ISAIAH 22 - DEENA BAIBÉL (BSI)

Jirusalem Legape Kaalunam Agome

¹ Si Immang Yiibe legape kaalu agome. Nolu takame ekum míílongpe géésang gedope, ingkona ebín koda kakane?

² Doolung takam si telok-belokkai ngomdud-ngomyude taleng saabom sukai. Noluke ami sina kídíde yoksalok demangkom mimaklo simang.

³ Noluke ruutum kídare dugnyok geyintuai, idola yokmo atel kote aplenmape bulum umyintung.

⁴ Depeila supak ngome ebín-eson iyimapeka. Nyokna kídí legape ngome ulo gogla kapmo langka. Ngome ngiina kamapeka.

⁵ Ralyayalumna Ruutum Shédíke ruubinam si longe kídar si, ngolum ikumdíe. Immang Yiibelo akén-ayén yimape, peso-ríanla duggong gela idíe. Si longe si doolung yabgoem bénla ami kídar lokke ulo gogdude dííte teloope saadíe.

⁶ Elam lokke maglíng kídíe iyyi epugem gela, guré gaarilok píídak. Kir among lokke maglíng kídíe tamteme leemo lenkai.

⁷ Judah lok mííbanam yiibe kídar delo guré gaarie bíísétkai; delokke doolung yabgo eyab kídí delo gurélo duuna sipaying kídíe daga bomkai.

⁸ Judahke tolyan sunana takamde benyinkai. Delo longe delo nolu moonam ekumlo rumnyoknam mimak ekurang kídíem kaatoka.

⁹ Delo nolu, Dabidke doolung delokke yapgoem bojéko béndope kaato. Delo nolu rumkíng paatang delo asiem ikumto.

¹⁰ Delo nolu ekum kídíem bénla, yapgoem isi-simodope agérem Jirusalemlo ito.

¹¹ Nolu yapgo annyi pénsamlo, aku paatangke asi legape asi téngkiko píto. Idola legí-sigang tabungem kerapekai míírung gena Shédíme, ato-siro takamem pílenna bíme mínggemato, delokke matamato.

¹² Delo longe delo Ruutum Maglíngke Shédí bí nolume amíllo ankí gasorem gela, dumídem ngíkutla, kapla-rííla ilangka emto.

¹³ Idola nolu yagorupe ashéla, ngilla, rubo emlang mér kídíem pala doman dola, apong tííla, sipe embosuto, “Kaju ngolu dola-tíílaju, kapeila nyampo ngolu siyéku.”

¹⁴ Maglíngke Ruutum bí lengkansula ngok nyorung tatkolo sipe podo, “Noluke simang tete deloope sim paab sim edílokom asampe mepakmayé. Ngo Ralyayalumna Ruutum Shédí podung.”

Shebname Lutorname

¹⁵ Ralyayalumna Ruutum Shédí bí ngom sipe lulígdo, “Roja ekum lokke kaabomnape ina Shebna kíng gíla sipe lutorlangka:

¹⁶ No kape idunada? Dííte lííreng lok ago arungko nok agísu legape koolen dope sékoda nome elíktun?

¹⁷ No miramna amipe idagakom ansutola. Ruutum bí nome umla elpakyé.

¹⁸ Bí nome putbol kísa píríl dope tídpala, botteyana among yéta kolo elpakyé. Delo no, nokke míngkím subomnam guré gaari abelo siyé. Kapeila nokke ekum ruutum keralo no loorímangkai.

¹⁹ Ruutum bí nome, agér yépom delok laalenla, nokke mite-migom bedang delok laabínyé.

²⁰ Dekepe ido longe delo, Hilkiake oo, ngom agér ibina Eliakim me ngo tomyé.

²¹ Ngo nokke egeme bíkkíng ilíkla, nokke uug gin-genam demte taala bíkkíng ginlíkla, nokke ruutum yégebomnam dem bíme biyé. Delo bí Judah kelang Jirusalemlo duuna kídíke legape abupe iyé.

²² Dabidke ekum lokke sabiem ngo bím biyé. Bíkke iyanam dem sékote itum lamayé; delokke bíkke itumnam dem sékote iya lamayé.

²³ Ngo bíme edíírupe kili pítlíknam kísa edíímoyé, delokke bí edung-erang tabungke legape amín kagebona leríngpe iyé.

²⁴ Bíkke edung-erang tabungke angun-abée bíkkíng bíídasuyé. Oten ome-oo loope egug dama kídarem petkélo tukeng sunam kísa bíkkíng tukeng suyé.

²⁵ Maglíngke Ruutum bí podung, delo longe delo edíírupe pítlíknam kilide elulenyé. De elu aloola oletyé, delokke delo tuda sulíknam takam delokke yéyindípe, de longede iyé.”