HABAKKUK 1 - DEENA BAIBÉL (BSI)

¹ Si kaalu miri Habakkuk kelo Ruutumke lenkannam agome.

Habakkuk ke Paklo Bomname

² E Ruutum, edílopeda igultoika emla nome ngo gogtiyéne, delokke no tatbimayéne, delokke ngolume momín-pamín kídísok mopít mayéne?

³ Sikena ebínem kapei no ngome kaamodun? Kape kísape no sikena atímana agérem hakjémla kaaladun? Nyoknam elang momín-pamíne ngokke dunggong takamsi kadung, delokke lumín-momín elang akmín suname rego takamlo kayindung.

⁴ Ayone ralnam kayimang, delokke agér kayimang. Delokke edílote jonna deena kebangem ilíkyimang. Loorímana ami kídíe deenampe yéna ami kídíem gaiyape ikai, dekepeila jonna, deena kebangem angupe ila deemang mokai.

Ruutum ke Poyan Suname

⁵ Delo Ruutum bí bíkke ami kídíem poto, “Noluke ayir-agolo duuna opín-buang kídíem kanggap bomtola, delo noluke kaanam teyolo nolu míírí-míínyoyé. Nolu tatlate arope míímanam atíko ngo iyé.

⁶ Migu-miyakna, botu-huakna Babilon ami kídí sim ngo migang-mirampe irep modakku. Bulu tani among tabung so abíd moone-laane kídíem ikumla laape emla maglíngpe gílendung.

⁷ Bulu takamem pesomola yirí-pedípe míímodung, delokke buluke kekím ruupe míísunamlo buluke ayonsukope bulu isudung.

⁸ “Buluke guré kídíe takar simyo kídíem dugdugyadung, delokke kenona sipyang kídíem migang yadung. Buluke guré dugbomna ami kídíe mooteng among kídí loge dugadung; buluke guré kídíe amonge pemuk sangge dope tubomdung. Agíke dopenamlo pemí kídare kape kísape yigabomdudí, deke kísa bulu miruke teyolo idung.

⁹ “Buluke maglíng kídíe itung-iréla ikumpe emla aaníndung, delokke buluke píínínyédem takame yagorupe pesolok dan-gedung. Buluke mimaklo ikumla abílpe umnam ami kídíe siiyé yépol kísape sanam yimang.

¹⁰ Bulu roja kídíem ipusilééla, delokke migom botte kídíem ngilpu-ngillédung. Ingkona líísak etor yapgoeteng bulume motum lamang. Bulu dekedem kédénglok gebíng líktola, deme ladung.

¹¹ Delo bulu asar mutnam kísape mutbomla gídan teteyé. Loorímana ami kídí sokke ralnamsudei buluke uyusue.”

Habakkukke Lennyinape Pakloname

¹² Ruutum, no pílen-batlen delokkai duuyarna Shédíe. No ngokke deena, duuyarna Shédíe. Ruutum, ngokke Shédí delokke mopítna no, Babilon ami kídíem ullenla, ngolume ingéngdope bulume miga-mirammoto.

¹³ Idola no sikena mena yatna atímana ami keralo kapekísa dagdun? Nokke deena amige loorímanem kaalamang, delokke no ami kídíke imemem kaala daglamang. Dekemílo sok ami kídí sokke agíem deeyana ami kídíem petbomdupe kaalate, kape no asoope ikan?

¹⁴ Kape kísa no ami kídíem, sutlík bopena ruutum kamana siyéng asi lokke engo kísape, demangke takom-tari alung kolok kísape imoyén?

¹⁵ Babilon ami kídíe engoem píknam kísa, gakarlok ami kídíem píkbomdung. Bulu esap kídí lok bulume yétbom dokula buluke kuunam deme yagorupe ashéng goggedung.

¹⁶ Bulu buluke esap kídí daadiem kumsula, dekedem ipak kídíem ilík bidung, kapeila buluke esap kídíde bulume takam ato lokke aiyalumnem paabidung.

¹⁷ Sikepe bulu agínpe buluke yoksa kídíem patínala, ayang aapí anyong kote kamape opín-buang kídíem pettígooyénía?