EJRA 6 - DEENA BAIBÉL (BSI)

Dariaske Mataname Delokke Atyan Sukuname

¹ Delo Darias rojake lulíglok, Babilon lo roja legí-legang atí mepom kumsunglo menam porman kakot kídíem matato.

² Idola Media amonglok bottena luune Ekbatanalo rumkíngke atnam sim tídla menam kitab kolo paatoku:

³ “Sairas rojake rojape ilendo kerayalum dítak delo bí Jirusalemlo duuna Kumkeng Ekumdem morep dokupe ukumko bilento. Kumkeng Ekumde kedone 27 mitarpe ipe aido, delokke bortak ekom 27 mitarpe ipe aido.

⁴ Suppiem líítam lok paarep angumko, delokke siipang lok arep atelko ipe aido. Abal pitgíng takamem rojake kumsung lok bipe aiyé.

⁵ Delokke Jirusalemlo duuna Kumkeng Ekumlok laalenla Babilonlo Nebukadnejjarke bomkunam, uun, delokke baldín ekung-bati kídí emkom langa langkula Jirusalemlo duuna Kumkeng Ekumlo bomalangkula, dekedem mekorunglo melangkuka; delokke dekedem Shédíke ekum runglo mekupe aido.”

Agérem Ibomtetedope Dariaske Ukumname

⁶ Delo Darias sikepe atyansutoku: “Anggo Euphrates lok gobonor Tattenai, Shethar Bojenai, delokke nonyim igul bosuna Anggo Euphrates lokke migom kídí. Kumkeng Ekum deloge mooteng langka,

⁷ delokke Shédíke Kumkeng Ekum monam agér deme isi-imo motokuka; Judah kídílok gobonor emlang Jihudi kídílok miro kídíem Shédí ke ekum dem kerang dungko runglo momolangka.

⁸ Delok teyolo Shédíke ekum sim mokunam legape nolu Jihudi miro kídíem kape igulpe aiyédí dem ngo ukum líkdung: Agér ikolo inyi-siso paamadope nolu sim ami kídí sim agér ireem Anggo Euphrateslok kajanang paanam, rojake kumsung loge laalenla dengemape, delokke apíngpe bipe aido.

⁹ Delokke ingkuem bulu mííyédí, rubo bopang kídíem, mérboem, delokke mér kídíem teyong among lok Shédíme rombipenam aman takamem, demangkom géhu, alo, onggur alang, demangkom olib télem Jirusalemlo miri kídíke míínam akorpe bulum mepénmape loodípe bilangka,

¹⁰ bulu teyong amongke Shédíme ashéng mona ipagem ilíkla, roja kelang bík oo kídí turnam legape kumbidope.

¹¹ Delokke teyolo ngo lulígdung, séko sim ukum sim igemayédí, bík ekum lok baareko satla, dem yarjong pala bím níkkanayé, delokke bík ekum dem deemang yoppompe imoyé.

¹² Elo agíke amínem duumona Shédíbí, sim ukum sim ie-sikurna teyolo, delokke Jirusalemlo duuna bík ekumem inyokpe ina roja, demangkom amiem laapak daklangka. Ngo Darias sim ukum líkdung. Sim apíírupe igap bomlangka.”

Kumkeng Ekumem Moyinlangkula Tosak Líkkuname

¹³ Delo, Darias rojake ayon melíknam ayonpe, korong rotkon amonglok gobonor Tattenai, Shethar Bojenai, delokke buluke ibosutíng kídíe Darias rojake lulígnam dem airupe igeto.

¹⁴ Delokke Iddoke oo Jekhariah kelang kaalu miri Haggaike pobeng bikolok, Jihudi miro kídíde Kumkeng Ekum dem mokunam agérlo edíngrupe gérbomto. Bulu Israellok Shédíke lulígnam, delokke Parsia lok roja kídí Artajarjes, Sairas, delo Darias buluke ukum loge ekum dem moyinto.

¹⁵ Delokke Kumkeng Ekum sim Adar poolo lokke longumnana longelo, Darias rojake dítak akkénape rojape ruutum bomdo delo bulu moyinto.

¹⁶ Delo Israellok ami kídíe, miri kídíelang Lebi kídíe, delokke monnyokko loge abíd aalatsukuna kídíe Shédíke ekum sim tosak líknam agér sim ashérupe ibomto.

¹⁷ Tosak líkkolo bulu rubo língkoko, mérem líínyiko, méroem líípiko ipak amanpe, delokke Israel ami takamke paab legape bénbo dorying kolang dornyiko, Israel opín isap adupe bito.

¹⁸ Delokke Mosike kitaplo atnampe bulu Jirusalemlo Shédíke agérem ibidope miri kídíem orek-orekpe, delokke Lebi kídíem opéé-opéépe parlíkto.

Gíbong Gíídí

¹⁹ Kerang anggena poolo lokke longe looying kolang loopi nanalo monnyokko loge aalatsukuna ami kídíde Gíbong Gíídíem loodum bomtoku.

²⁰ Kapeila miri kídí delang Lebi kídíde lekope agíem pídésula, bulu takame deetoku. Dekepeila bulu monnyokko loge aalatsukuna ami kídí legapelang miri angong kídí legape, delokke buluke legang supe Gíbong Gíídí mér bénoem petto.

²¹ Abílpe yénam loge aalat sukuna Israel ami kídíe, delokke edítko Ruutum Israelke Shédíme kumsupe mibo among lokke deemang-amo loge agíem deenampe mengusutodí, bulu takame dobosuto.

²² Delokrongem bulu siiyé líkmanam ettíng domanem longe kíníd kope ashérupe nyoto, kapeila Ruutum bí bulum ashémoto, delokke Israellok Shédíke Kumkeng Ekumem monam agérlo bulum iguldope Assiria lok roja aapíem bulukelo mííbangdope ruulíkto.