GÍLEN KUNAM 7 - DEENA BAIBÉL (BSI)

¹ Ruutumbí poto, “Pharaoh ke keralo, ngo nome Shédí kísape imoyé, delokke nokke bíro Aaron bí, nokke kaaluna miripe idola bíkkíng luposuyé.

² Ngokke nome políknam tabungem, Aaron me popatoka, delokke bí among sok Israel kídíem, gímo dokupe Pharaoh me poyé.

³ Idola ngo Pharaohke aapíem tolmoyé. Depeila bí edítko pesonam irisinyoem, Ijiptlo ngo ikan dokom nome tatmayé.

⁴ Delo ngo yirí-pedírupe igenamem Ijiptlo bomayé delokke ngok ami kídíke opín tabungem, among delok ngo gílen boyéku.

⁵ Ijipt ami kídíde, edílo ngok alage buluke mirupe lagon yédí, delokke Israel kídíem buluke among lok gílen boyékudí, delo bulu Ruutumbí ngomin emla kényinyé.”

⁶ Ruutum ke lulígnampe Mosi lang Aaron bínyi ito.

⁷ Pharaoh me bínyike lupo sudo delo Mosike dítage íying píínyito, delokke Aaronke dítage íying píínyi kolang angumko ido.

Aaronke Banggéne

⁸ Mosi melang Aaronme Ruutumbí poto,

⁹ “Edílo Pharaoh bí nome ‘irisinyoko ilangka,’ emyédí, delo Aaron me bík banggén dem Pharaohke keralo yoplík dope polangka. Delo de tabí kope batyé.”

¹⁰ Delo Mosi lang Aaron, Pharaoh kíng gíla Ruutumke podupe ikanto. Aaron bí banggénem Pharaoh kelang bík ruutum kídí keralo yoblíkto, delo de tabí kope batkai.

¹¹ Pharaoh bí delo kénna ami kídíem lang moya-montro ina ami kídíem tomato. Ijipt kídí lokke moya-montrong ina kídíete, buluke jadu-montrong lok, delok akam pakpe ito.

¹² Bulu banggén kídíem yoblíkla, dekede tabípe batyinto, idola Aaron ke banggénde buluke banggén kídíem méyyinto.

¹³ Idola Pharaohke aapíde tolla Ruutumke pokampe bínyik agom dem tatbi maato.

Iyyipe Ila Ijiptem Itung-iréname:

¹⁴ Delo Ruutumbí Mosime poto, “Pharaohke aapíde tolla, ami kídíem gímo dokupe elíkmang.

¹⁵ Depe ikolok roem gíla, Pharaohke Nail korope gíyém, bím kaarík sudope korong robe delo dooya toka, delokke tabípe batna banggén dem nok alaglo bomlangka.

¹⁶ Delo bím polangka, ‘Ruutumbí, Hibru kídíke Shédí bí, ngome sim agom sim popa dope lulígdung. Ngok ami kídíem yépol mooruklo ngom kumsudope gímolangka. Idola supak pete no ngok agomem tatbimang.

¹⁷ Ruutumbí sikepe podung, sok agér sok, ngo Ruutumbí emla no kényé. Ngok alagso bomnam banggén sok, Nail asiem demyém asi si iyyipe batyé.

¹⁸ Nail lokke engo kídíde siyinyé, delokke korode namnyiyé, delokke Ijipt lokke ami kídíe koro lokke asiem tííla mayé.’”

¹⁹ Mosime Ruutumbí poto, “Aaronme polangka, nok banggénem bomla nok alagde, Ijipt lokke asi kídílo, asiem mesing kolo yamtar líktoka. De takamde iyyipe iyé. Ijipt lokke rego mipílo iyyipe iyinyé, asi balting lote delokke elíng gíri loote depe iyé.”

²⁰ Mosi lang Aaron bínyi, Ruutumke lulígnampe ibito. Bí Pharaoh kelang ruutum kídí keralo banggéndem ledusula Nailke asilo ilíkto, delo asi tabude iyyipe batkai.

²¹ Nail lokke engo kídíe siyinkai, delokke korode yagorupe namnyila, Ijipt ami kídíe, delokke asiem tííla yimato. Ijipt lokke kéényung-regolo iyyipe ikai.

²² Idola Ijipt kídíke mirí kídíete, buluke jadu-montrong lok deke akampakpe ito, depeila Pharaohke aapíde tolya momokai.

²³ Delok ayanpe bíkke roja ekumlo, bí gílat sulangkula, dekedem atí míngge pete maato.

²⁴ Korong delokke asiem tííla mala, Nail lokke robenglo asi tíípenam legape koota gooto.

²⁵ Koronglo Ruutumke moga rongem longe kínídko kato.