Biblia Todo Logo
Bìoball air-loidhne

- Sanasan -

EJEKIEL 37 - DEENA BAIBÉL (BSI)


Ereena Along Yiibe Legange

1 Ruutum ke alage ngokkíng leetanlíkla, delokke Ruutum ke Aidlok bí ngome laalenla yiibe raadang kolo melíkto. De along mílípe akume-gera ido.

2 Yiibe delo bí ngome magoobola, sanamyimanam, ereeruna deddína along kídíem among delo dooyindope kaato.

3 Delo, “Tanike ue, si along kídísi turlayékun?” emla bí ngome íído. Ngo bím “Ruutum Shédí no petommin kéndune,” emla poyansuto.

4 Delo bí ngom poto, “Along kídíso no kaalu agomem polangka: ‘E ereena along kídía, Ruutum ke agomem tallangka!

5 Ruutum Shédí bí sim along kídísim podung: Nolukíng ngo nganamem aamola, nolum turyin moyéku.

6 Nolukíng ngo oong kídíem ilíkla, dínbumem lenmola, asig-ayolok ikaplíkyé. Nolukíng ngo nganamem aamola, nolu turyé. Delo Ruutum bí ngo emla nolu kényé.’ ”

7 Dekepeila ngom políknampe ngo kaalu agomem poto. Ngokke kaalu agom podudem ngo adud-ayud eke tatto. Delo kaaname along terenge tuprík-tuprík suyinla lekobosukai.

8 Ngokke dekepe kaadungem along kídí delo oong kídíe kakai, dínbume lenkai, delokke asig-ayoe ilumbomkai, idola amíl kídar delo nganam kamato.

9 Delo Shédí bí ngome lulíkdoku, “Tanike ue, nganam legape kaalu agom polangka. Ruutum Shédí bí sikepe podung emla nganamem polangka: ‘E nganam, rego takamlok aala si simang kídísi turdope simang kídíso aalangka.’ ”

10 Bíkke pokampakpe ngo kaalu agomem poto. Delo sina ami kídí delo nganame aato, delo bulu turkai delokke takame dagrepkai. De sipaying maglíngkope ikai.

11 Shédí bí ngom lulíktoku, “Tanike ue, si along kídí si Israel ami kídíe. Kapeila Israel kídíe, ‘Ngoluke along kídíe ereng alongkai, ngolu atí míída subompenam kaimang, ngoluke yékupenam kaimang,’ emla pobosudung.

12 Depe emkolok buluke teyolo kaalu agomem podola sim emlangka: ‘Ruutum Shédí bí sikepe podung: E ngok ami kídía, ngo noluke ago kídíem iyayé. Ngo nolum dekedelok laalenyéku. Ngo nolume Israel amolo bomayéku.

13 Delo ngok ami kídí nolu, edílo ngo noluke ago kídíem iyalangkula, deke delok nolum laarepyékudí, Ruutum bí ngo emla kényinyéku.

14 Ngokke nganamem nolukíng ilíkyé, nolu delo turyéku, delokke noluke agí among sulo nolum yéyin sumoyéku. Delo nolu Ruutum ngo nolum agí agomem mesiisula, agí agom pokampe agérem ito emla kényéku. Sikepe Ruutum ngo polendung.’ ”


Judahlang Israelke Among Yéta Atelkuname

15 Ruutum ke agome ngokkíng pííto:

16 “Tanike ue, no esing asékko laala, ‘Judahke among yétae,’ emla akorpe asék delo atlíklangka. Depe irongem esing asék konko laalangkula, ‘Israelke among yétae,’ emla asékkon delote atlík langka.

17 Delo asék annyidem kerang eelenlok tupsut sulíkla asék atel kísape kaamodope itoka.

18 Edílo nom ami kídíe, ‘Sikepe inam si ingkue?’ emla ííyédí;

19 delo bulum sipe lubilangka, ‘Ruutum Shédí bí sipe podung: Israelke ayanpe ina aséksim, Judahke ayanpe ina asékso tupsut sulíkla, asék annyi delok ngo asék atelkope ila, ngok alag araso bomyé.’

20 Ami kídí takame kaayindope asék annyidem, nok alaglo bomkan langka.

21 Depe bomkandola bulum sipe polangka: ‘Ruutum Shédí ngo sikepe podung: Israel ami kídíem, buluke supakke yényokko amolok ngo laalenyéku. Buluke yényokko rego mipílok, ngo bulum laadum suyin geyéla, buluke agí amongsulo langaayéku.

22 Bulume ngo Israel dííte kídílo, among kídílo opín atelkope ibosudokupe, leko bosumoyéku. Delo bulu roja atel aralo yébosuyéku. Bulu opín annyikope ingu-irangsula iyimayé, demangkom among yéta annyikope duupansula iyimayé.

23 Bulu belumrunam mimang kídílo deemang akang kalík suyimayé, demangkom paab aralo bulu yétíkumayé. Kapeila ngo bulum arbín langkula, buluke paablo oletkupom kídílok ngo bulum mopítyéku. Dekepe yéyékuem bulu ngokke amipe iyé, delokke ngo buluke Shédípe iyéku.

24 Dekepe iyékuem, ngom agér ibina Dabid kísana rojako buluke rojape iyéku. Bulu takame mér kaabomna atel aralo kaabom kosuyéku. Bulu ngokke ayonem igeyéku, ngokke idongem aipakpe bomgapyéku.

25 Buluke neku-buku yépom among, ingko among emdí ngom agér ibina Jakobme bituane, delo among delo bulu duuyéku. Delo bululang buluke oten ome-oo kídíe, delokke bulumteng panmín gena kídíe, agínpe duuyar bomyéku. Delo ngom agér ibina Dabid kísana rojako buluke teyolo agínpe ruutum tumyar bomyé.

26 Ngo bulu kíng aapí eetet genana daapongko ibosuyé. De duuyarpena daapongpe iyé. Ngo bulum edíímola, amiem parmola, ngokke deena Kumkeng Ekum emteng agínpe duuyardope delo molíkyéku.

27 Delo ngokke dungkolem, buluke aralo ilíkyé. Bulu ngok amipe ila, ngo buluke Shédípe iyé.

28 Edílo ngok Kumkeng Ekumem buluke aralo molíkla agínpe duuyar moyékudí, delomin opín-buang daadie, Ruutum ngo Israel ami kídíem deemone, delokke Israel kídarsi ngokke ateksu amirunge emla kényinyéne.’ ”

Adi (Re-edited) Bible - Deena Baibél

Copyright © Bible Society of India, 2012.

Used by permission. All rights reserved worldwide.

Bible Society of India
Lean sinn:



Sanasan