HOSIA 5 - DEENA BAIBÉL (BSI)

Israel Teyolo Kebang Luname

¹ “E miri kídía, sim tatgap langka! Israel lok ami kídía, tadí langka! E roja erang kídar nolu tatgap langka! Nolu deenampe bisarem lupeníai, dekepeila nolukíng bisare aalíkyé! Nolu Mijpahlo etku-edakope, Tabor díítelo donkapna esapkope,

² Akasia luunelo eerína arung kope ito, idola nolum takam ngo itung-iréyé.

³ Israelke legí-sigang takamem ngo kéndung, dekepeila bí ngok keralo rusi sula igelamang. Bí uyulo abír-ayo ibosula deemang alongkai, delokke ngome kumsu baayimangkai.”

Mimang Kumnamem Hosiake Lutorname

⁴ Ami kídarke agér-anam ségu kídíde buluke Shédí kíng míílat sumo kumang. Kapeila buluke mimang kumnam uyue, bulume yagorupe gaggap bomla Ruutum me aroe emla bulu mííyimang.

⁵ Israelke míngkím sude, bulume agíem lusudung. Buluke paab kídíde bulume tupsumola olet modung, delokke bulukelo lekope Judah amiete olet míndung.

⁶ Bulu Ruutum kelo ipak líkpe emla buluke mér kídí emla rubo kídíem bomadung, idola dekede bulum atí aina ato ipaamayé. Bulu bíme paamayé, kapeila bí bulume mepakkai.

⁷ Bulu Ruutum ke keralo arope míngkesula yémang; delokke buluke koo kídíde bíkkemang. Dekepeila supak poolo aníde bulum lang buluke arík kídíem doka kayinyé.

Judah Kelang Israelke Mimak Imínsuname

⁸ Gibeahlo mimak bikul kídíem mutlangka! Ramahlo lomgong sudope gogying langka! Bethaben lo mimak togogem goglík langka! E Benjamin makbiem duklangka!

⁹ Itung-irédí longe píídak, delokke Israelme nyokmoyé. Israel lok ami kídara, si arorupe iyérung!

¹⁰ Ruutum bí podung, “Judah lokke ruutum kídíe Israelem mimak ila, bíkke amongem rotnam legape ngo mardung. Dekepeila puumu kísape ngok marnamem buluke teyolo melíkyé.

¹¹ Israele itung-irénam ankíem kídung. Bíkke agíke among yébom sunamem bí menyok sukai, kapeila bí bíme atí igul lamana kídílo gílat tíkai.

¹² Dekepeila ngo Israel teyolo takíd kísape, delokke Judah teyolo erengna yokyépe ila, bulum dobom yéku.

¹³ “Edílo Israelbí agíke kinamem, delokke Judahbí agíke tarí kídíem kaasutodí, delo Assirialo bottena roja delok igul kope gíto, idola bí buluke kinam demlang tarí kídí deme ipí bilang kumato.

¹⁴ Ngo Israel kela Judahke ami kídíem myomur simyo kísape aabomyé. Ngo agísue bulume tarong-tarope rekpan sula mepakyé. Ngokke bulume sobom yékuem, sékote bulume igul lamayé.

¹⁵ “Ngokke ami kídíe buluke imemnam kídí legape adírem paangésula, ngome matala aadoku loope, ngo bulume mepakyé. Buluke yagorupe adír dulo ngome bulu mata yékupe.”