EJEKIEL 47 - DEENA BAIBÉL (BSI)

Kumkeng Ekumlok Korong Biilenne

¹ Delok rongem amide ngome Kumkeng Ekumlo angko lamgé delo aabotoku. Delo kaatoname, sanggo danpe Kumkeng Ekum delokke mikmo gekampe ila Kumkeng Ekumke lamgé ara delok asi korongko biilenla sanggo danpe biilendo. De korong de Kumkeng Ekum lokke sokko danlok lenla, runggu delok sokkodan lok biila ido.

² Delo amide ngome Kumkeng Ekum aradelok gílen bolangkula línggíng lamgé lok lenbo langkula sanggo danpe mikmo gekaasuna lamgé delo bilang botoku. Lamgé delokke sokkodan delo korong aménako biido.

³ Delo amide kínana banggén dem bomla asi bitkam sanggo danpe mitar língko pilngoko kíto. Depe irodem bí ngome asi delo siitokdope tomkolok, ngo siitok mínne, aside lekitso saado.

⁴ Depe irodem bí mitar língko pilngo konko kítoku. Delo asi delokke eeríe ngok lebíso isaado. Delok kékonlo amide mitar língko pilngoko kítok toku. Delok asi eeríe ngok uugíso isaado.

⁵ Delok rongem bí mitar língko pilngoko kítoku. Delo aside yagorupe eeríla ngo asi delok gílayimape ito. Depeila ngo byabom suto.

⁶ Delo amide ngom, “Tanike ue, sikesim no airupe kangkén langka,” emla lupodo. Depe irodem amide ngome korong delokke robeng delo aabotoku.

⁷ Edílo ngo robeng delo aatokudí, delo ngo kanggong suname korong delokke robeng annyipak delo deddína atí-atína esingem gardupe kaato.

⁸ Bí ngom podo, “Si korong si sanggo danpe biila, Jordan korolo parík sula, delokke Sina Siyénglo olíkyé. Edílo korong si Sina Siyénglo olíkyédí, delo siyéng delokke alo asiem nyokmo langkula aina asipe imoyéku.

⁹ Korong sokke bingko takam delo atí-atína simon-sili, kebu-pettang delokke engo kídíe kayé. Korong delokke aside Sina Siyéngke alo asiem aina asipe batmo langkula asi delokke bittíng tabudelo ato-siro takamem turyinmoyé.

¹⁰ Korong buklenko Engedi lokke ila Eneglaim loope robeng eelenlo ami kídíe dagla, esabem bomla esap kuuyinyé. Among Raadang Siyénglo engo kanam kísa korong delo atí-atína engoe kayé.

¹¹ Idola yupyang-yuyang kídíemla asi paatang kídíem deemo kumayé. Dekede alo lenkengpe ina alo asipe iyé.

¹² Korong delokke robeng annyi delo sanam yimanam siipí-siiyé gena esingem garlenla iyé. Buluke anne kídíde edílokom ereng yimayé. Buluke ayé kídí dete edílokom suula, oletla imayé. Poolo miyoolo bulu ayé ééyé. Kapeila Kumkeng Ekum lok biilenna korongde bulum asi bidung. Buluke ayé kídí takamde donam ayépe iyé, delokke buluke anne kídíde kinam-ramnamem ipí-dopí sukunana annepe iyinyé.”

Among lokke Rísu Kídíe

¹³ Ruutum Shédí bí sipe podung: “Israelke opín íying kolang annyi aralo amongem jokmík bosupenamem pobidung. Ngok rísu pokampe amongem orpan bosula Josephke oten ome-oolo moolop annyiko panbi langka.

¹⁴ Noluke neku-buku kídílo, sim asi among sim nolu bomyardope ngo alage leedusula bulum bidope togesuto. Depeila among sime nolu orpan bosulangka.

¹⁵ Among sokke rísu kídíe sikepe iyé: Among sokke línggíngdan rísude Among Raadang Siyéng lokke sanggo danpe aalangkula, Hethlon doolung lokke Hamath gééjong Jedad doolung loope,

¹⁶ delokke ila, Berotha, delo Sibraim doolung loope. (Si doolung annyi si Damaskas among yéta keelang Hamath among yéta pénsamlo kadung.) Delok ilen langkula, Hauran distikke rísulo duuna Hajer Hattikon doolung loope.

¹⁷ Depeila línggíng rísude Among Raadang Siyéng lokke ila, sanggo danpe gíla Damaskas kelang Hamath lokke línggíng dan lok gíla, sanggo duutup Enon doolung loope iyé.

¹⁸ “Sanggodan rísude Damaskas kelang Hauranke pénsamlok sokko danpe toklangkula Jordan korong kíng toklík danlangkula Israelem anggodanpe, delokke Gileadem sanggodanpe mela Sina Siyéngke Tamar loope toklíkyé.

¹⁹ “Sokkodan rísude Tamar lokke sokko anggo danpe gíla, asi kako moolop Kadesh Meribah kíng píílík pala línggíng anggo danpe gílangkula Ijiptke among rísuem patlangkula Among Raadang Siyéng lope ilíkyé.

²⁰ “Anggodanke rísude Among Raadang Siyéng robeng robelok línggíngpe saalangkula Lebo Hamath em tuprík suyéku.

²¹ “Noluke opín kídí aralo sim among sim orpan bosulangka.

²² Noluke agínpe bomyarpenam amongpe si iyé. Noluke among orpan suyém, noluke aralo duumín gela ome-oo olíkna mibo miying kídíemte among panbi langka. Bulumkom Israel ami kísape míílangka, delokke Israel kídílo lekope amongem panbo sulangka.

²³ Mibo-miying kídíde ingko-ingkona opín amipe ilai, Israel aralo duuna takamde buluke among tarongem paayinpe aido. Sikepe Ruutum Shédí ngo polendung.”