HOSIA 4 - DEENA BAIBÉL (BSI)

Israelme Lukaaname

¹ Among delo duuna Israel kídí noluke teyolo Ruutum bí lukang penam agom eke kadung. Depeila nolu Ruutum ke agomem tatlangka: “Among delo míngkeng kaimang, ayang kaimang, Shédíme aroe emla mínggena kaimang.

² Deke delok ayanpe pémín-lumíne, menam-yatname, pamín-níkmíne, doppyo-tíísie, abír-ayoe, mirolpe rolmín sula yiilí biimín suname bojé momokai.

³ Sike legape asi-amongde rukdung, delokke dungkína ato-siro kídí takame siyin lendung. Simon-sili tabunge, kebung-pettang takame, engo daadiloope nyokyin lendung.”

Miri kídíem Lukaaname

⁴ “Idola sékote akonem lukaabosula, akon teyolo akonem piyyang agom lumín sula imapeka; ngo miri kídar teyolo akdung.

⁵ Longe-yohpe nolu tupsu goola yétídung, delokke kaalu miri kídar dete nolum pemílo gaiyape yémang. Depeila ngo noluke aneme nyokmoyé.

⁶ Angun-abé kénnam kamanam legape ngok ami kídíe nyokyindak. Nolu angun-abé kénnamem mepaknam legape ngokom nolum ngokke miripe iyimadope mepakdung. Noluke Shédíke ayonem nolu mepak kolok, ngokom noluke koo kídíem ngok miripe imoyimayé.

⁷ “Edítko mirie nolu bojéyédí, deddíko ngok teyolo nolu paab idung. Dekepeila ngo noluke angun-abéem annying nampe imoyéku.

⁸ Miri kídí nolu ngok ami kídíke paab kídí lok mirem gela, ami kídíeme paabem bojé momo imolídung.

⁹ Depeila ami kídíke akampe miri kídí nolukom itung-iréem paayéku! Annyi pagem, atímana agér igang edoem ngo rayéku.

¹⁰ Nolu ipak-saamo kídílok noluke tarongem doyé, idola kenoyé. Nolu notii agérlo gértí gooyé, idola ome-oo kamayé. Kapeila nolu ngom mepak geyéla abíd uyueme kumsukai.”

Uyu Kumnamem Lukaaname

¹¹ Ruutum bí ludung, “Aku aponge lang aní aponge ngok ami kídíke míídu-míítok ségu kídíem laanyok dung.

¹² Bulu esing ool konem kénmanamem lengkan bidope kodung! Asék kone bulume buluke kénlínamem pobidung! Notiipe ikuna mime kísape bulu ngome mepakla, bulu abíd uyu kídílo agíem bisukai.

¹³ Bulu díítum teyolo ipak igoola, romnam amanem romlík goodung. Bulu ok esing, poplar esing, delokke terebin esing kídíke rengamna ugyum aralo kumgoola idung! “Depe ikolok noluke ome-oo kídíe notiipe igoola, nyameng kídíe abír-ajon igoola ikai.

¹⁴ Iduakom ngo bulume notii agér ido emla ingéng mayé, kapeila nolu agí ríípange notii agér gérgoola kumsuko lokke notii kídarlo ipak igoobosula yéyindung, delokke dekepe atí kénnam ségu kamana amie nyokyé.

¹⁵ “E Israel nolu abír-ajon idagakom, Judah erangme akampe imem momapeka. Gilgal, demangkom Bethaben kumpomlo gígong mapeka, demangkom deke delo, turna Ruutum ke amín lok pésumapeka.

¹⁶ Israel ami kídíe kossor kídí kísape aapíe toldung. Dekemílo neyi-neyang kakolo mérem dogoobonam kísa, kape kísa Ruutum bí bulum dogong bolayén?

¹⁷ Israel ami kídíe mimang kídílo leko bosukai, iname buluke yétíípe bulume yésu motoka.

¹⁸ Asi-apongem deddípe tíírongem, bulu aina amín kanamem pemílo annying namem mííyala, buluke notii agér inamem bulu erap bomdung.

¹⁹ Dekepeila bulume gumnam meyat asare mutpaknam kísa mutpakyé, delokke buluke ipak inam kídí deme bulu annying suyéku.”