HOSIA 6 - DEENA BAIBÉL (BSI)

Ami Kídíke Aro-sirope Aapí Míílat Sukumaname

¹ Ami kídíe sipe podung, “Ruutum kíng ngolu aalat sulang kuju! Bí ngolume adír motung, idokom bí ngolume ipíruyéku; bí ngolume tarí mokettung, idola ngoluke tarí kídíeme bí kampope ngotkap yéku, dekepe bí imayénía?

² Loonyi mangkom longum méélamlo, bí ngolume anípe turmoyéku, delokke ngolu bíkkíng agínpe duuyar mínyéku.

³ Kaju ngolu Ruutum me kénpe mííyar langkuju. Roh doonyi arsang kísa bí ngolukíng aayérung, gédí ponggoke pedonge ola kédéngem asi balnam kísape, bí aayérungku.”

⁴ Idola Ruutum bí podung, “E Israel, delokke Judah! Ngo nonyi kelo ingkoko ibosuyén? Nonyike ngome míínamde menape nyokkuna roh aapam kísa, delokke rokom tangar kísa idung.

⁵ Dekepe ilamin ngo ngokke kaaluna miri kídíem nolukíng, ngokke bisarnam emla nyokmonam agomem podope melíktone. Ngokke mííbom name peebela berok aloodung:

⁶ Ngo noluke taro aman kídíem míímape, noluke ayang ayarnam emmin míídune. Romnam amanem ngome rombidumem pemílo ngokke ami kídíe ngome kénnam dem ngo mííbom dung.

⁷ “Idola Adam among delo bulu aalíkyédem, bulukíng ngokke daapong mobosunamem bulu betto.

⁸ Gilead luunede atírumana ami kídíe lang mokana ami kídíe bíísétdung.

⁹ Línggoola doppyona kídíe amiem asoope tobomnam kísape miri kídíe idung. Shekhem lokke deena among danpe gína bedang loteng bulu moka-níkka agérem gérgoodung. Delokke bulu sikena atímana agér sim iperung mííla idung!

¹⁰ Israello ngo reyub runam atoko kaato: ngokke ami kídíe agísuem uyu kídílo abír-ayo ibosula, deemang ilík sukai.

¹¹ “Delokke nolukepe, E Judah ami kídía, noluke inam kídí legape ngo nolume itung-irédí moodíko irula metung.”