EJEKIEL 17 - DEENA BAIBÉL (BSI)

Pemí Annyi Lolang Onggur Anelo Luyiisuname

¹ Ruutum ke agome ngokkíng píítoku:

² “Tanike ue, Israelke erangem luyisula rupengsunam agomko polangka.

³ Ruutum Shédí ngo sikepe podung: Pemí botterunako katuai. Bíkke amíd kídíde atí-atína morípe ríla alap annyidete yagorupe yamtarla botte alooto. Bí Lebanonlo yobala sidar esing attíngko dírla,

⁴ deme deebom langkula, pesi-koret iko amolo deenga bomlangkula pesi-koret ina ami duupom doolungkolo díílíkto.

⁵ Depe irongem bí Israel amonglok esing amílok laala, ardana kédéng kakolo lelíkto. Agínpe asi katína kédéng delo bí lelíkto.

⁶ De amíde garsala, aag kídíe tarpansuna, andena onggur esingpe ikai. Aag kídíde pemídanpe garyinsaato, delokke appír kídíde kédénglo edíírupe pírtokto. Onggur anede aag mílíe ila, anne mílípe iyinto.

⁷ “Delo amodelote, yagorupe amíde biisame ila, alabe botte ila ina, botteruna pemíko kaato. Delo onggur anede agíke sisangko moolop delok agíke appír kídíemlang aag kídíem, delokke anne kídíem pemíkon delo, asiem bí bojéyape bidope emla garsamola sisaa moyinto.

⁸ Idola dekepe ituakom onggur anedem kerapekai asi kala ardana kédénglo garsa mokolok, bí bojérupe aag kala, anne kala ayé ééla ngelna onggur anepe ito.

⁹ “Dekepeila Ruutum Shédí ngo íngkídung: Onggur anede jéla remla iyédí? Kerangke pemíde anedem, appír kídíem itaksula puubínla, aag kídíem dírmíkla, ayé kídíem ipak-iyakla anedem ere momayénía? Delo esing deme miramna opín-buange milu-mibampe, demangkom ralna amie ralbomsula busan subompenam kamayé.

¹⁰ Onggur anedeme edíírupe díílíkduakom, bí turla sisaayénía? Ereena sanggo asare edílo bíkkíng mutlíkyédí, bí hanmayénía? Bíkke garsangko alop delok bí silangkula bí ereng kumayénía?”

Luyiisunamem Pomík Bikuname

¹¹ Delokrongem Ruutum ke agome ngokkíng aato:

¹² “Mirolpe ina erang sim sipe polangka: Sim luyiisunam legasim nolu kéndunía? Babilonke roje Jirusalemlo aala, bíkke roja emlang miro kídí tabungem Babilonpe enbotoku.

¹³ Depe irodem roja erang akonem laala, Babilon rojalo ai-kampope agom-aang tatbosula yébosudope bonying ibosula pésumoto. Depe irongem bí asi among delokke gai-gaina miro ami kídíem enbotoku.

¹⁴ Depe inamde Israel opín kídíe atung-arééla, milung-mibam yimape, bím mimak ikí sulayimadope, delokke bíkkíng ibosunam bonying ayon petomlok turkíla yédope emla iname.

¹⁵ Idola, bonying ila menam rojade bíkke mirolpe irep langkula, guré loklang sipaying maglíngem bojérupe biguldope Ijipt rojalo kotoki melíkla ito. Bíkke dekepe inamde apííyénía? Dekepe ila bí mopít sulayénía? Bíkke dekepe bonying ibosunamem betge langkula inamdem emmumpe mesamyénía?

¹⁶ “Aropakpe ngokke turna Shédípe idu tetedem,” emla Ruutum Shédí bí podung, “Ingkona rojedí bíme roja palenglo duumola roja imotokudí, séko kíng bí bonying ibosupala agíke pésula togesunam emte ikumape bettokudí, dekena bíkke ipusiléénam roja lokke Babilon amolo bí siyé.

¹⁷ Edílo Babilonke sipaying maglínge, deddína amiem mokape emla kédéng agérem iyabomla, kobung-korungem konga bomla, aabom yékudí, delo Pharaoh rojake maglíng kídíde mimak ikolo bím atí igul lamayé.

¹⁸ Bí bonying dem betla, agíke togesunamem igemato. Bí agísue toge sutula, angukonpe sikena ato siro takamem ikunam legape, bí edílokom agíem mopít sulamayé.

¹⁹ “Dekepeila Ruutum Shédí bí ludung: Ngokke turna Shédípe idu tete delo, ngokkíng bíkke pésunam agom kídíke ajéng emla ngokke bonying ibosunamem bíkke betkunam ajéngem bík dumpo teyolo ngo ruulíkyéku.

²⁰ Ngo bík teyolo ngokke esabem kuulumla, ngo bím umyé. Ngokkelo bí arope yémanam legape ngo bím Babilonpe uma bomlangkula, delo bík teyolo ngo kebang baabomyéku.

²¹ Duknyok gekuna bíkke sipaying kídíe gíníng-yoksalok siyinyé. Turkína kídíe moole takamlo yépit-yéyit gooyé. Delomin, Ruutum ngo podung emla no arope kényékune.”

Shédíke Míída Sukeng Legangko Pobikuname

²² “Ruutum Shédí bí sikepe podung: Ngo agísue sidar esing attínglok amum mumsana konem laala díílíkyé; ngo attíng yalumlok ayin yinsulko tírla kedonruna dííte teyolo díílíkyé.

²³ Israel lokke kedonruuna dííte teyolo, ngo deme díílíkyé; de deddína aage lenla, ayé ééla, gai-gakoruna sidar esingkope iyé. Atí-atína pettang kídíe delo asup suplíkyé; delokke esing aag delokke anne ugyumlo unyinyé.

²⁴ Asi-among takamke esing kídíe, Ruutum ngomin, kedonna esingem beeletne, aména esingem bottemone, yayina esingem ereemone, ereenem yayi mokune emla kényinyé. “Ruutum ngo agomem polendung, delokke ipe emla míínamem, ngo arope iyé.”