Biblia Todo Logo
Bìoball air-loidhne

- Sanasan -

ISAIAH 21 - DEENA BAIBÉL (BSI)


Babilonke Nyokkupenamem Kaaluname

1 Siyéng lokke robelo duuna yépol among legape kaalunam agome. Sokko danke among lok meyat yatsabomnam kísa, reyubko yépol-mooruk among lok mirue mimak iabomyé.

2 Ngo yatkup-pakup bomsula, rotmín bosula inam kaarí-kaanyo pesorunamko kaato. Elam maglínge mimak iabomla, Media maglínge gargo bomla; Shédíbí Babilonke adír ilíknam tabungem kamo yimayé.

3 Sim kaarí-kaanyo sime kaala-tatla, ngok amíl-amoe yagorupe kila, mime lokke okii kinam kísa kikai.

4 Ngo pesolok danla, tukkuete ngekai. Adengem ngo mííbomto, idola de pakyape pesorían mokai.

5 Kaarí-kaanyo delo kaaname, donameke irutung. Duupeko epuem putung. Maglíng ruutumkídíde dola- tííla ido. Depe ido pagem agomko lulígkai, “Migom kídar, menape noluke tamkungem irung lento!”

6 Delo ngome Ruutum bí sikepe poto, “Menape lamkang duunako dukkang moto. Depe ipala bíkke kaanamem pokan motoku.

7 Bí dugbomna amiem, gurélo pumsupe dugbomdope, gado kídí emlang uut simon kídíem dugbomdola aadope kaayémílo bí bulum kanggappe aiyé.”

8 Delo lamkang dagnade gogkai, “Ngok ruutuma, longe-yohpe ngo, ngokke dagpomlo dagtídung.

9 Delokke kaatola, sina dugbomna kídíe, pumsupe gurélo duula aadakne!” Lamkang dagnade lubikai, “Babilon bí oletkai, oletkai; buluke kumtí bomnam mimang kídíe amonglo dírmíkla dooyinkai.”

10 E ngok Israel ami kídía, gehuem yiknam kísa inam kídía, Ralya yalumna Ruutum Israelke Shédí kelok, ngokke tatnamem nolum ngo popa bidung.


Edomke Legape Kaalunam Agome

11 Si Edom legape kaalunam agome. Seir lok ngome amiko gogdo, “E lamkang dagna ami, edítko yoe kadung adan? Edíloi iyin yéne?”

12 Ngo poyansuto, “Roe píídakbong. Idola yoh ekom pííyéku. No íngkíkupe míídumílo, lekoda aalat sulangkula íngkí langkuka.”


Arabiake Legape Kaalunam Agome

13 Si Arabiake legape kaalunam agome. Arabiake mooruk amolo tombu sola notko ina Dedanke ami kídía;

14 tíílína kídíem asi bitola; Temalo duuna ami kídía, mibo minnompe aana kídíem donamem biríktola.

15 Kapeila pakapena yoksa loklang bulum apkapena iyyi epuklok, delokke midu-mimaklok bulu duknyok anggedung.

16 Ruutum bí ngome sipe poto, “Moodíem isap ibosula agér gérbosuna kísape, dítak atel aralo Kedar ami kídíke angun-abé kídíe nyokyé.

17 Buluke ara lokke miram yalumna, iyyi epuk apjina kídí aralok anyongko amie turyé. Ruutum Israelke Shédí ngo sipe podung.”

Adi (Re-edited) Bible - Deena Baibél

Copyright © Bible Society of India, 2012.

Used by permission. All rights reserved worldwide.

Bible Society of India
Lean sinn:



Sanasan