EPHESIA 1 - DEENA BAIBÉL (BSI)

¹ Shédíke míísalok Jisu Kristoke tomlíknampe binam Paul kelok Ephesolo deena ami Kristo Jisukíng míngkesuna kídílo:

² Ngoluke Abu Shédíke yétalo aid amanlok ayang igul bina ngoluke Ruutum Jisu Kristoke Abu, Shédíme yidge daklangka.

Kristokelok Aid Amane

³ Kristokíng mipíem Shédíke yétalo aid amanlok ayang igul bina ngoluke Ruutum Jisu Kristoke Abu, Shédíme yidge daklangka.

⁴ Legade, bí ngolum pílen ballen kerangoo pekai bíkke keralo deedokupe delokke géépe lupenam kamadope bíkkíng langaasuto.

⁵ Bíkke míípo sunam míísalok Jisu Kristoke oo kídípe idokupe emla ayanglok bí ngolum ruulentung.

⁶ Bíkke ayanam Oolok bíkke ngolum asampe aman binam legape, Shédíke angun ralnam yanggong legape bím yidgelaju.

⁷ Bíkke ngolum iyyilok dorpít suku namem, paabem mesam binamem, Shédíke yanggong mirem akorlok ngolu paadung.

⁸ Delo ngolum míínam delokke tatkén kangkén sunam emteng bilíktung.

⁹ Delokrongem bí bíkke mínggí sulok bíkke mííbom sunam arang aapíem ngolum kénmoto, dem Kristokíng bí metak sulík bitung.

¹⁰ De aro moodíe pííyém Shédíke ipíí bopenam mííbom namde, takamem teyongke dokom, amongke dokom, Kristo meteng lutaksula ruutum atelkolo takam pínamem laadum sudokupe emla itung.

¹¹ Agíke míísang míídulo gyapdope agér gérna rungkorlok ngolum ruulenbona bíkkíng ngolum ullík sutung.

¹² Demílo, kerape Kristokíng míínamsuna kídí ngolu Shédíke erkínam ralnamem yidgelaju.

¹³ Noluke turge penam ngiitom tatponem, aro agomem noluke taddo delo nolumkom Kristokíng laatak sutung. Nolu Kristome arue emla míídung delo Shédí bí bíkke emla nolukíng iyod soktamem bíkke pébisunam Deena Aidlok tuplíktung.

¹⁴ Ngolu bíkke amikídíe Shédíke pébi sunam atíem paayé emla míína nade Aidde, delokke de Shédí bí bíkke ami kídíem mínge sumanamem apíípe biyé emla ngolum berokpe míísu modung. Bíkke angun ralnamem yidlaju!

Paulke Kumname

¹⁵ Sok legalok, noluke Ruutum Jisu Kristokíng míngkengem delokke Shédíkelo míngkesuna ami kídíem ayanam legangem kerango pekai ngo tatto.

¹⁶ Noluke legape yidge namem ngo mepénmang. Ngo ngokke kumsukolo nolum míípang suyardung.

¹⁷ Nolu bím kénbee yadope emla ngoluke Ruutum Jisu Kristoke, angunlo ralnarung Abu Shédí bí, nolum Aid legang kénnam emlang irisinyo lengkan namem bidope emla ngo kumtídung.

¹⁸ Míngkesuna kídílo binam angun ralnam miremem dunggedope, delokke nolum tomlen bomnam míínam sunamem nolu kénsudope emla noluke amig aange esaa dopete ngo kumdung.

¹⁹ Delokke de edítko arope míína ngolu kepe bottena ralname. De ngolukíng agér gérna ralnamde bíkke tolnamrunge.

²⁰ Delok ralnam delok bí Kristome sikolokke kiirep nalangkula delokke bím bíkke teyong yétalo bíkke lakbíklo duumotoku.

²¹ Delo teyong ruutum, mite migom, tolnam ralnam, yékol dakkol, yéduu sokke petommang yépenam longe telokke opín ogong amín takamem Kristo bí ruutum bomdung.

²² Delokrongem Shédí bí bím takam atíem bíkke ale rumkílo metung delokke mondoli lokke atí siri takam teyolo dumpoope bím melíktung.

²³ Mondoli de Kristoke amíle, takam atíem bí agísue apí píílí dungge sudung.