EJRA 1 - DEENA BAIBÉL (BSI)

Jihudi Kídíem Gílat Sudokupe Sairaske Ukumname

¹ Parsia lok roja Sairaske ruutum bomdo kerang dítak delo, Jeremiah kelok ponam Ruutumke agome apíídope emla, Parsia lok roja Sairas bí bík among takamlo pokan goola delokke sim atkandope, bík aapíem Ruutum bí utlíkto:

² “Parsia lok roja Sairas bí sikepe podung: Ruutum teyong amongke Shédí bí tani among tabungem ruutum bomdope ngom bitung, delokke Judah amonglok Jirusalemlo bím ekumko mobidope emla ngom políktung.

³ Bík ami kídíe séko bulu noluke gooralo kadudí, bíkkíng Shédí bí yémín gedaklangka, delokke Judah amonglok Jirusalemlo bím enmolangkuka, delokke Ruutum Israelke Shédíke ekumem anípe momo langkuka.

⁴ Delokke íngko amonglo turkíla duuna eke kadudí, delok among delok duuna kídíe Jirusalemlo duuna Shédíke ekumem mokunana legape biman supe bisunam ato-siro kékon loteng, baldín, uun, delo abíd-abíd ekurang, delokke gooru-sobén kídílok bila bulum igulpe aido.”

Gílatkunam Legape Irungname

⁵ Delo Judah kelang Benjaminke erang abu odong kídílok ami migíng kídíe, miri kídíe, delokke Lebi ami kídílok, Jirusalemlo duuna Ruutumke Kumkeng Ekumem modokupe aapíem rulíknam ami kídíe enkupe emla rurepto.

⁶ Delokke buluke kumrí-donggong ami takame míísatsula asampe atí-sirí binam teyong loteng baldín pekinglok, uun lok, ekurang abíd lok, gooru-sobén loklang are kanarung ato-siroem bila bulum igulto.

⁷ Jirusalem lokke Ruutumke Kumkeng Ekumlok ekung-bati kídíem Nebukadnejjar ke bomnyok langkula bík uyu kídí ekumlo lengkunam kídí emkom Sairas roja bí laalen bitoku.

⁸ Kumsung ruutum Mithredath kelo sim ato kídí sim Parsia lok roja Sairas bí bilíkla, bí Judahlok gobonor Sheshbajjar kelo kíkanbito.

^9-10 Dem ekurang kídídem sankíname, takamem kídumsula: Aman binana uun ekunge 30 ko Aman binana baldín ekunge 1000 ko Abíd ekunge 29 ko Aména uun ekunge 30 ko Aména baldín ekunge 410 ko Abíd peking-pesage 1000 ko.

¹¹ Uun delokke baldín ekung, delo abíd peking-pesage idumsula 5,400 ko katuai. Monnyoknam ami kídíe Babilon lokke Jirusalemlo aalat toku delok Sheshbajjar bí sim takam sim bomatoku.