HIBRU 11 - DEENA BAIBÉL (BSI)

Míngkenge

¹ Míngkede mííbomnam atíem paayé emla mííname, kaapa manam atíem berokpe aayé emla mííname.

² Dekepemin kerangke abukídíe Shédíke agomem paatone.

³ Míngkelokmin tani amongem Shédí bí bíkke agomlok pítone emla ngolu kéndune, depe emnamde kaapang manamlok kaapa namem píto.

⁴ Míngkelok dada Abel bí Kainke Shédíme aman binam empenem ardayape bitone. Míngke sukolok Abel bí Shédí kelok deena amiko emla yidnam amínem paatone. Míngke lokmin bí agíe sinyok late bíkke agome supakteng turdung adane.

⁵ Míngke tete lokmin Henokme simomape laanyok tokune; depe emnamde bíkke sinamem kéntomang; bím mapang kuyimang, kapeila Shédí bí bím laanyok toku. Legade bím laanyok kumang adape Shédíme ashémona akonpe bím santo.

⁶ Delokke míngkeng kamape Shédíme ashédope ilamang, kapeila bíkkíng aana amide bí turla dung emla arope mííperung aido delokke mínggapla matana kídídem bí aman bidung.

⁷ Míngkeng emin Noahme bíkke kaapa manam méélam atíem Shédíke luto subinamem tatmotone. Bí Shédíme belenggeto delokke bílang bíkke erange duusi sukeng etkungko pato. Bíkke míngke lok bí tani amongem mepakto delokke míngkelok aana yéjiinam ruutumem dogekai.

⁸ Míngkelokmin Abraham bí Shédíke bím bipe emla pébisunam amolo gídope Shédíke bím tomlenduem bí tatbitone. Bí bíkke agí doolungem megeyéla gípekuem kénsumape gílentone.

⁹ Míngke lokmin bí Shédíke bím pébisunam amolo mibo kísape duutone. Pébisunam tarongem ruutum dogebosuna, Isaaklang Jakob bínyi poyublo duutone.

¹⁰ Kapeila Abraham bí Shédíke leemola delokke motonam bottena taon amolo duupe emla toyatuai.

¹¹ Míngke lokmin Abraham bí mijiilate abupe delokke Sarah bí negenpe yépala eejo danlo uem otone, kapeila bí pébisuna Shédíme míídasuto.

¹² Abraham bí arope sikakom, ami atelsok deddína otíng oyine taleng telokke takar kísape delokke korong lokke siiyé kísape goobyakkai.

¹³ Si ami takam si míngkelok dada sikai. Bulu pébisunam atíem paatomang; bulu dekedem kaato delokke mooteng lokke toríksuto. Delokke bulu tani amosokke mibuge delokke mibue emnamdem arue emsuto.

¹⁴ Sikepe luna ami kídíde bulu buluke agí doolungem matadung emnamdem lengkan bito.

¹⁵ Buluke gínyotonam doolungem bulu míngkut sukumang, bulu míngkut suduamílo, buluke gílatdíkue katuai.

¹⁶ Dempenem bulu teyong among kísanako, aiyana doolungko ankíbomto. Delokke Shédí bí buluke Shédíe emnamem annyiimang, kapeila bí buluke doolung bottena duupeko amongko meruu bitung.

¹⁷ Míngke lokmin Abrahamme Shédíke ikaape idodelo oo Isaakme petlík subipe emla imotone. Pébi sunamem paatona bí bíkke oo delokke oo atelem sobope binyoksupe emla leemotuai.

¹⁸ Shédí bí bím poto, “Isaak kelokmin ngokke pébisunam nokke otíng oyinem paayéne.”

¹⁹ Shédí bí sinem sikolokke kiirep ladoku emla Abraham bí kénsuto, delokke teyolokke luyém bí Isaakme sikolokke paatoku.

²⁰ Míngkeng lokmin Isaak, Jakobme delokke Esaume buluke yépenam legalo lubéé líktone.

²¹ Míngke lokmin Jakob bí sipe idakla Joséphke oo mipíem lubéé líktone. Bíkke gínana banggénlo níída sudola bí Shédíme kumto.

²² Míngke lokmin Joséph bí agíke sidíe pííyédelo, Israel ami kídíke Ijiptlokke lenku penam legangem potone delokke bíkke simangem kape ipe aidodí dem poyil bitone.

²³ Míngke lokmin Mosike ane abue bím poolo angum legape orongem mesuptone, legade emmumna ojing koo mangkuai, delokke bulu rojalokke agom bigoo namem pesomangai.

²⁴ Míngke lokmin, Mosi bí mineyédem, Pharaohke omelokke ue emko suyimane.

²⁵ Paablo yénam anyongem ashéng angampe yépenamem megeyéla bí Shédíke amikídí duugem dobosupe emla míílen sutone.

²⁶ Ijipt lokke arem tadok empemílo, bí Kristoke legape annying pangge namem botteyape míísuto, kapeila bíkke aman paape namem bí kaatosuto.

²⁷ Míngke lokmin bí rojalokke aklíngem pesomape, Ijipt lokke gítokune. Kaapa manam Shédíme kaadona kísa bí gílat sutokupe míímang.

²⁸ Míngke lokmin, oge yalumnam em petyana bí Israel kídílokke obíng yalum oo kídíem ukkí bimadope emla, bí eyab takamlo iyyi bídkat mola Gíbong adeng apem bomgap botone.

²⁹ Míngke lokmin amikídíe moopí kísape Líína Siyéng raadalok kooto kune; idakkom Ijipt ami koomín gepe ina kídíde asilo yuyinkane.

³⁰ Míngke lokmin Jeriko lokke yapgue amikídíe longe kínít kokai dem yon goola yonrongem bénlet sukane.

³¹ Míngke lokmin notiipe ina Rahabme Shédíme míngge mana kídílo pettak sumane, kapeila bí makro rola inakídíem aipe kaarík iríksuto.

³² Delokke teyolo ngo edítko popene? Ngo Gidion, Barak, Samson, Jeptah, Dabid, Samuel delokke kaaluna miri kídí legangem podí kayimang.

³³ Míngkeng kootírlok bulu deddína mibo doolungem ikumto. Bulu tetelok yébola delokke Shédíke pébi sunamem paato. Bulu myomur nappangem pitumto,

³⁴ pesonam meyuem pímitto, yoksa aarlo sipe kolokke dunggeto. Bulu tolmatuai idakkom tolkaku. Tollangkula bulu mibo mimagem ikumto.

³⁵ Mime kídíe buluke simangem kiirep kunamem paatoku, delo bulu aiyana gerep kunamem paape emla mííto. Ayokone aiyape gerep kunamem paadope emla, iréé kosuto delokke melen kosu língku mape ito.

³⁶ Ayokone ngilkang songkang kosula delokke demngéé kosula pateklo tumkosuto.

³⁷ Bulum elílok geto; bulum olnyikope patuto; bulum yoksalok papakto. Bulu mér sobén ayolok gela, opanpe, idír kosula delokke ipusiléé kosula yéto.

³⁸ Tani amosi buluke duuba mangkope ito. Bulu mooruk amolo delokke dííte moopalo, delokke líípíklo, delokke kédeng aruulo dunggooto.

³⁹ Si takam si míngkeng legalok koyit penameke, depe idolate bulu sékoteng Shédíke pébisunam atíem píímato,

⁴⁰ kapeila Shédí bí ngolu kepe aiyana atíem mííyin subitung. Bíkke mííbom namde ngolukelo lekope bulumte apíímope emla míídung.