HOSIA 14 - DEENA BAIBÉL (BSI)

Israelem Hosiake Roguname

¹ Israel ami kídía, Ruutum noluke Shédí kíng aalat sulangkuka. Noluke paab kídare nolume tubesumola olet modung.

² Ruutum kíng aalat sulangkula, nolu sikepe bíme kumsula rogu langkuka: “Ngoluke paab takamem ayala mesam bila, ngoluke kumnamem torík subilangka, delokke ngoluke toge sunampe nome ngolu agínpe yidyar geyé.

³ Assiria bí edílokom ngolum mopít lamang, delokke mimak guré kídar dete ngolume ipít lamang. Ngoluke uyu mimang kídíem, ngoluke Shédíe emla ngolu edílokom emyimayé. E Ruutum, míída supeko kamana teyolo no ayane.”

Israelem Aní Yénamem Ruutum ke Pébisuname

⁴ Ruutum bí podung, “Ngok ami kídíem ngokkíng laalat suyéku. Ngo bulum ngokke aapí takamlok ayayéku; ngo buluke teyolo maryimang.

⁵ Ngo Israel ami kídí teyolo, erengna amonglo pedong onam kísa iyéku. Bulu lili appun kísa punyéku; Lebanon lokke Sidar esing kísa, buluke appíre edííyéku.

⁶ Bulu anípe siirep langkula turyéku, delokke olib esing kídí kísa kampoyéku. Bulu Lebanonke sidar esing kídíke arí kísa iyin yéku.

⁷ Lekoda bulu ngokke kaabomko aralo duuyéku. Bulu ali-ayém arík ilangkula, ardana onggur ríkséng kísa iyéku. Lebanon lokke amín kana onggur alang kísape, bulu iyéku.

⁸ Israel ami kídíe uyu mimang kídílo, atí agér kabosupenam kaimayé; ngo buluke kumnam kídíem tatbila bulum kaasiyéku. Agínpe yaying ayarna esing kísa, ngo bulum duusiboyé. Ngo buluke utepooro pangko lerínge.”

Luyinnam Agome

⁹ Séko buludí kénne, bulu so atnam agom kídí sim tatkén daklangka, delokke buluke aapí-aanglo gegap daklangka. Ruutum ke bedang kídíde arone, delokke deena ami kídíe dekedem igela yédung, idola paab ina kídíe dekedelo tupsula, dekedem míípaknam legape oletdung.