EJEKIEL 28 - DEENA BAIBÉL (BSI)

Turlokke Rojem Lukaname

¹ Ruutum ke agome ngokkíng pííto:

² “Tanike ue, Ruutum Shédí bí sikepe ludung emla Turke rojaem pobilangka: No aapí míngkímsula, ‘Ngo uyu bottenako! Siyéng asi raadalo uyulokke roja palenglo ngo duudung,’ emla lusudung. Idola no uyumang. No tanikomin. No agísuem uyu kísa botte-hanerupe míísuduakom no angukomin.

³ Ingkona legang emteng nokkelok rumsup lamadope, no Danielme pemílo kényanakua?

⁴ Nokke kénnam lok, gyanlok no agísuem mirempe isuto. Nokke kumsunglo deddína uunem, baldínem leesisuto.

⁵ Nokke pesi-koret ijinglok bojérupe, no jéla-remla ikai. Nokke mireme nok aapí-aangem míngkím sulenmoto.

⁶ “Depeila Ruutum Shédí ngo sipe podung: No uyu kénnam kísa kéndung emla míísukolok,

⁷ opín takam aralok atírumana mibo opínem, nome mimak iyabomdope ngo ruulíkyé. Bulu nokke kampona kénnam teyodelo yoksem killíkla, nok angun-abéem papakyé.

⁸ Bulu nom doorum-líísam amolo oletmoyé, no siyéng asi aralo atírumape ila silíkyé.

⁹ Nokke depe iyém, nome mokana keradelo, ‘Ngo uyuko emsulayén?’ Nome mokana keradelo no uyupe imayé. No tani kopemin iyéne.

¹⁰ Dínbíng iyod sumana mibo-miying alag aralomin no silikyéne. Sikepe ngo Ruutum Shédí polendung.”

Tur Rojake Oletkuname

¹¹ Ruutum ke agome ngokkíng pííto:

¹² “Tanike ue, Tur rojake teyolo pengé miri sim lula bíme polangka, Ruutum Shédí bí sikepe podung: “No apíírupe kampona, gyan kénname bíísétna, apííruna emkeng aralokke kaayii supenampe inakuai.

¹³ No Shédíke baganpe iko Edenlo yétuai. No kampo-kampona elíng tadogem lunggupe tugela genakuai. Deke aralo: yalíng kangorna rubi elíngem, yagéna topaj elíngem, yayina Emarel elíngem, yaying yagéna krosolit elíngem, morí kasuna oniks elíngem, yaying yalunna jaspar elíngem, yasina sapphir elíngem, yaying yasina turkois elíngem, delokke yasing kangorna beril elíng kídíem tadokpe ila, lunggupe tugeto. Nokke abíd lunggu kídídete, uun kotírlok pínam lunggupe ito. Deke takamdem, ingkona longelo nome pílentodí; nok legape irubito.

¹⁴ Pídélíknam kaabomna Sérubimko nome kaabomdope ngo lubééla tosaklíkto. No Shédíke deena díítelo yéla, eme dorna elíng kídílo gígoola ine.

¹⁵ Nokkíng paab kamang adape, nom pílen lokke ila, nokke ségu-siyang takamde, atí lukaapenam kamato.

¹⁶ No moodí takamlo pesi-koret itígoola, de agér kídíde, nome mirolpe roltí goomola, no paab agér ikai. Depeila ngo nome ngokke deena díítelok, gígémoto, delokke nom kaabomna Sérubimde, eme dorna elíng kídílok nome monpakto.

¹⁷ Nokke amíl-amo, atuk-migmo kampode, nok aapí-aangem míngkím sumoto. Nok angun-abéde, nokke kénnam gyanem, bopolpe polmoto. Depeila roja kídí takame kangkén suyépe emla, takamem gomot lengkannape, nom ngo amolo eltoklíkto.

¹⁸ No pesi-koretlo megoo-yatgoola, deddína paab agér inam legape, no agíke kumsuko moolop kídíem, deemang mayin sumoto. Depeila ngo nokkíng ememe dorlen sumola, nom agíem guka sumoto. Nome kédénglo metpipe doomoto. Depe inamem deddína ami kangkolo imoto.

¹⁹ Nome kénna, deddína opín-buang takame, nokke tong-aryangem kaala, nokke kísa ipelo emla yirí-pedípe mííyin gekai. No nyokkai! Agínpe no nyokyarpenape ikai.”

Sidonem Lukaname

²⁰ Ruutum ke agome ngokkíng pííto:

²¹ “Tanike ue, nokke mikmoe Sidonme mirupe kaadola lulangka,

²² delokke Ruutum Shédí bí sipe ludung, emla bíme lubi langka: “E Sidon, ngo nokke mirupe ikai. Nok teyolo ngokke agér inam legape, ami kídíe ngome yidgeyé. Edílo ngo bíme ngokke deenamem lengkansula bík teyolo itung-iréyédí, Ruutum bí ngo emla bulu takam kényinyé.

²³ Ngo bíkke teyolo kilii-ramliem melíkyé, delokke bíkke bedu-bedalo iyyi biimoyé. Rego mipílok midu-mimage bím aabomla, bíkke deddína amiem paka-níkkayé. Delomin Ruutum bí ngo emla bulu kényéne.”

Israello Utepooro Kayé

²⁴ Ruutum bí podung: “Israelme dunggobomna, lupu-luléna kumrípe ina mibo-miying opín kaimayé. Israelme tanyum-tatképe itíbomna mibo kumrí kaimayé. Delomin Ruutum Shédí bí ngo emla bulu kényin yékune.

²⁵ “Ruutum Shédí bí sipe podung: Israel kídíke mibo-miying amolo yényok-poksokla igongko amolok, edílo ngo bulum goodum suyékudí; opín-buang takame kaayindope, ngo agísuem deenape buluke keralo lengkansuyé. Delo longe kídí delo, ngom agér ibina Jakobme ngokke binam, buluke agí among sulo bulu duuyin suyéku.

²⁶ Delo bulu eetetrupe yéyéku. Bulu dengomrupe ekum kumlangkula, arík ilangkula, atí peso kamape bulu yéyinyéku. Delo, bulum luka-lééna buluke kumrí ami kídí teyolo ngo itung-iréla ibomyéku. Delomin ngomino Ruutum buluke Shédí bí emla bulu takame kényin yékune.”