ISAIAH 16 - DEENA BAIBÉL (BSI)

Moabke Loorírumana Longe

¹ Moab ami kídí nolu, yépol mooruklo duuna Sela doolung lok mér oo ko amanpe Jirusalemke Ruutum kíng bidung.

² Asuplok ipak lennam pettang kísa, Moab kídíde madu-matok sula Arnon korong robelo idung.

³ Bulu Judah ami kídíem sipe emdung, “Ngolum kebang lubiyika. Longe raadang lo, yoh kísa idope nokke abír-ayoem ilík yika. Ngolu mibo minnompe aadung. Sékote kaape mangkolo rumnyoktoika.

⁴ Noluke amonglo ngolum duumola, nyokmopena bíkke lok ngolum mopít yika.” (Irédí longe lang nyokdí longe, longeko kaimayé. Atírumape ina kídíde longeko kaimayé.

⁵ Ayanglok Dabidke otíng kone longeko rojape ila, ami kídíem míngkeng edíílok yéboyéku. Bí menape aina kelíng-kebangem ibola pénsam-raadang bedalok gíboyéku.)

⁶ Judahke ami kídíe sipe ludung, “Moab ami kídare míngkímsula, botte-hanerupe lusula ineke emla ngolu tatdung. Idola buluke gai-gakongpe lusunam kídíde asare.”

⁷ Moab ami kídíde buluke ankí-adírem paala kapyéku. Kir Heres doolunglo dopo-tíípope donamem míípa sulangkula ríítí geyéku.

⁸ Opín kídíem tíngír sudope apong ilenko, Heshbon keela Sibmahke onggur ríkséng deddínem nyokmoyéku. Dekena onggur ríkséng de Jajer doolung loope kala, delokke sanggodanke mooruk among loope kalíkla, Sina Siyéng kékonlo duuna anggodan among loope kalíktuai.

⁹ Ngo Jajér ke legape kapekísa kapbidudí, dekepe Sibmahke onggur arík legapekom kapbidung. Ngo Heshbon kelang Elealeh ke peteng kapdung, kapeila ami kídíem ashémodope arík ilayimayé.

¹⁰ Gaina arík kalate sékokom ashémang. Onggur ríkséng kídí lote adud-ayud kaimang, sékote onggur alangem apongpe kétyimang. Kapeila buluke ashéng ngomdudem ngo kaimadope ito.

¹¹ Ngo Moab legape ankí kíbidung. Delokke Kir Heres legape pengé ngébidung.

¹² Moab ami kídíe díítum teyolok kumsu supom kídílo, delokke kumkeng ekum kídílo kumtí saala ledír-gídír sukabong, idola dekede bulum atí agér bimayé.

¹³ Kerayape sim agom sim Moab legape Ruutum bí potuai.

¹⁴ Supak Ruutum bí sipe podungku, “Toodí tagumlo Moabke ekuserange nyokyinyé. Buluke miti-maglíng aralok sankípenam petomko turla duuyé, idola bulu misi-mimala yéyinyé.”