GÍLEN KUNAM 5 - DEENA BAIBÉL (BSI)

Pharaohke Keralo Mosi keela Aaronke Aaname

¹ Méélam delo Mosi lang Aaron bínyi, Pharaoh kelo aala poto, “Israel lokke Shédí bí sikepe podung, ‘Yépol mooruklo ngok legape adeng-apeko ibidope ngok ami kídíem gímo langka.’ ”

² Pharaoh pokai, “Ngo Israelem gímola, ngok agom tatpenam Ruutumbí séko? Ngo Ruutumdem kénmang, delokke ngo Israel kídíem gímo mayé.”

³ Mosi lang Aaron poto, “Hibru kídíke Shédí bí, ngonyim kaarík suto. Depeila ngolum longum gípeko yépol mooruklo gímola, ngoluke Shédí kíng ipak idope melík toka, demamílo bí ngolum kilii-ramlilok demangkom yoksa lok mokayé.”

⁴ Idola Ijiptke rojade manto, “Mosi lang Aaron nonyi kapeila ami kídíem, buluke agér lok gílen bodun? Nonyi agérlo bulum imo tokuka.

⁵ Nolu Ijipt kídíem pemílo, amie bojé yangkai, delokke supak nonyi bulum agérlok itumdung.”

⁶ Delo longepak delo, Pharaoh bí abíl kaabomna kídí emlang agér kaabomna kídíem lulígto.

⁷ “Nolu ami kídíem ita pídope ammungem biyimapeka. Bulum agíem ammungem mata sumolangka.

⁸ Idola kerangke iitang pínam pakpe pímolangka, delokke iitang atel kote anyo yadope pímo mapeka. Bulu ríksodung, dekepe ila bulu, ‘Ngoluk Shédíkíng ipak idope, ngolum gímolangka,’ emla ngolum rogu-gutídung.

⁹ Milokong kídí legape agérem tebegyape imolangka, delokke buluke menam agomem tatmapeka.”

¹⁰ Delo abíl kaabomna kídíe lang, agér yébona kídíe gílangkula ami kídíem pokan gooto, “Pharaoh bí sikepe podung, ‘Ngo nolum ammungem biyimayé.

¹¹ Nolu agísue magoosula, ammungem matasulangka. Idola noluk agérem anyong kote améyape imayé.’ ”

¹² Depeila ami kídíe, Ijipt lokke rego mipílo ammung kakoem matala gíyin gooto.

¹³ Abíl kaabomna kídíde, ami kídí teyolo mika-ralnampe rallíkla luto, “Nolum ammung bidungem kapekísa longe mipílo agér itodí, deke pakna agéreme loodípe ilangka.”

¹⁴ Abíl kaabomna kídíke, Israel ami lok agér kaabom dope ullennam kídíem demla mola delokke lutíto, “Nolu kape iitangem kerangke akampakpe loodíem pímane?”

¹⁵ Dekepe ití bomkolok, Israel kídíke agér ruutum kídíde Pharaoh kelo gíla roguto, “Kape no, nok béérang kídíem sipe ikan?

¹⁶ Nok béérang kídíem ammung bimang idola, ‘Iita pílangka,’ emdung. Nok béérang kídíem dembomdung, idola imemde nok agí amilo kadung.”

¹⁷ Pharaoh bí poyan suto, “Nolu agér igotna ríksona kídí, sipe ilamin nolu, ruutum kíng ipak idope gílaju emla mandune.

¹⁸ Supak agérlo ilangkuka. Nolum atí ammung bimayé, idola nolu akampakpe iitangem pílangka.”

¹⁹ Kerangke itang pínam kísapakpe, loodí mipíem pílangka, emnam sim tatrodem bulu ebín alongkai emla, Israel kídíke agér ruutum kídíde kénsukai.

²⁰ Pharaohke keralok buluke lendokuem, Mosi melang Aaron me bulum dakyadupe bulu kaarík suto.

²¹ Bulu Mosi melang Aaron me popasuto, “Nonyi ingkokodí itone dekedem Ruutumbí kaato, depeila ngoluk teyolo Pharaoh melang ruutum kídíem aklímonam legape, bí nonyim ajéng iyé. Nonyi ngoluk teyolo mokadope bulum séguko kénmoto.”

Shédíke Ipítyé emla Pésuname

²² Delo Mosi bí Ruutum kíng aalat sula poto, “E Ruutum, ami kídí teyong so, no kape adírem bomangkan? Sok legangpía no ngolum lulík tone?

²³ Nok amínpe ngokke Pharaoh kelo gíla porongem, bí ami kídí teyolo adír yape ibomdung, delokke no agíke ami kídíem atí ipítmang.”