ISAIAH 10 - DEENA BAIBÉL (BSI)

¹ Nolu reyubrupe adírem paayéku! Nolu jonmana ayonem mola, ngok ami kídíem ipusiléé dung.

² Dekepe ila nolu opanke paape namem itumla, jonna kebangem baabimang. Sikepe nolu meyéngem irééla, ane-abu kaimana ome-oo kídíke ekuserangem nolu rotkamdung.

³ Edílo Shédíbí nolum itung-iré yékudí, delo nolu kape iyén? Mibo amolok miruem edílo bí langaala, nolum ibomyédí, delo nolu kape iyén? Ingkoloda nolu duknyok geyén? Ingkoloda noluke ekuserangem leesiyén?

⁴ Nolum midu-mimaklo mokayé, demangkom abílpe bomyéku. Dekepe ilate Ruutumke aklíde kadan tete bomla, bík alage itung-irépe leedu tete bomyé.

Assiria Kídíke Roja Legange

⁵ Ruutum bí poto, “E Assiria kídía, ngokke aklí bomnam opínbuang teyolo siidíng-simakpe imonamía!

⁶ Ngokke aklí bomnam, Shédíme kénmana opín kídílo mimakpe iya bomla, ato-siroem rotla, lííla bedang lokke yuupyangem tujétnam kísape ami kídíem imodope ruulíknam amie nolu.”

⁷ Idola Assiria rojake aapí-aange milí-sodope mííla deddína opín-buangem nyokyinmope míngkai.

⁸ Bí míngkímsula ludung, “Ngokke maglíng ruutum tabungde rojasue!

⁹ Ngo Kalno, Karkhemish, Hamath, delokke Arpad kídí lokke luune kídíem ikum kumyinto. Samari melang Damaskas memte ngo ikumto.

¹⁰ Jirusalem lolang Samarilo edítko mimang kadudí, dem pemílo pakyana mimang kala kumsuko amongem ngok alage bodola itung-iréto.

¹¹ Ngo kapekísa Samari melang bíkke mimang kídíem ingéétodí, dekepe Jirusalem emlang delo kumsunam mimang kídí demteng ingééyé.”

¹² Idola Ruutum bí podung, “Edílo ngo Jayon díítum emlang Jirusalemke teyolo ngok ipenamem iyin yédí, delokrodem Assiriake rojame, delokke bíkke míngkím-lukím sunamdem ingééyéku.”

¹³ Kapeila Assiria rojabí sikepe lukím sudung, “Ngok agíke alag ralnam sulok sike takam sim ito. Ngo raldung, gyan kadung, delokke ségu kadung. Ngo opín kídí lokke among rísu kídíem ngo ibínla, buluke arem-tadogem língkut bito. Delo duuna ami kídíem ngo rubo kísape ila tujémto.

¹⁴ Taleng kuppo sokke ami kídar de pettang asup kísa, delokke ngo apíem laadum sunam kísape, opín takamke ekuserangem laadumsuto. Ingkona alabekom ngom mogépe taabom mato; delokke ingkona nappange kom kokala ulo gogbom mato!”

¹⁵ Idola Ruutum bí podung, “Egíngem bomna ami dempemílo egíng de botteyane emla lula suyén? Korotde bím bomna amidem pemílo botte yayénía? Banggénde agísue leerep sumang, ami konemin bím leerep dune.”

¹⁶ Dongel-tíngel suna kídí delo Ralyayalumna Ruutum bí kilii-ramliem melígyé. Buluke gairupe séduk alooduem ememe rílíkla de meyo bottepe irepyé.

¹⁷ Israelke Angun bí emepe iyé. Israelke deena Shédíbí meyo kope ila, longe atello bík tang kana pasum-parum takamem gukutyé.

¹⁸ Atírumape ina kiname kapekísa kina amidem simodudí, delok kísa Assiriake gai-gakona moonam kídí emlang arík kídíem nyokmoyéku.

¹⁹ Esing kídíe atel annyi petomko idope, moonam kídídem nyokmoyé; deme koo aménete kílayé.

Israelke Ami Anyongoko Aalatsuyéku

²⁰ Longeko píídak, delo longe delo turkína Israel ami kídíe, bulum nyokyindope ina opín delo míída suyimayé. Delok ayanpe bulu Ruutum, Israelke deena Shédíkíng míídasuyéku.

²¹ Israel ami kídí lokke ami anyongoko miramna Shédí kíng aalat suyéku.

²² Supage siyéng asi robelok siiyé yépol kísa Israel amie kaduakom, anyongo komin amie aalat suyékune. Nyokmo pename ami kídí kepe kumsunglo kadung, delokke dem bulu paabang aloodung.

²³ Kapeila Ruutum, Ralyayalumna Ruutumbí agíke agom supe among takam so nyokmonamem langaayé.

Assiriaem Itung-iréyé

²⁴ Dekepeila Ruutum, Ralyayalumna Ruutumbí podung, “Jayonlo duuna ngok ami kídía, Ijipt lokke ami kídíe nolum kapekísa atung-aréé dope ituadí deke kísape nolum Assiria kídíe idagakom nolu pesomapeka.

²⁵ Menape noluke teyolo ngok marname gíyinyé, delo ngok aklínge buluke teyolo kala bulum nyokmoyéku.

²⁶ Oreb Líírelo kapekísa Midian ami kídíem Ralyayalumna Ruutumbí demngéétodí, delok kísape ngok sabuk lok bulume demngééyé. Kapekísa Ijipt amiem itung-irétodí, dekepe Assiria emte ingééyéku.

²⁷ Edílo de longede pííyédí, delo noluke gordulo tebekpe joobomnam egetde kaimayé. Kapeila Assiria kídíke jungolide dírla, noluke gordulok oletyé.”

Miru Aabomname

²⁸ Miru maglínge Aiath luune me laabomkai! Migron lok bulu gíbongkai! Buluke dope-tíípenamem Mikmashlo mesutung!

²⁹ Bulu yorbeme boola yume dem Gebalo notko ikai! Ramah doolung lok ami kídarde yagorupe pesokai, delokke Saul rojake Gibeah doolungde duknyok gekai.

³⁰ Gallim ami kídía, ulo gogtola! Laishah ami kídía, tattola! Anathoth ami kídía, luyan sutola!

³¹ Madmenah amie lang Gebim ami kídíe agíem dugpí supe duggedung.

³² Silo mirue Nob doolung lo píídung, delokke delo bulu, buluke alagem Jayon Díítum pelang Jirusalempe laktum subomdung.

³³ Ralyayalum Ruutum bí, esing aagem patuyém, agí ogíla oletnam kísa bulum olet moyéku. Botte-hanerupe míngkímsuna kídídem ijém-hayémyéku.

³⁴ Moonam aralokke esingem kapekísa egíng lok beelet dudí, delok kísa Ruutum bí bulume, Lebanon ke gaiyalumna sidar esingem beeletnam kísape beeletyé.