HOSIA 7 - DEENA BAIBÉL (BSI)

¹ “Edí-edílodí ngo, ngokke Israel ami kídíem ipíkupe, delokke bulume lekoda jémo-remmo kupe emla míídudí, delo buluke paab kídí emla milí-hodong agér kídíem petom ngo kaapadung. Bulu akone akonem yatkup-yatlat bosudung; bulu ekum kídíem adaala doppyoodung; bedu-bedalo ami kídíem lííla igoodung.

² Ngo buluke atímana agér takamem mííyar gedung emla bulu kénsumang; idola bulume buluke paab kídíe uulum bomdung, delokke dekedem ngo kaamape ilamang.”

Roja Ekumlo Rukupmínsuname

³ Ruutum bí podung, “Ami kídíe roja emlang bíkke mite-migom kídíem, buluke atímana ségu kídílok rukup bosula yatkup-palatla idung.

⁴ Bulu takam rukupne, delokke mirolpe rolne. Burna ettíng pampomlo, ettíngem pambaadope imadolope, ettíng pamne ankí-sikí ememe idor líkyimanam eme írna kísape idung.

⁵ Roja lokke doman-tííman idolo, bulu rojem lang mite-migom kídíem yagorupe aponglok tíngír dobat-sumola idung.

⁶ Arope, buluke mirupe rukup-ruulat bosunamde eme rompom kísa idung. Yoh rubung dem buluke marname gubumdung, delokke rokomem de meyope buklendung.

⁷ “Buluke marlíng gunamlok buluke ruutum kídíem bulu moka kayin suto. Akon méélamlo akonem ila, bulu roja kídíem petpakyinto, idola sékote iguldope ngome kumna kamang.”

Israel elang Opín-buang Kídíe

⁸ Ruutum bí podung, “Israel lok ami kídar attungkone nyumana burna ettíng kísadung. Buluke dei-degong opín-buang kídílo bulu míída sudung.

⁹ Mibo-miying kídíe buluke ralnamem buuyuk bomdung, idola bulu deme kénsumang. Buluke dumíd kídíe minyin kabong, idola deme bulu kaasumang.

¹⁰ Israelke mikép aapí-aang kídíde bulum agísuem lula hakii bisudung. Idola bulu edílokom Ruutum buluke Shédíme matala bíkkíng aalat sukumang.

¹¹ Israel bí atí ségu kasumana, yattí kosuna perong kísa ila, lekonem Ijiptlo, lekonem Assirialo ití goodung!

¹² Idola buluke gíyém, ngo bulume esaplok kuulumla pettang kídíem umnam kísa umyé. Edílo bulu dumsuyédí, ngo bulum umyé.”

¹³ “Bulu ngome mepak sunam legape bulu yagorupe adír alooyé. Bulu ngokke mirupe ilennam legape, ngo bulume nyokmoyé. Ngo bulume ipítpe míítí dungai, idola bulu ngome yattí berokdung.

¹⁴ Buluke aro aapílok bulu ngokkíng kapla-rííla kumsumang. Idola dekedelok ayanpe bulu mibo-miying kídíke uyu kumsunam akampe ngokkíng idung. Edílo bulu ali-ayé, asi-apong legape dumsula kumsuyédí, delo mibo-miying ami kísa bulu amílem tarí iket sula idung. Bulu mirolpe roldung.

¹⁵ Ngo bulume luyil-poyilla, ralnamem bilate bulu ngok teyolo mirupe rutídung.

¹⁶ Bulu atí pauar kamana uyu mílílo kumtíla, ngokkíng aapí míílat sukumang. Bulu apna kanmana iyyi kísa ineke. Buluke ruutum kídíe gomké-gomo lutínam legape, bulu mimaklo siyinyé, delokke Ijipt ami kídíe bulume ngilkayé.”