EPHESIA 3 - DEENA BAIBÉL (BSI)

Paulke Mipak Kídí Legape Agér Gérname

¹ Sok legape Mipak kídí nolukeepe, Kristo Jisuke leganglo pateklo duuna Paul ngo Shédíkíng kumdung.

² Noluke legape ngom bitonam Shédíke yanggolok yége bomdope bilíknam legangem nolu berokpe tatto.

³ De ngokke andepe atbitonam kísape ngom irisinyo lengkan namlok kénpí manam atíem kénmoto.

⁴ Demílo sim porikolo, Kristokíng keníí penam atíem ngokke erbomnam legangem nolu tatkényé.

⁵ Sim supak Deena Aidlok Shédíke deena tomlíknam ami delokke kotoki kídílo kape kísa kénmotodí, kerangke yérumdelo dekepe imangai.

⁶ De éérína arang atode tatpona ngiitomlok Mipak kídíe Israel amikídílo ruutum doge bosu kuname, amíl atellok olekonsue, delokke Kristo Jisukíng pébi sunamem tarong kabo sunamde.

⁷ Shédíke ralnam agér gérkolok lenne yanggong aman isaplok ngiitom pobopena béérape ngo ikai.

⁸ Shédíke takam rumkíng amilokke rumkí yana amipe ngo iduakom, Kristoke kénpí yimanam mirem legangem Mipak kídílo pogoo bodope sim yanggong sim ngom bilíktung.

⁹ Delokke takamem pílenna Shédíkelo yétonam tabungem mesupnam, kénpí manam atíem yébomnam legangem mipilem kénpope kénmo tungku.

¹⁰ Shédíke míínamde supakke mondoli rulok Shédíke deddína kénnam gyanem teyong yétalo yébo ibona Ruutum kídíem kénmo dokupe emla mííto.

¹¹ Ngoluke Ruutum Jisu Kristokíng iyin líktonam duuyar penam legape Shédí bí depe itung.

¹² Bíkkíng delokke bím míngke sukolok ngolu Shédíkíng míngke sunam loklang míídíng sunamlok roguladung.

¹³ Delok legape, ngo nolum podung, ngokke adír kolok noluke aapíe amémapeka, si noluke ikum penam legapemin idune.

Kristoke Ayange

¹⁴ Sok legape ngo Abuke keralo lebíng koníla kumdung.

¹⁵ Bíkke lokmin teyong lokkela among sokke ekum rarung amíne lendune.

¹⁶ Bíkke angun ralnam miremlok noluke aapí ainalo bíkke Aidlok pauarem bila nolum ralmodope emla ngo kumdung.

¹⁷ Depe inamde Kristo bí noluke aanglo míngkelok duudope emla iname. Delokrongem nolu ayalo appír pírketla edíípe duudope emla ngo kumdung.

¹⁸ Depe emnamde Shédíke ami takame atelkope, Kristoke ayang de edítko kedon dudí delokke eerídudí, edítko bortak dudí delokke bodong dudí, dem tatkén kangkén nana ralnamem paadope,

¹⁹ delokke Shédíkelo apíí píílí dope kénnamem pakyana ayang sim kéndope inam komino.

²⁰ Supak agí pauarlok ngoluke aralo agér gérla ngoluke takam konam demangkom mínggo sunam empemílo sankén yimadope agér gérbona,

²¹ bíkke amíne mondoli delokke Jisu Kristokíng takam siirum mipilo duuyar míndak langka. Amen.