ISAIAH 32 - DEENA BAIBÉL (BSI)

Deenampe Yéna Rojae

¹ Kaatola, deenampe yéna rojako, rojape iyé, delokke kebang ruutum kídíete pénsam aapí lok agérem iboyé.

² Mipil-miyongde asar lok daksik sugekope, delokke gumnam lok rusi sugekope iyé.Bulu mipilde yépollo asi korong kísa, delokke ereela pamkiko among lokke bottena líídung-lííreng lok ugyum kísape iyé.

³ Buluke amig kídíe lang nyorung kídíe ankí-kenona ami kídíke agom-aangem tatbiyé.

⁴ Buluke aapí-aangde akat-amat imape remella, gommangnete kénnamlok, deenampe delokke jonnampe agomem poyé.

⁵ Bopolem gaido emla, delokke mitu-huarem airune emla sékote luyimayé.

⁶ Bopol amide agínpe loorímana, atímana séguem míítíla, agom-aang emte lutíla, utepooro kana agérlo imape Ruutum ke keralo luka-yadkala, kenonem donam bimape delokke tíílínem asi sunmape yédung.

⁷ Mili-hodong amide atímane, delokke atímana agér mílílo itídung. Dekena amide opan kídíem lukupla menam lok, opan kídíke paapenamem ato kídíemte itumdung.

⁸ Idola ami arode ai-kampope agér-anam tabungem ila, aina ségu legape dagge biyé.

Jirusalemke Mime Kídíe

⁹ Ashéng-angampe yéla dug-adír pangkímana mime nolu, ngokke agom ponamem tatlangka.

¹⁰ Supakke noluke aipe yénamde, dugrík anyongko yérongem, nolu adír paayéku; kapeila nolu onggur ayé pílyimayé.

¹¹ Nolu asar alope, adír kamape yédung. Idola supak pesolok danlangka. Noluke egeme bétsula, ankí-gasorem ugílo gin-ge langka.

¹² Gaina onggur baari legapelang, ardana arík legape noluke angkeng kídíeme ankílok kítsutola, kapeila de takamde nyokyé.

¹³ Delok ayanpe tang gena esing kídíe among so garrep yinyé. Ashéng-angampe yéna kídí keepelang gairupe erapna doolung legape kaplangka.

¹⁴ Líísak ekum kídíde kumrukpe ila, adud-ayudna doolungde, byakrukna doolungpe ila, kaabomnake kangkeng ekum kídarde yénam legape nyokyaryé. Deke delo mér elang sobén kídíe dotala yégoyéku.

¹⁵ Longeko, Shédíke Aide nolukíng toklangkula, moorukde moone aríkpe, delokke arík kídarde ali-ayéme airupe arda moyéku.

¹⁶ Asi among takam delo deename lang jonna ségue kayinyé.

¹⁷ Deenampe yékunamde atí pesorían kamape yéname, delokke jonna ségude aapí eetetpe yékuname. Dekede agínpe kayaryéku.

¹⁸ Shédíke ami kídíe aapí eetetrupe, edíí-míídísula, ebín-ebon atí kamape agí ekumlo duuyinyé.

¹⁹ Tapíe moonamem gekyak dokom, doolungem gejét aabom dokom,

²⁰ arík kídílo asie kala, ali-aamem aiyope ilíkla, delokke simon-sili kídíe eetetpe, dota-tííta goola, yégodope asi-asare deebín yéku. Mipil-miyongpe ashéng-angamla yéyéku.