HAGGAI 1 - DEENA BAIBÉL (BSI)

Kumkeng Ekumem Morepdokupe Ruutum ke Lulíkname

¹ Parsia lokke roja Dariaske dítak annyinape roja dobomdo delokke poolo akkénanake kerayalum longe delo Ruutum bí kaalu miri Haggai kelok agomem políkto. Agomde Shealtielke oo, Judah among lokke gobonor Jerubbabel kepelang Jehojadakke oo, miri írne Joshua kepe aato.

² Ralya yalumna Ruutum bí Haggaime poto, “Si ami kídí si supak Kumkeng Ekum sime morepdí kumangada emdung.”

³ Ruutum bí delo sim agom sim ami kídíem podope kaalu miri Haggai me bilíkto:

⁴ “Ngokke ami kídía, ngokke Kumkeng Ekume bénromla doodungem, nolu kapeda agíe aina, edíína ekumlo duudune?

⁵ Dekepeila supak noluke yénam-dagnamlo inam kídíem míngíng sukílangka.

⁶ Nolu deddína aliem ngiilíkdung, idokom ayéem anyongoko paadungku. Nolu dopename kadung, idokom nolu edílote aang píímang. Nolu tíípename alummang, idokom nolu edílote aang píímang. Nolu ege-galuk gepename kadung, idokom sékote iigamang. Delokke séko agér gérla dormang paadudí, bí dormang dem arung mílí ina nyogon kolo mesiidokupe paadung.

⁷ “Dekepeila supak noluke yénam-dagnamlo inam kídíem míngíng sukílangka.

⁸ Supak dííte kídí telo ensaala, esingem bomtok langkula, Kumkeng Ekum sim morep tokuka; delo ngo aipe mííyé, delokke ngokke míínampe nolu ngome kumsulayéku.

⁹ Nolu bojéko ali-ayéem paayépe emla míínam sutuai, idokom anyongpe paato. Delo edílo noluke ali-ayéem nolu ekumlo gelík tokudí, ngo deme mutpak bito. Kape ngo dekepe ikane? Kapeila nolu mipile agí-agí ekum legape usigai emla moomang dungem, ngokke Kumkeng Ekume bénromla duudung.

¹⁰ Dekepe ilamin talenge pedong obimane, delokke amonge ali-ayé atí garlen bimane.

¹¹ Ngo among sokke dííte kídílo, ali-ayé arík-anam kídílo, onggur ríkséng kídílo, olib ríkséng kídílo, delokke among sokke garbinam donam takamlo, tani takamlolang taro takamlo, delo noluke lelík kínam takamlo baareng dope dooreng dítakko bomalíkto.”

Ruutum ke Lulígnamem Ami Kídíke Igename

¹² Delo Jerubbabel lang Joshua, delokke monnyok líkko Babilon loge aalat sukuna ami tabunge, Ruutum buluke Shédíke bulume igelangka emnamem igeto. Bulu pesola, Ruutum ke melíknam kaalu miri Haggaike ponampe ito.

¹³ Delo Haggai bí ami kídídem Ruutum ke agomem pobito, “Ngo nolukíng duumín geyé, de ngokke togesubiname.”

¹⁴ Ruutum bí mipil takamem Kumkeng Ekum legape agér gérdope aapí-aangem unun moto: Judah lokke gobonor Jerubbabel; miri írne Joshua; delokke monnyokko loge aalat sukuna ami tabungem. Delo bulu Ralya yalumna Ruutum, buluke Shédíke Kumkeng Ekum deme morepkunam agérem gérlento.

¹⁵ De Darias rojake dítak annyinape roja dodolokke poolo akkéke looying annyi kolang loopinana longe.