HIBRU 3 - DEENA BAIBÉL (BSI)

Jisubí Mosimempemílo Botteyane

¹ Delok legape deena bírokídía, Shédíke tomnamem paabosuna kídía, ngoluke pongobinam, tomlíknam delokke miri rínepe ina Jisukíng míída sulangka.

² Mosi bí Shédíke erangkídí agérem edíípe inam kísape, bíkom agíem melíknem míngke sudung.

³ Ekumem mosaanade kumgíem pemílo botte yanam kísape, Jisukom Mosi mempemílo amín botte yanem gebaane.

⁴ Legade ekum mipíem akodada modung, idakla Shédímin takamem mosaane.

⁵ Béérang isappe Shédíke erang kídílo Mosi bí méélam kerangem lukan subila míngkelo edíí nakuai.

⁶ Idakkom Kristo bí oo isappe Shédíke erang kídílo míngkenge aronako. Delokke ngolu miram namem bomgap dumílo delokke ngoluke bottepe míísu bomnam míínam sunamem ngolu bomgap dumílo, ngolumin bíkke ekume.

Shédíke Ami Kídíke Apépekue

⁷ Depe iname Deena Aide pokane sikepe pokai: “Silo no bíkke agomem taddumílo,

⁸ no aapí angkam gemapeka noluke ebínpe aklen dungem inam kísape, mooruk amolo aro menam ikaa dungem,

⁹ noluke abukídíe ngom ikaa darkangkolo delokke tagying appiko ngokke inamem kaato.

¹⁰ Dekepe ila ngo marbomto dem siirumdem, delo ngo luto, ‘Buluke ainange angukonpe iyar dungai, delokke bulu ngokke bedangem kénmato.’

¹¹ Dekepe ila ngokke marlílok ngo sikepe lubeng berokbito: ‘Bulu edílokom ngokke dungkolo aalamayé.’ ”

¹² Bírokídía, nolu sékoteng paab imemla, aro míímala turna Shédí kelokke ngéngkur kupe aimang.

¹³ Dempenem nolu sékoteng paablok yadko sumadope delokke eda madope “Silo” emnam agom sim ngolukíng Dooying kitabe lulík dunade, nolu lolope akone akonem igul bosurupe aido.

¹⁴ Ngoluke kerape kaasunam, míídíí sunamem yéyinlope bomgap dumílo Kristoke tarongem ngolu paamín gedung.

¹⁵ Si Dooying kitab lubiname: “Noluke ebínpe agdodelo inam kísape silo nolu bíkke agomem taddumílo, aang angkam gema pelangka.”

¹⁶ Séko bulu Shédíke agomem tatpala ipéésune? Bulum takam Mosi bí Ijipt lokke lenbotoku.

¹⁷ Sékoke teyolo Shédí bí dítag íying appi kokai marbomtone? De paab ila mooruk amolo sikaana kídí lomanía?

¹⁸ Delokrongem Shédíke “Ngokke bipenam amolo edílokom bulu duuno sudope píílamayé” emnamde séko bulum, bí potone? Ebínpe aklen sukuna kídíem mape emtune.

¹⁹ Demílo ngolu kaadung, bulu pébisunam among delo pííla tomang, kapeila bulu arope míngke sutomang.