EJEKIEL 25 - DEENA BAIBÉL (BSI)

Ammonme Lukaname

¹ Ruutum ke agome ngokkíng pííto:

² “Tanike ue, nokke atuk-migmoe Ammon kídí kelo gekasudola, buluke teyolo sim lukaanam agom sim podola,

³ bulum lulangka: ‘Ruutum Shédíke agomem tattola. Ruutum Shédíbí sikepe ludung: Edílo ngokke deena Kumkeng Ekumem deemang motodí, edílo Israel among yétaem loorímape itodí, edílo ngokke ami Judah kídíem umnyoktodí, delo nolu, “Airudo,” emla ashénam legape,

⁴ nolum ngo sanggodan lokke mibo ami rumkílo yédope ruulíkyé. Buluke maglíng notkuem noluke pénsamlo ilíkla, bulu noluke siipí-siiyé emla gakír kídíem dokam-tíngkamyé.

⁵ Ngo Rabbahem uut simon kídíke dota gongkepe, delokke Ammonme mér kídíke ippom-dopompe imoyé. Delomin ngo Ruutum bí emla nolu kényéne.

⁶ Kapeila Ruutum Shédí ngo sikepe ludung: Israel kídíke teyolo noluke aapí-aang atímana ségulok alage tatapila, ashélok ledue pogon-byaronla iga legape,

⁷ ngok alage noluke mirupe lengonla miru kídarke língkepe, nolum imoyé. Ngo noluke opín-buang aralok nolume papakla, among yétalok nyokyinmoyé. Ngo nolume siyinmoyé, delo Ruutum bí ngo emla nolu kényinyé.’ ”

Moabme Lukaname

⁸ “Ruutum Shédí bí sikepe ludung: ‘Kaatola, Judah ami kídíete abíd opín ami kídíke akampe ikai,’ emga legape,

⁹ Moab keelang Seirke yapgo doolungpe duuna kídí takamem kaadope iyinmoyé. Beth-Jeshimoth delokke Baal Meon emlang Kiriathaim doolung kídílok ilenla among yéta takamke angun-abé kídíem mimak aayinmoyé.

¹⁰ Ngo Ammon kídí kíng lekope Moab mete sanggodanke ami kídílo, buluke líínam ekurang akonpe idope ruulíkla, ngo Moabme opínkope iyimape nyokyardope imoyé.

¹¹ Moabme ngo itung-iréyé, delo Ruutum bí ngo emla bulu kényé.

Edomme Lukaname

¹² “Ruutum Shédí bí sikepe ludung: ‘Edom bí Israel teyolo edo rayan sulangkula atírumana agérko ito.

¹³ Depeila Ruutum Shédí bí sikepe ludung: Ngokke alage Edomke teyolo mirupe leedusula tanidak tarodak takamem moka kayinyé. Teman lokke ila Dedan loope bulu mimaklo siyinla ngo ato takamem loorí moyimayé.

¹⁴ Ngo ngokke Israel ami kídílok Edomke teyolo edo ralangkula, ngokke aklíng-marlíng akorpe bulu Edom teyolo iyéku. Delomin bulu ngok marnamem kényéne. Sikepe Ruutum Shédí bí polendung.’ ”

Philistia Kídíem Lukaname

¹⁵ “Ruutum Shédí bí sikepe ludung: Miku kídíke longe lokke ila Philistain kídíe Judah ami kídíke mirupe itíla, airumape edo rayan sulangkula Judah amiem nyokyinmope emla inam legape,

¹⁶ Ruutum Shédí bí sikepe ludung: Philistain kídíke teyolo ngokke alage mirupe leedusula bulum mimakpe iyabomla, Philistain yiibelo duuna tabungem nyokyinmoyé.

¹⁷ Ngo buluke teyolo yagorupe itung-iré langkula edoem rayéku. Delo bulu, ngo Ruutum bí emla kényinyé.”