EJEKIEL 21 - DEENA BAIBÉL (BSI)

Ruutum ke Yokse

¹ Ruutum ke agome ngokkíng pííto:

² “Tanike ue, nokke migmoe Jirusalem danpe gekasudola ami kídíke kumpom kídíem lutoka. Israel amongem ludola

³ bíme sikepe lulangka: ‘Ruutum bí sikepe podung: Ngo noluke mirupe ikai. Ngo yoksem hatsula deena amiemlang atímana amiem lekope papakyé.

⁴ Sokkodan lokke ila línggíngdan loope ngokke yokse atímana emlang deena amiem lekope paka kayinyé.

⁵ Ngokke yoksem sobuklo íklík suyimape Ruutum bí sallen suyarkai, emla mipil miyoope tabunge kényinyé.’

⁶ “Dekepe ila tanike ue, sigín langka. Buluke keralo nokke aapí-aange barkénape ila, yagorupe míídír aloola ulo-ayai emgelangka.

⁷ Edílo bulu nome, ‘Kape no sigíndune?’ emla íngkíyém, no sipe polangka, ‘Agom kobor angkupena legape sipe idung. Kapeila mipil-miyongke aapí-aange yolyé, buluke alag kídíe lakbyayé, buluke aid kídíe améngoyé, delokke buluke lebíng kídíe ralnam kaimala danyé.’ Ruutum Shédí ngo sipe podung: Dekena moodíe píídak, dekede arorupe iyé.”

⁸ Ruutum ke agome ngokkíng pííto:

⁹ “Tanike ue, kaalu agomem lula Ruutum ngokke ponam sim, ami kídíem sipe pobilangka: “Yoksako, yoksako, aar kadorupe pínamko, delokke nukutnamko.

¹⁰ Pakanadope píratnamko, yaari angun kísa asirdope nukutnamko. Ngok ami kídíe ngokke irít-lurídem kénsuyimang, iname ashéng emnam kaimayé.

¹¹ Yoksa deme airupe nukuttung. Deme pana-níknadope irutung, deme nukutla airupe pírattung, paka-níkkapenake alaglo leemolíkpe.

¹² E tanike ue, ngokke ami kídíke teyolo deme ilíkyé. De Israelke miro kídí teyolo ilíkla, abíd ngokke ami kídílo lekope sitak suyinmoyé. Depeila nokke angkengem kítsula, kapla-rííla ilangka.

¹³ Ngo ngok ami kídíem ikang kídung, delokke bulu míílat sukumayémílo, sikena atí takam si bulukíng ilíkyé.

¹⁴ “Dekepeila tanike ue, kaalu agomem lulangka. Nokke lakpyo annyie pirík sulangka, delo yoksade lennyi-lengumpe pakup-palatsuyé. Kapeila de pakagoola yagorupe paka-níkkala igoona yokse. De yoksade bulume rego mipílok aabomdak.

¹⁵ De deddína amike aapíem amémola yolmoyé, delokke tupsumoyé. Buluke doolung luuyab, rego mipílok, ngo yoksa delok papakpe irít lenyébong.

¹⁶ E aar kanarung yoksa no, lakbík-lakképe kitgong sulangka.

¹⁷ Delo ngote alage piríksula, ngokke marlíngem eetet moyéku. Ruutum ngo depe polendung.”

Babilon Rojake Yokse

¹⁸ Ruutum ke agome ngokkíng pííto:

¹⁹ “Tanike ue, among atellok bedang annyide gílen bosudope, no bedang annyi aariko jigot langka. Delok Babilon lokke roja yoksem bomla aabomdope. De bedang annyi delokke gípan sukupeko delo esing dííla iyodlíklangka.

²⁰ Iyodkone Ammon lokke Rabbah doolunglo, delokke iyodkone Judah lokke líísak etorkana Jirusalemlo yoksadem bomla aana Babilon rojadem sutlíkdope ilangka.

²¹ Kapeila, Babilon lokke rojade gípansuko bedang annyi delok tupríksuko delo líímé kaape emla tekííyé; bí yogmo kídílok iyodem imoyé, bíkke uyu mimang kídíe tatkíyé; ipakpe gatkatonam taro delokke ayinem kaayé.

²² Delo bíkke lakbíkdande Jirusalemem lengkanyé. Depeila bí Jirusalemem mimak iyabomla yapgoem bénpakdope elínglok ebang isa bomla, líísak etor kídíem tuptír-tupyirdope deddína siiri-silok gaang kídíem ilíkla, delokke deddína líídung kídíem ellíkdope atí-atíem ilíkla, kobung-korungem koola mimak togogem goglíkdope imoyé.

²³ Jirusalem lokke ami kídíe bulume bonying ibosutonade emla denge-poope mííla, sikepe mimak iyabomnam dem aro-sirope míímayé. Idola si mimak si bulume, umyinla buluke paabem míípa sumodope imoyé.

²⁴ Depeila Ruutum Shédí ngo sipe podung: Noluke paab kídíe lengkansukai. Ami takame noluke imemem kényinkai. Noluke ségu takame noluke deemangem lengkanyindung. Noluke atímape iga legape, noluke ajéngpe noluke miru alaglo nolume ruulíkyé.

²⁵ “E deemana atírumana, Israelke miro kídí, nolum itung-irédí longe píngkai.

²⁶ Ruutum Shédí ngo sipe podung: Noluke dumel kídídem taabínsuto, ruutum dumlup kídídem lubbínsuto. Kerang yékampe yéyimayé, opan-arénem ruutum domoyéku, delokke mite-mirem ruutum kídíem olet moyéku.

²⁷ Nyokyinyéku, nyokyinyéku! Ngo nyokyin moyéku. Idola de menape ipoomayé. Jirusalem nome itung-irédope, ngokke ullennam ami bí aamang tetelope ipomayé. Bíkke alag lomin ngo nolum ruulík yéne.”

Ammon Kídíeme Itung-irékupename

²⁸ “Tanike ue, Ammon kídíe Israel kídílo lupu-lulénam legape, bulume Ruutum Shédí bí sipe ludung, emla kaalu agom sim lulangka: “Nyokpak modope yoksako irungla duung, de paka-níkkadope airupe nukutnamko, delokke de yaari garpe garnako.

²⁹ “Noluke kaarí-kaanyo kaanamde mename, delokke noluke líímé tagilde yatne. Nolu atírumaneke, delokke deemaruneke. Nolume itung-irédí longe, noluke yéyin longe píídak. Yoksade noluke alíng kídílo olíkyé.

³⁰ “Yoksadem leemoto! Nolum pílenla olenko amosudelo, ngo nolum íngkí-bengkíyé.

³¹ Ngokke marlíngem eme meyo dortína kísape nolukelo melulíkyém nolu anpaa suyinyé. Níkka-mokakolo ijiiruna, mikír amike alag aralo nolum takam ngo ruuyinlíkyé.

³² Nolum emelok guka kayinyé. Noluke agí amosulo, noluke iyyiem biilenmoyé, delokke nolum sékote míípasuna kaimayé.” Ruutum bí sikepe polendung.