HABAKKUK 2 - DEENA BAIBÉL (BSI)

Ruutum ke Habakkukme Poyan Suname

¹ Ngo ngokke kaanana tongilo reesayé, delokke Ruutum bí ngome podope ingkokodí poyéne, delokke ngokke paklonamem kape poyan suyédí, deme kaape toyayé.

² Ruutum bí ngome sim poyansunam sim bito: “Déngkyam atamna kídílo ngokke nome lengkan sime, peebengpe letel kaarumlo pori ladope atto.

³ Sim atkumla melangka, kapeila legang kídísi supak arope ilíkdí mangada. Idokom de moodíde menape píídak, delokke ingkuem ngo nome lengkandudí si menape arolíkyé. Sime eetetgampe píína kísape aan duakom, sime toya langka. Si arorupe ilíkyé, delokke si adolmayé.

⁴ Delokke simoko ponam agome: ‘Séko bulu atímadudí bulu turmayé, idola deena kídíe turyé, kapeila bulu Shédí kíng míngkesudung.’ ”

Deemana Teyolo Gérmange

⁵ Mirem ekuserangde yaddung. Aponge míímem sumodung. Sinam nyokname edílote aang píímanam kísa, míítana ami kídíe kekím aapí gedung, delokke eetetpe duutetdí kamang. Dekepe ilamin bulu among kékonlo amongem ikumla agíkepe laadum sudune.

⁶ Among-asiem rotbínnam ami kídíde bulume rotbínna kídíem lupu-luléla, buluke marlíngem lengkansuyé. Bulu sikepe poyé, “Nolu amike ekurangem laadumsula bomdung, idokom nolu nyokyé! Edílopeda noluke ajéng gena kídíem dordorung kupe ila nolu remgetíyén?”

⁷ Idola noluke kénsumang adape, abídem ajéng dordope ina nolu agíeteng ami rumkílo yéyéku, delokke unta bidorupe nolume imoyé. Miru kídíe aala nolume dan-goosumoyé. Bulu nolume lííyé!

⁸ Nolu bosi-dadi opín-buang lokke ami kídíem lííto, idola supak turla duuna kídíe, noluke yiilíng biinam legape, delokke taleng kuppo sokke ami kídí emla sokke luune kídar teyolo itung-irénam legape, nolume lííyéku.

⁹ Nolu nyokdak! Noluke erangem nolu, noluke itung-iréla laanam kídílok mirem moto, delokke noluke agí ekum erangem atímana loklang pesonamlok mopítpe ikíto.

¹⁰ Idola noluke míírung kínam kídíde noluke ekum erang teyolo annying namem bomangkai. Deddína opín-buang kídíem nyokmola, nolu agísulo nyoknamem bomasulíkkai.

¹¹ Líísak etor lokke elíng kídí daadie noluke mirolpe ulo gogdung, delokke baare kídare deme uuyan sudung.

¹² Nolu nyokdak! Nolu luuneko yiilíng biila luulento, delokke mokanam lok deme morepto.

¹³ Noluke ikumnam opín-buang kídíde agíem agér kamanalo ingasulíkkai, delokke buluke morepnam takamde meyolo mepipe gyapakkai. Ralya yalumna Ruutum bí sim imoto.

¹⁴ Idola siyéng kídíem asie bííbomnam kísape tani among sime Ruutum ke angun-abé lokke kénname bíísét bomyé.

¹⁵ Nolu nyokdak! Noluke markolok nolu kumrí-donggong kídíem ipu-iléla, delokke annying paamoto. Bulume tíngír írkyaksuna kísape nolu tapgoosumoto.

¹⁶ Delokke adupe nolumkom mínggenam ayanpe annyinge polum bomyé. Nolu agísue tíísula tapgoosuyé. Ruutum bí nolume, noluke agí ajéngem paadope imoyé, delokke noluke agíl-apyoem nyokmola, annying penamem nolum bilatyéku.

¹⁷ Nolu Lebanonke moonamem paletyinto; supak nolume paletyéku. Nolu sokke simon-sili kídíem petto; supak simon-silie nolume morítyéku. Noluke yiilíng biinam kídí legapelang taleng kuppo sokke ami kídí lolang sokke luune kídí teyolo itung-irénam legape sikesi iyé.

¹⁸ Mimangde ingko agérko kadun? De tanike pínampee atoko, delokke de menam kékonlo atíyang pomang. Adud-ayud kamana mimangde, ingkona aina agérko bím pína bím ibila, bíkking míngkesudope imodung.

¹⁹ Nolu nyokdak! Nolu esing singolpee konem, “Dareptola!” demangke dabupee konem “Dagrepto!” emdung. Mimang kone nolume atíko lengkan labiyén? Deme uunlok, demangke baldínlok pílumlado, idokom de atí turnam kamang.

²⁰ Idola Ruutum bí bíkke deena Kumkeng Ekumlo duudung; dekepeila tani among takame bíkke keralo eetet-dengompe duulangka.