Yépole ashéla miri luyé, kapeila de Lebanon dííte kídí kísa kampo alooyé, delokke Karmel kela Sharonke moone kísayé. Mipil-miyonge Ruutumke angun-abé em, delokke bíkke migang-miram ralnamem kaayinyé.

³ Alag ralmana kídíem ralmoyéku, delokke danna lebíngem edíímoyéku.

⁴ Aapí pesona kídíem sipe polangka, “Edíng langka, peso mapeka. Shédíbí nolum mopít kape aadung, delokke noluke miru teyolo bí edo rayéku.”

⁵ Migmana kídíke amigem kaapa moyéku, delokke ruubéna kídíe tatpayéku.

⁶ Lebyana kídíe ashéng lok paksong sooyé, delokke gommana kídíe ashéng lok goggoyéku. Mooruklo koronge biilenyé, delokke yépol amonglo roojik kídíe kayinyé.

⁷ Pamkina sulli kídíde asi paatangpe iyé, delokke erengko amonglo asi sirunge kayinyé. Ménsurung yépomlo iimie lang dolbume, delokke papiras esinge garrep yéku.

⁸ Bene-bepongko kayé, deme “Deenake bedange,” emyé. Deemana amie delok gímayé; bopole edílokom delo gímem aamayé.

⁹ Myomure delo kamayé, delokke abíd monkír-tangkír kídíe delo aamayé. Delo ipítnam petome gíyé.

¹⁰ Delo Ruutum ke mopítnam kídíe, bedang delok enlangkula, miri lula Jayonlo pííyéku. Agínpe duuyarna ashénge, buluke dumluppe iyaryé, yagorupe ashéname bulume ilum bomla, ankí-adíre, agínpe nyokyaryé.