ISAIAH 19 - DEENA BAIBÉL (BSI)

Shédíbí Ijiptem Irééyéku

¹ Si Ijipt teyolo ponam legangko: Kaatola, doomug lok menarupe Ijipt amolo Ruutum bí aadak. Ijipt among lokke uyu mimang kídíe bíme pesola dan-gekai, delokke ami kídíke aapí-aangete pesolok aide poggekai.

² Ruutum bí podung, “Ngo Ijipt ami kídí aralo akmín sumoyé. Bíro kumsuem miru teerepe, delokke kumríem miru teerepe imola, sikesok teyolo doolung yéta daadi tabungke aralo rolmín surepmoyé.

³ Ngo Ijipt ami kídí lokke míírung namem ipíng momayé, delokke aapíem amémoyé. Buluke uyu kanem bulu íngkí sukolo gíyé, delokke urom tomna lok bulu poyilem matayé.

⁴ Ngo Ijipt ami kídíem itung-iréla yébopena rojako ruulenyé. Sikepe Ralyayalumna Ruutum ngo podung.”

⁵ Nayil korongke asie oola, asi tokkoe ereeyé.

⁶ Ijipt lokke roojik-roorik takame ooyinla ereepe iyinyé. Dolbum, tapii kídíe rukyinyé,

⁷ delokke Nayil korongke robenglo arík ilíknam tabungde ereelok deemulpe ila gyangkutyé.

⁸ Korong delo gakar ila, porang ila, delokke esap kuula ina kídíe adírla kapla-rííla iyé, kapeila buluke ekurang kídíde agér kaimayé.

⁹ Kamporupe morí-mojokna ege ina kídíe adíryé; lainen ege sumna ami kídí lokke míínam suname nyokyé.

¹⁰ Ege sumkolo agér ina kídíelang ire sugona kídí takame agér kaimala, buluke aange kiyé.

¹¹ Joan doolungke ruutum kídíde bopoleke! Pharaohke mite-migom kídíde tukku-pinnyo kamape luyil-poyil neke. Kape kísa bulu Pharaoh me, “Ngolu kénna-paana amie, delokke konnyi-mennyingke kénna miku kídí kela roja kídíke kénnamem yégedung,” emlayén?

¹² Supak ingkoloda noluke kénna ami kídíe? Ralyayalumna Ruutum bí Ijipt legape ingkona atoko ipe míídudí, deme bulu lengkanla amiem kénmo kíto.

¹³ Joan lokke lang Memphis lokke ruutum kídíde bopolpe ikai, Memphis lokke yégebona kídare yatkosukai. Ijipt ke aane gaang kídíe yémem bokai.

¹⁴ Ruutum bí buluke teyolo ngego sumona aidko ruulíkto. Depeila bulu agér takamlo tíngír-dobatsula, abat batpomlo ipyamna ami kísa loorímangkai.

¹⁵ Ijipt lokke ami kídarde mirem dokom, opan dokom, gai-gakona ami dokom, delokke kénma-paamanam ami dokom, atí igul lana kaimang.

Ijipte Ruutum me Kumsuyéku

¹⁶ Ijipt ami kídíe mime kídí kísape aapí amédí longeko píídak. Ruutumke iréépe emla alage leedung sunamem bulu kaasula pesorían geyé.

¹⁷ Judah ami kídíe Ijipt amonglo pesoríanem bomayé. Delo longe delo Ralyayalumna Ruutumke Ijipt ami mirupe ikolok, Ijipt lokke mipil-miyonge Judah amínem tatyém yagorupe pesogeyé.

¹⁸ Delo longe delo Ijipt lokke doolung pilngoe Kanaan agomem pola Ralyayalumna Ruutum kíng lekope idokupe pésuyé. Deke delokke doolung akon amínem Doonyi Doolung emla mínyé.

¹⁹ Delo longe delo Ijipt amongke rísu delo Ruutumke legape líídung merom iyodko ilíkyé, delokke among raadang delo bíkkepe deena rungguko pílíkyé.

²⁰ Dekede, Ijipt amolo Ralyayalumna Ruutumke legape iyod kopelang hakii binakope iyé. Edílo delo duuna ami kídíem iré kolok bulu kapgu-rogu suyédí, delo buluke legape ipítna, delokke igulna amiko bí melík biyé.

²¹ Ijipt ami keralo Ruutum bí kénkosula, delo longe delo bulu Ruutum me kangkénla míngkesuyé. Delo bulu bíme ipak ibila, ali-ayé amanem boma bila, Ruutum kíng pésula, agíke agom supe yégapsuyé.

²² Ruutum bí Ijipt kídíem kilii-ramlilok ruulíkpala, bulum lekoda ipíyéku. Bulu Ruutum kíng aapí míílat suyéku, delo buluke rogunamem tatbila bí bulum ipí biyéku.

²³ Delo longe delo Ijipt lokke ila Assiria loope bene-bedangko kayé. Ijipt ela Assiria pénsamlo gípé-gíré bosula iyé, delokke Ijipt ela Assiriae lekope kumbosuyé.

²⁴ Delo longe delo Ijipt, delokke Assiria banggo annyi delo, Israele banggo angumnape ila, tani among legape utepooro kakepe bulu iyé.

²⁵ Delo Ralyayalumna Ruutum bí buluke teyolo utepooro ruulíkdola sipe emlíkyé, “Ngokke ami Ijipt nokke teyolo, ngokke pílen sunam Assiria nokke teyolo, delokke ngokke ami supe ullen sunam Israel nokke teyolo ngo utepooroem ruulíkyé.”