HOSIA 10 - DEENA BAIBÉL (BSI)

¹ Israel ami kídíde aage bojéla tarpan suna, delokke ayé éénarung onggur ane kísape ituai. Bulu jéla-remla iyayang, uyu rungguem bojépe píyayang ito. Buluke asi-amode ardayayang, buluke kumsunam uyu kepe elíng gaangem kampoyayang píto.

² Yattína aapí gena ami kídarde supak buluke paab kídí legape adír pangkurupe aiyé. Shédí bí buluke uyu runggu kídíem bénpakla, uyuke elíng gaang kídíem dírpak biyinyé.

³ Si ami kídí si menape sipe lubosuyé, “Ngolu Ruutum me peso-ríanpe míngke sumala, ngolukíng roja kamang. Delok teyolo ngolu rojako katokom, bí ngolum ingko koda ibolayén?”

⁴ Bulu emmumpe agom-aanglok toge sutíyé, delokke aromana pésunamlo pétísula, agér kamana bonyingem itígooyé. Depeila kampope mokutnam aríklo díkna nesi-neyange garsana kísape, buluke teyolo pénsam raadang kebang agom kaimape ikai.

⁵ Samarilo duuna ami kídíe Bethaben ke rubíl mimang lokke nyokku penam legape pesoyé. Delokke ami kídíe lang miri kídíe, delokke deme gai-gakongrupe míísuna kídíe deme kapla-rííla ibomyé, kapeila bulu kelok langkutla, deme mooteng amolo menyokyé.

⁶ Deme Assiriake roja botteme amanpe bidope bombiyé. Israel ami kídarde ayang paamala, dekena mimang kídíke poyilem tatnam legape annying alooyé.

⁷ Samarike rojeme asie takong-talongem yubomnam kísa yunyok bomyé.

⁸ Aben among lokke dííte ponyuklo Israel kídíke uyu kumpom kídíem nyokpak moyé. Buluke uyu runggu kídí delo taanyum-taang pasume bííbom yéku. Delo ami kídíe dííteme, “Ngolum ilumtoi,” delokke díítumem, “Ngolum bénjémtoi,” emla ulo gogyé.

Israel Teyolo Ruutum ke Kebang Agome

⁹ Ruutum bí ludung, “Israelke ami kídíe Gibeahlo paab agér ido delokke ila, silo loope paab ití berokdung. Dekepeila Gibeahlo midu-mimage bulume ríksuyé.

¹⁰ Ngokke mínggosupe, sim deemaruna ami kídí sim ngo ingééyé. Deddína opín-buange buluke mirupe leko bosula, buluke paab teyolo paab agér gérnam legape bulume itung-iréyé.

¹¹ “Israel bí, aliem yikpe erappe irusuna, iyilnam rune aménakuai. Idola ngo bíkke kampona alínglo jungoliko raklíkla, bíme tolyana agérem imoyé. Ngo Judahme aalem gurmoto, delokke Israel me moiem somoto.

¹² Ngo luto, ‘Noluke supe aní amongem aal gurlangka, dormo ayonlok deenamem lelíkla, delokke noluke ngokkíng míngkesula kumsuname, ilen binam utepooroem nolu isilangka. Noluke Ruutum ngokkíng noluke aadíku moodíe píngkai, delokke ngo aala noluke teyolo utepooroem ruulík biyé.’

¹³ Idola nolu atímana ali-ayé amíeme letung, depeila atímana ali-ayéme gatdungku. Noluke yatkup-palatnam lokke ayéme nolu dokai. “Nolu noluke guré-gaari kídílo, delokke noluke sipaying maglínglo míídasunam legape,

¹⁴ midu-mimage noluke ami kídíem aabomyé, delokke noluke líísak ekum kídar dem bénpak biyé. De longede mimaklo Betharbel luune me Shalman rojake líípakla, delokke ane kídíem lang koo kídíem lekope petyinnam kísape iyé.

¹⁵ Sikepe Bethel ami kídí noluke lokom, noluke yirí-pedírupe atímang inam legape iyé. Mimak de maklen pakyém, Israelke rojae siyé.”