HABAKKUK 3 - DEENA BAIBÉL (BSI)

Habakkukke Kumname

¹ Si kaalu miri Habakkukke kumnamko:

² E Ruutum, no ingkuem itodín ngo tatto, delokke ngo nok irisinyoem kénla, peso-yirípe míngkai. Supak lekoda nokke ikampe botteruna agérem, ngoluke yédoso lekoda ikan tokui. Nokke mardung emteng, ayang míípang sutoi.

³ Shédí bí lekoda Edomlok aadung, deena Shédí bí Paran adi kídí lokke aadung. Bíkke angun-abée teyong among kídíem polum bomdung, delo bím ríngge-yidgename tani among so bíísétdung.

⁴ Bí yaari angunpe garlangala aadung. Delokke bík alaglok angune latdung, delo bíkke miga-miram ralnamem mesupdung.

⁵ Bí kilii-ramliem bíkke kerape melíkdung, delokke sinamem bíkke méélamlo aamín gedope lulígdung.

⁶ Edílo bí dagyédí, tani amonge tondung; bíkke kitkang sukolok deddína opín duupom kídíe dan-gedung. Duuyarna dííte kídíe bénla dongkai; duuyar suna dííte moopang kídíe deeyulpe yulgedo. Bíkke bedang kídíde konnying-mennyingke akame.

⁷ Ngo Kushan lokke ami kídíem peso reyub igedope kaato, delo Midian lokke ami kídíem pesolok dan-gedope kaato.

⁸ RuutumE, korong kídía nome marmotone? Siyéng asiea nome markín modune? Nokke ami kídíem ikumnamem bidagem, no doomug kídí aralo gyato, gumnam doomug kídíde nokke guré-gaaripe ito.

⁹ No nokke iyyiem pugarla irung bomto, nokke epuk kídíem aplíkpe torung bomto. Nokke yaarie among sim barpan sudupe ito.

¹⁰ Edílo dííte kídíe nome kaatodí, bulu dan-geto; talenglok asie otokto. Among aralo duuna asi kídíe rímto, delokke buluke sinung sipare nungonto.

¹¹ Nokke pugí byarna asirem kaala, delo gíníng yaari asirem kaala, taleng telokke doonyiela pooloe tekíngla daggeto.

¹² No marla tani amongem gígooto; no markínla bosi-dadi opín-buangem tujémto.

¹³ No nokke ami kídíem ipítpe, nokke ullennam rojaem mopítpe gílento. No atímana kídíke ruutumem petto, delo bíkkíng yémín gena tabungem petyinto.

¹⁴ Opan kídíem pesuppe itung-irétula yago-yago mííyum suna kísape, edílo bulu gumnam kísape ngolume monpit-monyitkape dugaatodín, delo buluke sipaying ruutumem nokke pugí kídíe patkarto.

¹⁵ Nokke guré kídílok siyéng asiem tujémla no dugto, delo siyéng asi silunge aput-ayut gol-gol igeto.

¹⁶ Sim tabung ngo tatdung, delo ngo dan-gedung; yagope peso kolok ngokke nabbél si dandung. Ngokke amíle beleng kényimang. Delo ngokke ale gíkényimang. ngolume língaang bomna ami kídíem, Shédíke adír bidíku moodídem, ngo asoope toyala duuyé.

¹⁷ Tapang ane kídíe ayé éémang dakkom, delo onggur ane onggur ééma dakkom, olib esinge looríyimape sudagakom, delokke arík kídíe ali-ayé garbimadagakom, delokke mér tabunge siyin dagakom, delokke taro dungko kídíe araadagakom,

¹⁸ ngo Ruutum kíng ashéyé, ngome mopítna Shédí kelo ngo aange apííyé.

¹⁹ Kedon yalumna Ruutum bí ngome ralnam bidung. Bí ngokke aleme sidum ale kísa edíímodung, delokke dííte kídílo ngome bí pesopenam lokke mopítdung.