HIBRU 10 - DEENA BAIBÉL (BSI)

¹ Judai ayonde angkupena aina atílokke abír ayo petome, míngke supenam atí aromang. dítag dítaglo sobo payanamem payar abusudung. Demílo kape kísa ayonde sikena kumnam niyomlok Shédíkíng aana taniem apíímola yékune?

² Shédíme kumsuna amiem aropakpe buluke paablokke deemo arotumílo, bulu paab imemem míítí sugíng kayimangai, delokke petlík ilíknam takamem meyékuai.

³ Idakkom de yarem baabinamde toodí yamolo paab imem namem míípang sukepe baaname.

⁴ Sobo yarem delokke iyyilok paab kídarem molbín langkumayé.

⁵ Delok legape, Kristoke tani amoso aadodelo bí sikepe poto: “Sobo yarem amanem no míímang igeyéla amíl emmin ngom mebitone;

⁶ romnam ipagemlang paab ipagem no ashéng bommang.

⁷ Delo ngo emto: ‘Shédía, sina ngo, ayon kakotlo ngokke legangem atnampe, nokke míínamem ipene dune.’ ”

⁸ Kera yalumpe bí poto, “Sobo pabila demangkom yaarem baabila delokke paabem mopít nakupe emla nolu ipak ibipe míímang, ashéng pete bommang,” (Ayondelok sim takam sim ipe aidungai.)

⁹ Delo bí pokai, “Sina ngo, nokke míínamem ipe emla aadung.” Dekepe iname Shédí bí aníem laalík pala akuem mepakto.

¹⁰ Delokke dekena mínggílok Jisu Kristoke amílem binyok suyar líkkolok ngolum deemo tungku.

¹¹ Miri kídíde loodíke daggu bomdola sobuem patí bilate paabem ibín sulatomang.

¹² Idakkom si miri si yépenam tabung legape birum atellok paab legape bilík supala, bí Shédíke lakbíklo duudungku.

¹³ Supak lokke ila bíkke mibo miru kídíem bíkke ale rumkílo mekupe emla toyala dung.

¹⁴ Birum atellok bí paab lokke deemokunam ami kídíem yéyar penam legape apíí píílí motoku.

¹⁵ Deena Aidekom ngolum hakiipe ibidung. Kerape bí sikepe poto,

¹⁶ “Simoko daaponge ngokke bulum ibo supename aapena longelo, emla Ruutum bí podung. Ngo buluke aapí ainalo ngokke ayonem líkyé delokke dekedem buluke aapílo atlíkyé.”

¹⁷ Delo bí poto, “Buluke paab emlang imem namem ngo lupang yikumayé.”

¹⁸ Supak sikesim maab tobonade, paabem langgé kunape sobo yaarem ilík penamyang kayimang.

Shédíkelo Gínínlaju

¹⁹ Demílo, ngokke bírokídía, Jisuke sikolok ngolu Deeya yalumna amolo gíe sumape gíladung.

²⁰ Bí ngoluke legape aní bedangko, turko bedangko, mebitung, depe emnamde bíkke amíllok yapguem paya bitung.

²¹ Delokke Shédíke ekumlo ngolukepe miri rínepe duubi dungku.

²² Dekepe iname míngkeng berogem delokke jégap aangem gedola, genyiinam aapíem deemo kunam aangem gela delokke deena asilok írbínnam amílem gela, ngolu Shédíkelo aanínlaju.

²³ Kaju ngolu edíírupe ngoluke yébom sunam míínam sunamem gaggap laju, kapeila pébisuna bí aronako.

²⁴ Kaju ngolu akone akonem ankí bosulaju, ayangem lengkan bosula aina agérlok akone akonem igulbosu laju.

²⁵ Demílo ngolu akone ibomdunam kísape dumsu ayar bosunamem mepak sumajuka. Ngolu pakyape akone akonem luír poír bosu lajuka, kapeila nolu kaasudung, Ruutumke Longe anín dakbong.

²⁶ Ngolu aruem kénrongem, iperung emla kusiipe paab itíla yémílo, delok adumpe biyan penamyang kayimang,

²⁷ idakla pesorunam bisar pename delokke Shédíke miruem gunyok kupena mepom petom emino dune.

²⁸ Mosike ayon tatmanem, midum annyi angumko bisarlo arue embe birongem ayang kamape petpakdo.

²⁹ Demílo Shédíke Uem mepak nadem kape kísa iyén? Bíkke arbínna Shédíke daapong iyyiem míílum nadem kape iyén? Shédíke yanggong Aidem lukaa nadem kape meyén? Míngkítoka, edítna pakyana ingééyém bí paayéne!

³⁰ Kapeila “Edode ngokke; ngo eduem rayéku,” delokke lekoda, “Ruutum bí bíkke ami kídíem bisaryéku” emna bím ngolu kénsudung.

³¹ Turna Shédíke alaglo olíknamde edítko pesoname.

³² Yétonam longem, noluke angunem paarongem, nolu edítko adírem paatuadí dem míípang sutokuka.

³³ Nolum longeko ami takam kangkolo luyé lulééla delokke iyéé siléla ito, delokke lekomílo nolu sikepe iyéé silénam ami kídílo lekope dongge bosupe emla mííto.

³⁴ Nolu pateklo menam kídíem ayange emla mííto delokke noluke sérangem rotbín namem ashérupe donggebito, kapeila nolu agíe aiyana delokke duuyarpena sérangem nolu bomsudung emla kénsuto.

³⁵ Dekepe iname noluke miramem elu moku mapeka, delok kínggíyana amane lensuyé.

³⁶ Shédíke pébisunamem paadope delokke bíkke míínamem ibidope nolu yémgappe aidung.

³⁷ Dooying kitabe sikepe pobidung: “Anyongko doorongem angkupena bí aayéku delokke bí adolmayé.

³⁸ Idakkom yéjiinade míngkelok turyé. Delokke ngéngkur kuna bím ngo ashépe mííbom mayé.”

³⁹ Idakkom ngolu ngengkur kuna delokke nyokkuna amimang, idola míngkesuna delokke turkuna amiemin.