HOSIA 2 - DEENA BAIBÉL (BSI)

¹ “Dekepeila nokke bíro kídarem, ‘Ngokke ami kídíe,’ delokke nokke bírme kídarem, ‘Ruutumke ayanam kídíe,’ embo sulangka.

Míngkeng Kamana Gomar lang Míngkeng Kamana Israel

² “Ngok ome-oo kídía! Noluke aneme rogutola. Bí ngokke mimepe iyimangakom, delokke ngo bíkke milope iyimangakom. Bíkke notii ségu emlang abír-ayo inamem iyimadope, nolu bíme rogulangka.

³ Bí dekena agérem gérdan teteyémílo, bím odo longe delo kapekísa amíl araape bí itodí, dekepe idope ngo bík egem pítkutyé. Ngo bíme pítílla ereena yépol among kísape imola, asi tíílílok bí siyé.

⁴ Bíkke ome-oo teyolote ngo ayang lengkanmayé, kapeila bulu notii agérlok onam ome-oo kídíe.

⁵ Kapeila buluke anede aapí-aang kasumape, annying kénsu mape bulum olento. Kapeila bí sikepe poto, ‘Ngokke mííbo sunam kídílo ngo gímín geyé, kapeila bulu ngome dope-tíípenamem bila, enno-siipyagem, olib télem, delokke asi-apongem bisudung.’

⁶ “Dekepeila ngo bíkke bedang gípekuem, taanyum-tatkélok itumyé. Bíkke bedangem etor torkapla bím gípeko kamo mayé.

⁷ Bí mííbo sunam kídíem monta gooyé, idola paamayé. Delomin bí, ‘Ngo kera milolo gísuyéku, kapeila supak mempemílo ngo kerangem aiyatuai,’ emla poyékune.

⁸ “Ngomino bíme ali-ayém ruubila, apongem, delokke olib télem biníai, emla bí edílokom aroe emla míngkímang. Bíkke Baal uyuem kumsukolo ilíknam uun kídíem, delokke baldín kídíemte ngoamino bím ruulík biníai. Dem bí edílokom kangkén sumang.

⁹ Depeila edílo bíkke ali-ayé minyédí, edílo asi-aponge tííba lenyédí, delo ngokke ruulen binam ato kídídem ngo bíkke lok laabín yéku. Ngokke enno-siipyak kídí emte, bíkke amílem gekom sunadope ibinam emte ngo laapak yéku.

¹⁰ Bíkke mííbo sunam kídí keralo bím ngo amíl araape ikanla, ngokke alag arasok sékote laalen lamadope ngo iyé.

¹¹ Ngo bíkke adeng-ape kídíem, dítak mipíke doman-tíímanem, Sabbath longe kídíem, Aní Poolo moodí kídíem, bíkke gíídí-siipe tabungem itum tumyinyé.

¹² Bíkke mííbo sunam kídílok bíkke paaname emla mííyum subomnam onggur esing, delokke donam tapang esing bagan kídíem, ngo nyokyin moyé. Ngo bíkke bagan, ríkséng kídíem moonampe imo langkula, monkír kídíem dopak moyéku.

¹³ Baal uyume nampona arí kanalok rombila, ipak igape ngo bím itung-iréyé, delokke dekepe ido longe kídíke ajéngem emmumpe mesam mayé, kapeila bí ngom mitpan sula, bíkke mííbo sunam kídíke méélam-méélamlo koopung, delokke lunggu lok agí amílem remmo sula bí dukmín getíto. Sikepe Ruutum bí polendung.

Ruutum ke Israelem Ayang Kuname

¹⁴ “Dekepeila ngo bím lekoda yépol mooruk amolo magong bolang kula, ayabosunam, mííbo sukunam agom lupoem podokupe inom-hanom yéku.

¹⁵ Depe iyékuem, bíkke ríkséng kídíem ngo bím bilangkula Akhor Yiibe me ashépe mííbom sukunam eyab kope imoyéku. Depe iyékuem, bíkke koo amépe ila Ijipt amonglok gílen dokuem kape kísa ngom torík sutodí, deke kísape bí ngok agomem tayyéku.

¹⁶ Dekepe idoku longe delo bí ngome, ‘Ngokke Baal ruutum,’ emyimape, ‘Ngokke miloe,’ emla bí ngom gogyéku.

¹⁷ Ngo edílokom bík nabbéllok Baal uyuke amínem mínlen moyi mayé.

¹⁸ Dekena longe kídí delo, ngok ami kídíem itung-iré lama dope, ngo atímana simon-sili, delokke pettang kídílo daapongko ibosuyé. Asi-among delokke midu-mimak inana ekurang kídíem, gíníng-yoksa, ityi-epuk kídí takamem laabín geyéla, ngok ami kídíem, atí pesorían kamadope dengomrupe, aapí eetetrupe duuyin moyéku.

¹⁹ “E Israel no ngokke mimepe, agínpe iyardope, ngo nome nyameng tatsuyé. Nom ngo deenam loklang arolok, asampe ayanam loklang ayang yalen kotír sulok, ngo nome nyameng tatsuyé.

²⁰ Nom ngo aro míngke lok, nyameng tatsula, no ngome Ruutum bí emla arope míngge ayardope ngo iyé.

²¹ Ruutum ngo sipe podung, delo longe delo ngo nok agomem tatbiyé. Nok agomem tatbila, taleng telok amolo, ngo pedong omola;

²² Amonge ali-ayém garmola, onggur alang emlang olib télem kamoyé.

²³ Ngo ngokke ami kídíem among delo, edíí-sirí rudope duumo langkula, bulum jémoyéku. Delo ‘Ngokke ayamanam,’ emnamem ngo ayayéku, delokke, ‘Ngokke amimang,’ emnamem nolu ngok amie emyéku; delo, ‘No ngoluke Shédíe,’ emla ami kídíe ngome poyan suyéku.”