ISAIAH 15 - DEENA BAIBÉL (BSI)

Shédíbí Moabem Nyokmoyéku

¹ Moab kídí legape kaalunam agome. Yoh atello Ar elang Kir luune nyokkai, depeila Moab amongde adud-ayud kamang.

² Dibonke ami kídíe díítumlo resaala kedonko kumpomlo pengé lukape gíkai. Moab kídíe ankí-kenolok nammíd emla dumídem ngíkut sula Nebo kelang Medeba doolung legape kapla-rííla ikai.

³ Bedang lokke ami kídíe ankí gasorem gela, doolung raadang gíídanglo, delokke ekum teyolo kapla-rííla igongkai.

⁴ Heshbon doolung kela Elealeh ke amie yagorupe kapla-rííla ikai. Buluke kapdudem mootelo duuna Jahaj doolung loope tatpangkai. Buluke sipaying kídíete pesolok aapíe amé gekai.

⁵ Ngok aapí si Moab legape kapbidung! Ami kídíe Joar doolunglo, Eglath Shelishiahlo dugyin gekai. Ayokone kapla-rííla Luhithpe sanggekai, delokke ayokone yagorupe ankí-dukla Horonaimpe dugpí sugekai.

⁶ Nimrimke roojik de asi kaimape oojinla, robeng lokke nesi-neyang kídíe sanyinkai; depeila delo yayina ato kaimang.

⁷ Ami kídíe agí-agíke mekumnam ekuserangem bomla, poplar esing kako yiibe lok gínyok lenkai.

⁸ Moab ke rísu miyonglo kapnam-ríínam adudem tatpangkai. Dem adud kídídem Eglaim lolang Beerelim doolung lote tatpangkai.

⁹ Dibon doolungke korongde iyyipe língkai, delok teyolote dekedem looríyamana atoem, Shédíbí irutung. Arorupe Moablo yétílna ami kídíem reyubruupe paka-níkkadí longe píngkai.