EJEKIEL 29 - DEENA BAIBÉL (BSI)

Ijiptme Lukaname

¹ Toodí takying lokke poolo íying delokke looying kolang loonyinana longe delo Ruutum ke agome ngokkíng pííto:

² “Tanike ue, nokke atuk-migmoe Ijipt lokke Pharaoh roja kíng geka sudola, bímla Ijipt ami tabungem lukaanam agom sim ludola,

³ sipe lulangka: “E Ijipt lokke roja Pharaoh, nokke korong kídí aralo ketgoona bíríbít no, ngo nom kangkikai. ‘Nail korong si ngokke. Sim ngo ngokke legape píto,’ emla no agísuem lukím sudung.”

⁴ “Idola nokke iipang kídí delo, ngo gakarem ilíkyé, delokke nokke asig-ayo delo, korong kídíke engo kídíem, gyapmín gedope ilíkyé. Depe irongem nom ngo korong kídílok engo takame, nokke asig-ayo delo gyapmín gela lenmíndope holenyé.

⁵ Nom lang nokke engo takamem, ngo yépol amolo melíkyé. Nok amíl-amode kédélo dooyé, idola sékote yusina kamayé. Ngo nokke amíl-amo deme, nyomrang lokke monkír kídíem dodope, delokke asar lokke pettang kídíem dodope ruulíkyé.

⁶ “Depe iyém Ijiptlo duuna takame Ruutum bí ngo emla takame kényinyé. “Ruutum bí podung: Israel kídíe nome iguldope nokkíng míídasutuai, idola no tolmana dolbum asék empemílo looríyamanako.

⁷ Edílo bulu nokkíng gagdasutodín, no dírgela, buluke lakduem níkla, buluke lamku ugíngem etmoto.

⁸ “Dekepeila Ruutum Shédí bí sipe ludung: Ngo nok teyolo mimak yokseme langaayé, delokke nokke ami takamem, delokke simon-sili takamem petyinyé.

⁹ Delo Ijipt amode atí kaimana mooruk amope iyéku. Delo Ruutum bí ngomin emla bulu kényinyé. Kapeila no sikepe manto, ‘Nail korongde ngokke, ngomin korongdem pítone,’

¹⁰ dekepeila ngo nokkelang nokke korong kídíke mirupe ikai. Ngo Ijipt amongdem kumruk-mooruk amope Migdol lokke Aswan lok ilenla Ethiopia rísulope imoyé.

¹¹ Tanidak tarodak sékote delok gíyimayé. Toodí takying appikope sékote delo yéna kamayé.

¹² Ijipt amongdem pupak-puyaknam among kídí aralok mooruk amongpe ngo imola, nyokyinkuna doolung kídí aralok byakrukla kumrukpe ina doolungkope toodí takying appikope imoyé. Depeirodem ngo Ijipt ami kídíem tani among sokke rego mipílo monpan-monransula yépit-yéyit goomoyé.

¹³ “Ruutum Shédí bí sipe podung: Toodí takying appiko irongem ngo monpansula yépit-yéyitgoona Ijipt ami kídíem goodum suyéku.

¹⁴ Buluke abílpe yékolok, ngo bulum langaa langkula buluke neku-buku aro among Pathroslo duuyin moyéku. Idola de ralmana among yétakope iyéku.

¹⁵ De ralmayalumna, améyalumna among yétape ilangkula, abíd-abíd opín-buang teyolo edílokom botte-hanepe lengkan sulayimayé. Ngo bíme yagorupe ralnam atí kaimadope ila, bí edílokom angukon opín-buang teyolo rojape ila yimayé.

¹⁶ Dekepe irongkuem, Ijiptde edílokom Israelke míída sukengpe iyimayé. Delok ayanpe bulukíng míídasula míímem aloosuto, emla kangkén nanape iyé. Delomin bulu, Ruutum Shédí bí ngo emla kényéne.”

Ijiptem Nebukadnejjarke Língapename

¹⁷ Toodí takying annyi kolang dítak kínídke kerayalum poolo delokke kerayalum longe delo Ruutum ke agome ngokkíng pííto:

¹⁸ “Tanike ue, Babilon lokke roja Nebukadnejjar bí Turem mimak iyabomkai. Bíkke sipaying kídíeme yagorupe tebegna eget gemola, buluke tukkue tuklokkai, delokke buluke gordunge along petompe ikai. Idola bíla bíkke maglíng kídíde dekena midu-mimak atí ire paamangkai.

¹⁹ Dekepeila Ruutum Shédí bí sipe podung: Babilonke roja Nebukadnejjarme ngo Ijiptem biyé. Delo bíkke maglíngke koret arepe bí Ijiptem lííla, Ijiptke miremem bomyéku.

²⁰ Bíla bíkke maglínge ngome agér ibinam legape, Ijiptem ngo amanpe biyé. Ruutum Shédí ngo sipe podung.

²¹ “Delo longe delo Israel erangme ngo miga-miramna opínkope imoyéku. Delo Ejekiel nome daadi takamke tatpomlo agom-aangem lumoyéku. Delo daadi takame Ruutum bí ngo emla kényinyé.”