HIBRU 7 - DEENA BAIBÉL (BSI)

Melkijedek

¹ Si Melkijedek emnamsi Salem Doolung lokke rojakuai delokke kedon yalumna Shédíke mirikuai. Bí Abrahamke roja appi konem ikum geyéla endakkuem gíríksula bím lubéé líkto,

² delo Abraham bí agíke bomkunam dohombag takamem bím bisuto. Melkijedekme kerang yalumpe “Yéjiibona Roja”, delokrongem Salemlokke roja emdungai dekepe ila bíkke amínem “Yépobona roja” emlangkom ludungai.

³ Ane abu kamape, odong dooying kamape, lenko angko demangkom sinam turnam kényimape, Shédíke Oo kísape bí agínpe miripe yéyarkai.

⁴ Míngkítoka edítko bí botte nakuan? Ngoluke buku Abrahamteng bíkke mimaklo ikumla sérang paanam dohombagem bím bisuto.

⁵ Delokke Lebikelok lenna miripe ina kídíem ayone Israel ami kídílok depe emnamde buluke agí ami kídílok, bulu Abrahamke otíng oyinpe ituakom buluke dohombagem laadum sudope lubitungai.

⁶ Depe iduakom si ami sidan Lebi kelokke lennape imalateng Abraham kelok dohombagem laato delokke pébisunam ami Abrahamme lubéé líkto.

⁷ Delokke si kénnamke agome, améyana amidem botte yanade lubéé líkdo.

⁸ Si dohombag paana mirikídí si sikupene; idakkom dohombag paana Melkijedek bí dooying agompe turyarpene.

⁹ Edílo Abraham bí dohombag bitodí, dekom dohombag langgona Lebike dohombag bidume emla akone poladung.

¹⁰ Kapeila edílo Melkijedek bí Abrahamme ríksutodí Lebime delo omangada duakom bíkke amíne bíkke buku amíllo duuto.

¹¹ Lebike miri inam akorlokmin Israel ami kídílo ayonem bitune. Supak, Lebi kídí lokke miri inamde aro tuamílo, delo Aaronke ledulok imape Melkijedekme yégekuna angukon miri lenku penam kamangai.

¹² Legade edílo miri akore angu yékudí, delo ayonekom angu kupenam legange kadung.

¹³ Sim legang kídí sim lubom namde ngoluke Ruutum bí angukon opéé lokke, delokke bík opéélok sékokom miripe ikína kamang.

¹⁴ Kapeila si berok sudung, emnamde ngoluke Ruutum Judahkíng lenne, delokke dem opéé dem luyém Mosi bí miri inam legang atí pomang.

Melkijedek Kísana Mirikone

¹⁵ Atí si berok yadung, emnamde angukon miriko Melkijedek kísanako lenkai.

¹⁶ Bím miripe imoto, de tani niyomlok imang idakla, yérí kayimana turnamke pauarlok itung.

¹⁷ Kapeila Dooying kitabe podung: “No Melkijedekke yéyonlok agínpe miripe iyaryé.”

¹⁸ Kerangke ayonem megééto kapeila de ralmang delokke are kamang.

¹⁹ kapeila Mosike ayonde atí koteng apíí molatomang. Delokke supak ngoluke Shédíkíng anínpeko aiyana míínam sunamem mebitung.

²⁰ Delo pésumape imangai. Ayo konedan pésu mapekom miripe ine kato,

²¹ idakkom bí pésudola miripe ikai, kapeila Shédí bí bím sikepe poto: “Ruutum bí pébisudola poto delokke ngo bíkke aapíem angupe imayé! No agínpe miripe iyarne.”

²² Sok pébisunam sok, Jisu bí aiyana daapongem igebonape ikai.

²³ Dekena miri kídíde bojéko kato; buluke sinyok kolok buluke agérem iyar lamato.

²⁴ Idakkom Jisu bí agínpe duuyar kolok, bíkke miri agérde bíkkíng agínpe duuyardung.

²⁵ Delok legape bíkkelok Shédíkíng aana kídíem bí apíí píílí mopít ladung, kapeila bí agínpe bulukepe ralbi ibipe emla dung.

²⁶ Jisumin demílo, ngoluke pííramem kaabina miri rínede. Bí deene, imem kamane, mílína, paab ina ami kídílokke lengu suname, teyong among empenem kedonyane.

²⁷ Abíd miri ríne kísape, kerayalumpe bíkke agí paab legape, longe longelo bí sobo petlíkla kumsu penam kayimang. Bí edílo agísuem bisutodí delo bí yépenam tabung kepe buluke paab legape bí agíem asampe binyoksuto.

²⁸ Kapeila ralmanem miri rínepe ayone melíkdung; ayon méélampe aana pésunam agom delokke Uem melíkdung; bím gíínam siinam tabulope apíí motung.