ISAIAH 17 - DEENA BAIBÉL (BSI)

Shédíbí Siria Emla Israelem Itung-iréyéku

¹ Ruutum bí podung, “Damaskas bí doolung kope iyimayé. Delok ayanpe kumrukpe ilangkula nyokyéku.

² Siriake doolung kídíde kaimayé. Dekede mér, delokke abíd simon-sili yépompe iyéku. Delokke bulum sékote goopak kuna kamayé.

³ Damaskaske sadínpe yéname nyokyé, delokke Israelem sékote igulna kamayé. Turkína Siria ami kídíde Israel kísa iyé. Sikepe Ralyayalumna Ruutum ngo polendung.”

⁴ Ruutum bí podung, “Israelke mite-mirem elang angun-abée nyokla aré-anyo idí longeko píídak.

⁵ Delo longe delo arík irukko Rephaim yiibe kísa, ali-ayém ikut-ilutla itonam, araape dungkuna arík kísa Israelke legí-sigang kídíde iyéku.

⁶ Ami anyongoko turla duuyé, delokke Israele, petom annyi-angumko teyong yalumlo, demangkom rumkíng aag kídílo anyongoko megeyéla takamem pílkut-píllutnam olib esing kísape iyé. Sikepe Ralyayalumna Ruutum ngo polendung.”

⁷ Edílo de longede pííyédí, delo ami kídíe Pílen-ruulenna Israelke deena Shédí kíng aapí míílat suyéku.

⁸ Delo longe delo bulu agíke alag lok molen sunam runggu kídílo, Asherah uyu mimeke mimang kídílo ipak ila, arí namponem nyotlíkla, deke delo míngkesula iyimayé.

⁹ Delo longe delo, Israel kídí keralok agíke doolung kídíem byakruk gela igena Hibit kelang Amorit ami kídíke doolung kídí kísape, supakke gairupe duubomnam doolung kídí dekom iyéku.

¹⁰ Dííte lííreng kísape Israel nolum agínpe edííbona, nolum ipítna Shédíme nolu mitpansukai. Delok ayanpe mibo-miying uyuem kumsudope, nolu uyu yékeng esing kídíem arík kísa isang bomkai.

¹¹ Idokom kaatoka! De esing kídíde siisala appun pundokom, delok nolu ali-ayé ato paamayé. Delok ayanpe ipít yilamanam kilii-ramliem, delokke adírem nolu paatíyé.

Miruem Ikumname

¹² Migang-miramna opín kídíe siyéng lokke muudud kísa, delokke kaala yimanam sipar taadud kísa, buluke ngomdud ngomyude idung.

¹³ Bulu bottepe sipar taabomna kísa aabomdung. Idola bulum Shédí bí lula, bulu etpang lokke pemuk kísa, delokke asar lokke meyat yatyém nyosuk-nyoruge gyanggonam kísa duknyok gedungku.

¹⁴ Yume me bulu pesorían modung, idola roeme bulu kaimang. Ngoluke asi-among teyolo língana amie sikepe ajéngem paadung.