EJEKIEL 16 - DEENA BAIBÉL (BSI)

Míngkesumana Jirusalem

¹ Ruutum ke agome ngokkíng pííto:

² “Tanike ue, belumrupe agér-anam inamem kénsudope Jirusalemme sutkanlangka.

³ Ruutum Shédíbí Jirusalemke teyolo ingkona agomem lududí, dem no bíme pokan bilangka: “Nome Kanaan amolo olento. Nok abue Amorit amikuai, delokke nokke ane Hittit mimekuai.

⁴ Edílo nome olentodí, sékote nome kiinyo gatmato, delokke írbínla imato. Nok amíle deedope nome tídbínla, alo mollíkla, iigadope egelok yéllumla ina kamato.

⁵ Sékote nome ayange emlate kangkína kamato, delokke nok teyolo sikena aina agérem ibina kamato. Nome ododem sékote ayana kamato. Takame nome míípakla gíídang-lamgélo mino nome elpaktone.

⁶ “Dekepakpe idodelo ngo nok ampenglok gíla nome agíke amíl iyyi sulo bedu-belela, tukup-tulat sudope kaato. Nome iyyie ilumbomdo. Nokke dekepe idungem, ‘Turlangka,’ emla ngo lula nome simomato.

⁷ Ardana esing kísape nome ngo sisangmoto. No sisaala, amíl-amoe edííla, bodola mimumkope ikai. Nok anyune lento, delokke nok dumíde saala ikai, idola no amíle araato.

⁸ “Ngokke lekon gídíkuem, nome yaamé angong ngoobo sudídope kaato. Depeila ngokke ege-galugem, nokke amíl araanadem gekap sudope bisula, nome ngo mimepe laayé emla togesuto. Aroe nokkíng ngo nyamran daapongem ibosula no ngokkepe ikai.” Sikepe Ruutum Shédí bí polendung.

⁹ “Delo nom ngo asilok írbínla, nokke amíl delokke iyyiem arkutto. Depe irodelo nok amíl delo ngo olib téllok mollíkto.

¹⁰ Nom ngo morí-mojokkana lukdor galugem píllíkla, ayolok omnam gairuna leyugem bila, kamporuna gasorem gemola, arekana egem gemoto.

¹¹ Delo nom ngo lunggu tadogem tulíkla, lerum-lakrumem ilíkla ito.

¹² Nom ngo nyobulo genam nyopon emlang nyorung tekbangem, delokke kamporuna dumlupko ibila luplíkto.

¹³ No uunlok delokke baldínlok monam lungguem geto. No morí-mojok appunkana ege-gasorem geto. No gairuna atalok monam ettíngem, ngullangem delokke olib télem doto. No yagorupe kampolenla ranipe ito.

¹⁴ Pobí suyimanam nokke kampo delok legape opín-buang daadi tabulo nok amíne byargoto. Kapeila ngokke nok teyolo angun-abé kampo-taiyo ruulíknamde nokke kampoem apíng aloomoto.” Ruutum Shédí bí sikepe polendung.

¹⁵ “Idola no agíke kampodem míngkímsuto, delokke nokke amín kanamdem, no notii agérpe gérnato. Ami takam keralo nokke kampoem lengkansula, nok ampelo gína takamlo no ketbo-dobosula ikai.

¹⁶ Nokke ayokon ege kídíem kumpom kídílo leemolíkla, notii agérem gérgoola, ipemanam agér mílílo itíkai. Sikepe edílokom ipe aimatuai.

¹⁷ Ngokke uunlokla baldínlok lunggu píla, nom binam kídíem, no uyu mimanglo inala uyu kídílo notiipe ibosuto.

¹⁸ Kampona morí-mojoknam egem ngo ila, nom binamem no uyu mimang kídí delo ilíkla, delokke ngokke nome olib tél emla nampona aríkana binamem bulukíng mollíkla, romlíkgoola ikai.

¹⁹ Nome gairuna atangem, olib télem, ngullangem dodo-tíídope binamem no uyu mimang kídídelo, uyue nome ashéng bomdope ipak ilíkbila bulume biyinto.” Sikepe Ruutum Shédíbí podung.

²⁰ “Depeirodem nokke, ngok legape obinam ome-oo kídíem uyu mimang kídílo ipakpe ilíkto. Nokke uyu kídílo notiipe ibosunamde atíngmanía?

²¹ No ngokke ome-oo kídarem uyulo ipak ilíkla, mokala inamde, ngok kangkolo atírumana, ngom míngke sumanam agérmanía?

²² Nokke belumruupe notiipe iduuso, nokke kerang yénamem, nokke amíl araape, agí iyyisulo bedu-belela, tukup-tulatsula inamem no kénsuyimanía?”

Jirusalemke Notiipe Iname

²³ Ruutum Shédí bí sipe ludung: “No nyokkai! No reyubruupe nyokkai! Nokke atímana iko teyolote,

²⁴ bedang miyongke abelo, no uyu mimang kumpomem píla notiipe igodung.

²⁵ Nokke amíl kampoem yupyalo ikatsula, anínlo gína ami takamem nok amílem bisula, loodípe nok notii agérde bojéyape géryangkai.

²⁶ Abír-ayo mílílo míítína, nokke kumrí Ijipt kíng no gíla, ibbo-dobo sutíla, nokke dekena notii agérde ngome yagorupe marmodung.

²⁷ “Depeila supaklokke ila nokke utepooro paapenamem laabínla, nome itung-irédope, ngok alage lengorkai. Nokke deemang-amo agérem belumla nome kangkina Philistain ami kídílo nome ngo ruulíkto.

²⁸ “Nokke ilíí ragidem nok yébosuname apííbi lamanam legape no Assiria kídí méélamlo dugmín geto. Bulu nome abír-ayo ibosuto, idola bulute nome aang píídope imato.

²⁹ No pesi-koret itígoona Babilon amilote abír-ayoem ibosuto, idola bulute nome aang píídope imato.

³⁰ “Ruutum Shédíbí sipe ludung: Nok aapí míngkor-míyorde edíírumanako! Annying atí kamape notii agér mílílo no itígoonako.

³¹ Beda takamlo no uyu mimang kumpom mola, dekedelo abír-ayo igoola itígoonako. Idola no abíd notii mime kísape no abal kaabo kootírlok igoomangai.

³² Agí miloem míísumape mibo-miyingem míílatla abír ibosuna mime kísa no inako.

³³ Notii mimedem ire bidunamin, idola nodan, nok mííbosunamem aman bilatdung, delokke nokkíng ibbosudope abal bisupgoola regosudung.

³⁴ Depeila no angukonrupe ina notii mimeko. Sékote nome abír-ayo idope rallíkla imang. No rekosumang. Nomin relatdune. Aroe, no angurusuna notii mimeko!”

Jirusalem Teyolo Ruutum ke Kebang Luname

³⁵ “Depeila notiipe ina, E Jirusalem, Ruutum ke lunamsim tattola.

³⁶ Ruutum Shédí bí sipe ludung: No notiipe agí ege-galugem bítkutsula, amíl-amoem nok mííbosunam kídílo bigosula, belumrunam uyu mimang kídílo no ajon jonbosula, nokke ome-oo kídíem uyu kídílo ipak ilíkla

³⁷ igape, nokke mííbosutonam, delokke nokke kangkinam, nokke kerangke angong-arum takamem, ngo dumsumola, nome gargoomola imopala, nome ege-galugem bítkutla, bulu takam kaadope nome amíl araape imoyé.

³⁸ Nokke mokanam legapelang abír-ayo igape, takam keralo nome ajéng luketla, ngokke aklíng loklang marlíngloge nome itung-iréla simola,

³⁹ buluke alag aralo nome ngo ruulíkla, nokke uyu kumpom monam kídí, delokke nokke abír-ayo ipom kídíem, bulu bénpak-bényakbila, nokke ege-galugemlang lunggu-tadok kídíem rotbínla nome amíl arang rudope bulu meyé.

⁴⁰ “Bulu, nokke mirupe milu-mibam aabola, nome elínglok gela, buluke yoksalok nome tarong-tarongpe tekmíkla iyé.

⁴¹ Bulu nok ekumem emepe rílíkbila, deddína mime ane milungem nome kaadope imoyé. Ngo nokke notiipe inamem imoyimayé, delokke nokke mííbosunam kídílo, nome aman bimoyimayé.

⁴² Depeiro delomin ngokke marlínge ailangkula, ngo eetet yékune. Dekepe irodem ngo kangkiyimayé, delokke nela aknamde kaimayé.

⁴³ Nokke koo amédung delo, kape kísape ngo nome usaatodí, no dem kénsuyimang. Nokke belum-bekamrupe agér-anam inam takam si ngom marmoto. Depeila nokke atímang ireem, nom agíem doryin sudokupe ngo imoyéku. Nokke belumrunam ato-siro inam kékonlo, kapeila abír-ayo agérem ilíkkan?” Sikepe Ruutum Shédí bí polendung.

Ona Ane Kísa Omede Imín Gename

⁴⁴ Ruutum bí sipe podung: “E Jirusalem! Nok teyolo ami kídíe sim ngiitom gompísim lubomyé: ‘Ona ane kísa ome deteng imín gekai.’

⁴⁵ No arope, agí milo emlang ome-uem míípaksuna ane lokke omeko. Sok teyoloteng agí miloemlang agíke ome-uem kangkisuna, nokke bírme kídar kísanako no. Nolang nokke doolung abíd bírme kídí delokke anede Hittitko, delokke abude Amoritko.

⁴⁶ Nokke bírme abíyade línggíng telo duuna doolung kídí Samari bí. Nokke bírme aníyade sokkobelo duuna Sodom doolungde.

⁴⁷ Buluke ale bedalo note enmín gela buluke belumrupe agér inam kídílo note erapmíndunía? No buluke deemana agérem imín geko teyolo, bulum pemílo pakyape eerírupe deemang agérem gérkai.”

⁴⁸ Ruutum Shédí ngo, turna Shédípe inam berokpe podung, nokke bírme Sodomlang bík doolung kídíe; nokkelang nokke doolung kídíke inamrung kísa atímana agérem imato.

⁴⁹ Sodomlang bíkke doolung kídíde donam-tííname bojéla, aapí-aang eetetpe yéla, míngkímsula yéto. Idola bulu opan aréénemlang mima-sokangem kaasi-tatsimato.

⁵⁰ Bulu yagorupe míngkímsula, aapí-aange tolla, ngok kangkinam ato-siro mílílo ila, bulum ngo nyokmoto. Sim legang sim nolu aipakpe kéndung.

⁵¹ “Jirusalem nokke deemang agér inam delokke arotkon kísana kokom Samari bí imang. Samari mempemílo no belumyanam deemangem ito. Nonyike deemang paabem ruupesuyéme Samarime deenape kaamodung.

⁵² Supak no agí atímangke annyingem geka- sukupe aiyé. Nokke paab kídíde yagorupe eeríla, nokke bírme kídíempemílo pakyangkai. Depeila nomla bulum ruupesuyém, bulum deenape kaadung. Nom pemílo nokke bírme kídíem deenape, nokke kaamonam legape agí atímangke annyingem no geka sudaklangka.

Sodommela Samarime Aimoyéku

⁵³ “Sodom melang bík doolung kídíem delokke Samari melang bík doolung kídíem, ngo lekoda jémoyéku. Bulukíng lekope nomte jémoyéku.

⁵⁴ Nokke atímape ila oletkunamde, nokke bírme kídíke aiyanamem lengkanbiyé, delokke no agísue agísuem annyingsuyé.

⁵⁵ Buluke jéyékuem, nomlang nok doolung kídíemte jémoyéku.

⁵⁶ Nokke míngkímsudo longe delo no Sodomme luber-luyerla,

⁵⁷ nokke deemang-amoem lengkanmang adape, bíme lupu-luléla no imatonía? Supak no agísuete Sodomme nokke itonam tuubupe, Philistain kídíe, Edom kídíe, delokke nome kangkina nokke kumrí-donggong doolung kídíe lukala, luber-luyerla idope ikosudungku.

⁵⁸ Nokke deemang-amo ireem, nokke belumruupe inam kídíke areem, no paalangkula ankasukupe aido.” Sikepe Ruutum bí polendung.

Agínpe Duuyarpena Daapong Legange

⁵⁹ Ruutum Shédíbí sikepe podung: “Nokke panggísupe nom ngo itung-iréyé. Kapeila no ngokke togesunam agomem ai-kampope tatbimang, delok teyolo daapong ayonem no betto.

⁶⁰ Idola nokke koo dungeme ngokke nokkíng daapong ibosunamem ngo mínggapla bomgapyé. Sok teyoso duuryarna daapongko ngo nome ilenboyé.

⁶¹ Edílo nokke bírme abíyana demlang bírme aníyanadem, nokke kaarík suyékuem, nokke agér itonamem no míípa sulangkula no annying suyéku. Bínyime nokke ome kísape ngo ruubiyéku. Si ngokke daapong ayonlo kamang dagakom ngo deme iyéku.

⁶² Ngokke daapongem nokkíng anípe imoyéku, delo Ruutum bí ngo emla no kényéku.

⁶³ Nok imem takamem ngo asampe mepakbiyé. Idola nodan dekedem míípa suyarla annyinglok deke eke emla, nok nappa delok atí agom luge langkumayé.” Ruutum Shédíbí sikepe polendung.