EJEKIEL 23 - DEENA BAIBÉL (BSI)

Deemana Bírme Kumsu

¹ Ruutum ke agome ngokkíng pííto:

² “Tanike ue, ane atellok onam bírme kumsuko kato.

³ Bínyike mimum koo delokkai ila, bínyike Ijipt amonglo duudung adapekai, bínyike mimum amílem deemamola notii mimepe ikai.

⁴ Agu delokke amíne Oholah, delokke aníyang delokke amíne Oholibah. Bínyime annyipakdem ngo nyamram ibosutuai, delokke bínyi ome-uemte obituai. Oholah bí Samari, delokke Oholibah bí Jirusalem.

⁵ Ngokke mimepe idu delokke Oholah bí notiipe ilento. Bíkke aapí-aang de bíkke mííbosunam Assiriame kaabo botíto.

⁶ Kapeila Assiria ami kídíde yayingna ege-galuk gela, gobonor kídí delang sipaying ruutum kídíde guré teyolo dugna kampona yaamé mílípe ito.

⁷ Depeila bulum kaabola, Assiria kídíke gai-gakongna kídídelo bí agí amílem deemang-amo ibosumola, buluke uyu mimanglo kumsu-joosula, bí agíem deemarupe ilíksukai.

⁸ Ijipt amolo bíkke mimum amílem nyokmodo delokke ilenla, bí notiipe iyarkai. Bíkke mimum koo delokke ila, ami kídíe bíkke amíl-amoem ukla, bím deemang-amo ibosutíto.

⁹ Depeila bíkke yagorupe mííbosunam Assiria yaamé kídílo, ngo bíme bilíkto.

¹⁰ Bulu bíme amíl araadope ege-galuk bítkutla, bíkke ome-uem rotbínla, yoksalok bíme pakato. Depeila bíkke legí sigangem mime takame luge-poge bosuyinkai.

¹¹ “Oholibah bí agíke agulokke legí-sigangem kaala-talla, bí dempemílo pakyape, eeríyape notii agérem ila, bíkke agu Oholah mempemílo looríyamangkai.

¹² Bíkom yaaméruuna Assiria sipaying ruutum, gai-gakongruupe ege-galuk gena kídídem, gobonor kídídem, delokke guré sipaying ruutum kídíem yagorupe kaaboto.

¹³ Bíte dekepe agí amíl-amoem deemang iketsumola, kerangke agu inam tuubupe idope ngo kaato.

¹⁴ “Idola bí eeríyape notii agérem gérkai. Babilon lokke mite migom mimang kídíem, líísak etorlo tupket líkla,

¹⁵ yalína morí ilíkla, uugílo uug gin-gela, delokke dumpolo atí-atí moríkana ege dumlup genam kídíem kaala yagorupe sébomto.

¹⁶ Bí dekedem edílo kaatodín, bí bulum yagorupe mííla, Babilonlo kotoki melígla ito.

¹⁷ Delo Babilon ami kídíde aala, bím ketbo-dobosula sébosuto. Dekepe bulukíng bí yagorupe sébosula, ngatbope ibosurongem bí aapíe apééla bulu kelok mootengtoku.

¹⁸ Edílo bí notii agérem daadi takamke kangkolo ikankadí, delokke bíkke amíl araangem lengkankadí, delo bíkke agu keralok ngo kape kísa belumla gígétokudí, dekepakpe bík keralokte ngo belumla gígétoku.

¹⁹ Ijipt amolo bíkke mimum dungem kape kísape notiipe itodí, deke ségupe bí notii agér deme eeríyayang ikai.

²⁰ Bí notii agérdem yagorupe ernyo-erkong erbomla, dekelo tumlíkna gado, demangkom guré kísape ségu kana milokonglo bí matakai.

²¹ Dekepe ila nokke Ijipt amolo mimum koope iduem, kapekísa nokke amíl amoem milokonge iman-isanla nome mimum deenape hanmoyimadope no ikosutodí, dekena notii séguem no lekoda ilíng langkula, abír-ayoem ikupe emla no míngkai.”

Oholibahme Shédíke Kebang Luname

²² “Depeila, E Oholibah, Ruutum Shédí ngo nok legangem sikepe ludung: No nokke sébosunam kídílok aapíe apéékai. Idola nok teyolo bulum ngo marmoyé, delokke bulu nom gargoobomyé.

²³ Ngo Babilon ami kídí takamem, Saldian kídíem, Pekod, Shoa, Koa doolung kídí lokke ami kídíemlang Assiria kídíem aabommoyé. Buluke mite-migom kídíem, miro kídíem, delokke gai-gakope leemosuna yaaméruuna maglíng ruutum kídíem, delokke gurélo dugna sipaying migom kídíem nokke mirupe laadum suyinyé.

²⁴ Bulu deddína mití maglíngem bomala, guré gaariem aabola, delokke dope-tíípenamem bomasula, rego mipílok nome gargoobomyé. Bulu kattam emla tamkung kídíem, delokke mimak dumlubem agíem ipísunanem bomsula nome mimak iyabomyé. Ngo nome buluke alag aralo ruulíkyé. Bulu nome umla, buluke ayonsupe nok teyolo kebang baabomyé.

²⁵ Ngo nok teyolo aklíngnam legape, bulum ngo yagorupe marmola nok teyolo edo ramoyé. Bulu nokke ome-uem rotbínla, nokke nyobungem, nyorungem papakyé. Arope bulu nokke ome-uem turdo-turdope emelo romkayé.

²⁶ Bulu nokke ege-galugem pusin-pumín bila, nokke lungguem rotbínyé.

²⁷ Nokke mimum koope Ijipt amolok yésaa delokkai, nokke atímana notii ségu kídardem ngo nyokyinmoyé. Depe irodem no edílokom Ijipt legangem mííla, demangkom uyu mimang kídíem kaalayimayé.

²⁸ “Ruutum Shédí bí sikepe ludung: Nokke aapíe apééla mííyimala, míípakkunam kídílo nome ngo ruulíkdak.

²⁹ Bulute nome akga legape, bulu nokke ato-siro inam takamem kuruk biyé, delokke nome amíl araape iko teyodelo araa remépe ila meyé. Delo nokke notii amílem daadi takame kaayinyé.

³⁰ Kapeila dekepe igade, nokke opín-buang takamlo abír-ayo igoola, uyu mimanglo deemamola inam tabude nome dekepe imokaku.

³¹ No, nokke agu lokke bedalo gímín genam legape, bíkke bati tíínam atel pakdem nome ngo bila, delok nom tíímoyé.

³² “Ruutum Shédí bí sipe ludung: Nokke bírme bati delok no tííyé, de bottenako, delokke eerínako. Batide bíísétnam legape, mipil-miyoope nome lupu-luléyé.

³³ Nokke bírme Samarike batide, nome tíngír sumola, aré-anyo imoyé, Kapeila de batide nyokmone, delokke ankí-kenomone.

³⁴ No deme tííla, tííjin jinkakyé. Bati delokke dírmík kuna alop kídíde, nokke anyunem sérpakyé. Ruutum Shédí ngo polendung.

³⁵ “Depeila Ruutum Shédíbí sikepe podung: No ngom kénsuyimape, nokke lamkuem ngokkíng gekangsula yénam legape, nokke abír-ayo ila, notii ireem paape aiyé.”

Bírme Kumsuem Shédíke Luname

³⁶ Ruutum bí ngom poto: “Tanike ue, Oholah melang Oholibah me no kebang lubilayén? Belumrunam agér igang legape, bínyime aimang emla lulangka.

³⁷ Kapeila bínyi abír-ayo ila, delok teyolo bínyike alaglo moka-níkkanam kídíke iyyie kadung. Bínyi uyu mimang kídílo abír-ayo ibosuto. Ngokke legape bínyike obinam ome-oo kídíemte bínyi uyu mimang kídílo donam-tíínampe mokala ipakpe ilíkto.

³⁸ Sim petom bínyi imang. Sok teyolote moodí atel paklo bínyi ngokke Kumkeng Ekum emla Sabbathem, nyomape ila deemamola ito.

³⁹ Ingkona longe lodí buluke ome-uem uyu mimanglo paka sulíkla ipak ilíktodí, dekena longepak delo bínyi ngok Kumkeng Ekumlo gíala deemamoto. Sikepe bínyi ngok Kumkeng Ekumem ito.

⁴⁰ “Iruge pépé bínyi mooteng amolok, mibo-miying amiem kotoki melíkla tomtíla amiem aatímoto. Dekepe ami aayéme bírme kumsude írsu-mosula amigem morí-mojoksula, lunggu-lakrum gela,

⁴¹ kampona palelo duuríksula, ngokke binam olib tél emla nampona arí kanem laadumsula, bínyike keradelo tébul kolo dekedem melíkla itídung.

⁴² Depe iyém yépol amolok aana, atí míngeng-mííreng sumana milung adudem tatpayé. De Sabian kídíde aala bínyike alaglo lakrum bítlíkla, dumpolo kampona dumlubem luplíkla iyé.

⁴³ Dem kaala, ‘Abír-ayo agérlok iruknam mimedem bulum ipusiléémoto,’ emla agíeme ngo lusudung.

⁴⁴ Depeila notii mimelo ami ibbosunam kísa, bulu bínyikíng, sétína Oholah kíngla Oholibah kíng immín geyé.

⁴⁵ Deena ami kídíe bínyime, abír-ayo legapelang paka-níkka goonam legape lukayé, kapeila bínyi abír-ayo idung, delokke bínyike alag kídíde iyyi mílípe idung.

⁴⁶ “Ruutum Shédí bí sikepe podung: Aklílok ngomna milungko langaala, bínyime yirí-pedípe míído pelang líímodope imoto.

⁴⁷ De ngomna milude bínyim dabulok gela yoksalok pala, bínyike ome-uem paka-níkkala, delokke bínyike ekumemte eme ríbila imolangka.

⁴⁸ Bínyike abír-ayo inam kísa, asi among tabulo mime kídíde imadope, delokke bulu takamke kaaríd sukepe sikena notii agérem ngo imoyimayé.

⁴⁹ Delokke bírme kumsu nonyimdan nonyike abír-ayo igape, delokke uyu mimang kumgape nonyim ngo itung-iréyé. Delo Ruutum Shédí bí ngo emla nonyi kényé.”